ഇലോണ് മസ്കിന്റെ ഇന്ത്യ സന്ദര്ശനം മാറ്റിവെച്ചു...
ടെസ്ല സി.ഇ.ഒ ഇലോണ് മസ്കിന്റെ ഇന്ത്യ സന്ദര്ശനം മാറ്റിവെച്ചു. കമ്പനിയിലെ ഭാരിച്ച ചുമതലകള് മൂലമാണ് മസ്ക് സന്ദര്ശനം മാറ്റിവെച്ചത് എന്നാണ് റിപ്പോര്ട്ടുകളുള്ളത്.
ഏപ്രില് അവസാനവാരമാണ് മസ്ക് ഇന്ത്യ സന്ദര്ശിക്കാനിരുന്നത്. ''നിര്ഭാഗ്യവശാല് ടെസ്ലയിലെ ഭാരിച്ച ഉത്തരവാദിത്തങ്ങള് കാരണം സന്ദര്ശനം മാറ്റിവെക്കേണ്ടി വന്നു. ഈ വര്ഷം തന്നെ ഞാന് ഇന്ത്യ സന്ദര്ശിക്കും. അതിനായി ആകാംക്ഷയോടെ കാത്തിരിക്കുകയാണ്.''-മസ്ക് എക്സില് കുറിച്ചു. ഈ മാസാദ്യമാണ് ഇന്ത്യന് സന്ദര്ശനത്തെ കുറിച്ച് മസ്ക് വെളിപ്പെടുത്തിയത്.
പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്താനും പദ്ധതിയുണ്ടായിരുന്നു. ഇന്ത്യയില് ടെസ്ല 2-3 ബില്യണ് ഡോളറിന്റെ നിക്ഷേപം പ്രഖ്യാപിക്കുമെന്നും റിപ്പോര്ട്ടുകളുണ്ടായിരുന്നു.
മസ്കിന്റെ സന്ദര്ശനം ബി.ജെ.പി തെരഞ്ഞെടുപ്പ് പ്രചാരണ ആയുധമാക്കുകയും ചെയ്തു. കഴിഞ്ഞവര്ഷം ജൂണില് പ്രധാനമന്ത്രി യു.എസ് സന്ദര്ശിച്ചപ്പോള് മസ്കുമായി കൂടിക്കാഴ്ച നടത്തിയിട്ടുണ്ടായിരുന്നു.ലോകത്തിലെ മുന്നിര ഇലക്ട്രിക് വാഹന നിര്മാണ കമ്പനിയായ ടെസ്ലയെ ഇന്ത്യയില് അവതരിപ്പിക്കുന്നതുമായി ബന്ധപ്പെട്ട ചര്ച്ചകളും അന്ന് നടന്നു.
ടെസ്ല ആഗോളതലത്തില് തൊഴിലാളികളുടെ 10 ശതമാനം അതായത് ഏകദേശം 14,000 ജീവനക്കാരെ വെട്ടിക്കുറച്ചിട്ടുണ്ടായിരുന്നു.
https://www.facebook.com/Malayalivartha