ഗാസ യുദ്ധത്തില് വെടിനിര്ത്തലും ബന്ദികളെ മോചിപ്പിക്കാനുള്ള ട്രൂസ് ചര്ച്ചകളും...ഇസ്രായേല് നീട്ടിവെക്കുകയാണെന്ന് ഹമാസ് തലവന് ഇസ്മായില് ഹനിയേ...സമീപകാല ചര്ച്ചകളില് കാര്യമായ പുരോഗതി ഉണ്ടായിട്ടില്ല...
ഗാസ യുദ്ധത്തില് വെടിനിര്ത്തലും ബന്ദികളെ മോചിപ്പിക്കാനുള്ള ട്രൂസ് ചര്ച്ചകളും ഇസ്രായേല് നീട്ടിവെക്കുകയാണെന്ന് ഹമാസ് തലവന് ഇസ്മായില് ഹനിയേ ആരോപിച്ചു. സമീപകാല ചര്ച്ചകളില് കാര്യമായ പുരോഗതി ഉണ്ടായിട്ടില്ല. 'സയണിസ്റ്റ് അധിനിവേശം ധാര്ഷ്ട്യത്തോടെ നീട്ടിക്കൊണ്ടുപോകുന്നത് തുടരുന്നു, യുദ്ധവും ആക്രമണവും അവസാനിപ്പിക്കാനുള്ള ഞങ്ങളുടെ ന്യായമായ ആവശ്യങ്ങളോട് പ്രധാനമന്ത്രി ബെഞ്ചമിന് നെതന്യാഹു പ്രതികരിക്കുന്നില്ല' -ഒരു ഹിസ്ബുള്ള യോഗത്തില് പ്രദര്ശിപ്പിച്ച റെക്കോര്ഡ് ചെയ്ത പ്രസംഗത്തില് ഹനിയേ പറഞ്ഞു.ഇസ്രായേലിന്റെ ചര്ച്ചാ സംഘം കെയ്റോയില് നടന്ന മറ്റൊരു ചര്ച്ചയില് നിന്ന് മടങ്ങിയതായി നെതന്യാഹുവിന്റെ ഓഫിസ് ചൊവ്വാഴ്ച അറിയിച്ചതായും അദ്ദേഹം പ്രസംഗത്തില് പറഞ്ഞു.
ചര്ച്ചയില് ഈജിപ്ഷ്യന് മധ്യസ്ഥതയില് ഹമാസിനായി ഒരു പുതുക്കിയ നിര്ദ്ദേശം രൂപീകരിച്ചതായും പ്രധാനമന്ത്രിയുടെ ഓഫിസ് പറഞ്ഞു. എന്നാല്, ഗ്രൂപ്പിന് പുതിയ നിര്ദ്ദേശങ്ങളൊന്നും അയച്ചിട്ടില്ലെന്ന് ഹമാസിന്റെ മുതിര്ന്ന ഉദ്യോഗസ്ഥന് ബാസെം നൈം ചൊവ്വാഴ്ച പറഞ്ഞു.വെടിനിര്ത്തലും തടവുകാരുമായുള്ള കൈമാറ്റ ഇടപാടും സംബന്ധിച്ച് മധ്യസ്ഥരില് നിന്നോ ഇസ്രായേലില് നിന്നോ ഒരു നിര്ദ്ദേശവും പ്രസ്ഥാനത്തിന് ലഭിച്ചിട്ടില്ലെന്നും അദ്ദേഹം പറഞ്ഞു. സ്ഥിരമായ വെടിനിര്ത്തല്, ഗാസ മുനമ്പില് നിന്ന് ഇസ്രായേല് പൂര്ണമായി പിന്വാങ്ങല്, കുടിയിറക്കപ്പെട്ട ഗാസക്കാരുടെ തിരിച്ചുവരവ്,സഹായത്തിന്റെ തടസ്സമില്ലാത്ത പ്രവേശനം, യുദ്ധത്തില് തകര്ന്ന പ്രദേശത്തിന്റെ പൂര്ണ്ണമായ പുനര്നിര്മ്മാണം, മാന്യമായ തടവുപുള്ളികളുടെ കൈമാറ്റ കരാര് എന്നിവയാണ് ട്രൂസ് ചര്ച്ചകളിലെ വിഷയങ്ങള്. ഇസ്രായേല് സൈന്യത്തിന് ആയുധങ്ങളും വെടിക്കോപ്പുകളും വിതരണം ചെയ്ത് ഗാസയിലെ യുദ്ധത്തില് 'നേരിട്ട് അമേരിക്കന് പങ്കാളിത്തം' എന്ന താന് പറഞ്ഞതിനെയും ഹനിയേ പ്രസംഗത്തില് അപലപിച്ചു.
ഗസ്സ മുനമ്പിലെ ഇസ്രായേൽ നരനായാടിൽ പരിക്കേറ്റ ഫലസ്തീനികൾ ചികിത്സക്കായി ഒമാനിലെത്തി. കഴിഞ്ഞ ദിവസം രാത്രിയോടെയാണ് കുട്ടികളും സ്ത്രീകളുമടക്കമുള്ള സംഘം സുൽത്താനേറ്റിന്റെ മണ്ണിലെത്തിയത്. അധികൃതരുടെ നേതൃത്വത്തിൽ ഊഷ്മളവരവേൽപ്പാണ് ഫലസ്തീനികൾ ക്ക് നൽകിയത്. ഇവർക്ക് അവശ്യമായ ചികിത്സ ലഭ്യമാക്കുമെന്ന് വിദേശകാര്യ മന്ത്രാലയത്തിലെ ഔദ്യോഗിക വൃത്തങ്ങൾ അറിയിച്ചു. പരിക്കേറ്റ ഫലസ്തീനികളെ എത്തിക്കാൻ സൗകര്യമൊരുക്കിയ ഈജിപ്തിലെ അധികാരികൾക്ക് വിദേശകാര്യ മന്ത്രാലയം നന്ദി പറഞ്ഞു.ദിവസങ്ങൾക്ക് മുമ്പ് ഗസ്സയിലെ കുട്ടികൾക്ക് കൈത്താങ്ങുമായി ഒമാൻ എത്തിയിരുന്നു. ഫലസ്തീനിലെ കുട്ടികളെ സഹായിക്കാൻ സുൽത്താനേറ്റ് യുനിസെഫിന് പത്ത് ലക്ഷം യു.എസ് ഡോളർ ആണ് സംഭാവന നൽകിയത്.
കുട്ടികളോടുള്ള പ്രതിബദ്ധക്ക് ഒമാൻ വിദേശകാര്യ മന്ത്രാലയത്തിന് ഞങ്ങൾ ആത്മാർഥമായ നന്ദി അറിയിക്കുകയാണെന്ന് ഒമാനിലെ യുനിസെഫ് പ്രതിനിധി സുമൈറ ചൗധരി വ്യക്തമാക്കുകയും ചെയ്തിരുന്നു.തുടർച്ചയായുള്ള ഇസ്രായേൽ ബോബോക്രമണത്തിൽ ഫലസ്തീനിലെ സ്ത്രീകളും കുട്ടികളുമടക്കമുള്ളവരുടെ മാനസികവും ശാരീരീകവുമായ ആരോഗ്യനിലയെ സാരമായി ബാധിച്ചിട്ടുണെന്നാണ് ലോകാരോഗ്യ സംഘടനയടക്കം പറഞ്ഞിട്ടുള്ളത്. പല ആശുപത്രികളും തകർന്നതിനാൽ ശരിയായ പരിചരണംപോലും കുട്ടികൾക്ക് നൽകാൻ സാധിക്കുന്നില്ല.ഫലസീനിലേക്ക് വിവിധ ഘട്ടങ്ങളിലായി അവശ്യ വസ്തുക്കളും ഒമാൻ എത്തിച്ചിരുന്നു.
സുൽത്താൻ ഹൈതം ബിൻ താരിഖിന്റെ നിദേശങ്ങളുടെ അടിസ്ഥാനത്തിൽ ഒമാൻ ചാരിറ്റബിൾ ഓർഗനൈസേഷനാണ് അവശ്യവസ്തുക്കളും ഭക്ഷണവും മെഡിക്കൽ സാമഗ്രികളും റഫ അതിർത്തി വഴി കൈമാറിയത്. ഫലസ്തീനിലെ ജനങ്ങളെ സഹായിക്കാൻ ഒമാൻ ചാരിറ്റബിൾ ഓർഗനൈസേഷൻ (ഒ.സി.ഒ) നേരത്തെതന്നെ സംവിധാനം ഒരുക്കിയിരുന്നു. ഇതിനകം നിരവധി ആളുകളും സ്ഥാപനങ്ങളുമാണ് ഒ.സി.ഒ വഴി ധനസഹായം കൈമാറിയത്. സംഭാവനകൾ സ്വീകരിക്കുന്നതിനായി വിവിധ മാർഗങ്ങളാണ് ഒ.സി.ഒ സജ്ജീകരിച്ചിരിക്കുന്നത്.
https://www.facebook.com/Malayalivartha
