ടെഹ്‌റാനിൽ ഹമാസ് നേതാവ് ഇസ്മായിൽ ഹനിയേയും ബെയ്‌റൂട്ടിൽ ലെബനീസ് ഗ്രൂപ്പിലെ മുതിർന്ന സൈനിക കമാൻഡർ ഹിസ്ബുള്ള ഫുആദ് ഷുക്കറും കൊല്ലപ്പെട്ടതിനെത്തുടർന്ന് മിഡിൽ ഈസ്റ്റ് തിളച്ചുമറിയുകയാണ് . ഇതേ തുടർന്ന് ഇസ്രായേലിനെ കഠിനമായി ശിക്ഷിക്കാൻ നിർദേശിച്ചുള്ള ഇറാൻ പരമോന്നത നേതാവ് അലി ഖാംനഈയുടെ ഉത്തരവ് നടപ്പാക്കുമെന്ന് ഇറാൻ ​റവല്യൂഷണറി ഗാർഡ് കോർപ്സ് ഡെപ്യൂട്ടി കമാൻഡർ അലി ഫദ്‍വി വ്യക്തമാക്കിയിയ്ക്കുകയാണ് . ഹമാസ് ഉന്നത നേതാവ് ഇസ്മാഈൽ ഹനിയ്യയുടെ കൊലപാതകത്തിന് ഇറാൻ പ്രതികാരം ചെയ്യുമെന്ന് പരമോന്നത നേതാവ് അറിയിച്ചിരുന്നു. ഇക്കാര്യത്തിലാണ് അലി ഫദ്‍വിയുടെ പ്രതികരണം

ഇസ്മാഈൽ ഹനിയ്യുടെ രക്തത്തിന് പകരം ചോദിക്കുമെന്നും ഇസ്രായേലിനെ ശിക്ഷിക്കുമെന്നുമുള്ള പരമോന്നത നേതാവിന്റെ ഉത്തരവ് വ്യക്തവും കൃത്യവുമാണ്. ഏറ്റവും നല്ല രീതിയിൽ ഉത്തരവ് നടപ്പാക്കുമെന്ന് അലി ഫദ്‍വി അറിയിച്ചു. ലെബനൻ അതിർത്തിക്കടുത്തുള്ള കിബ്ബട്ട്സ് മാൽകിയയിൽ റോക്കറ്റ് മുന്നറിയിപ്പ് സൈറണുകൾ മുഴങ്ങുകയാണ് .മുൻകരുതൽ നടപടിയെന്ന നിലയിൽ താമസക്കാരോട് ജാഗ്രത നിർദ്ദേശം കൊടുക്കുന്നുണ്ട്.

വെള്ളിയാഴ്ച വൈകുന്നേരം ലെബനൻ തുറമുഖ നഗരമായ സിഡോണിൻ്റെ തെക്ക് ഭാഗത്ത് ഒരു വാഹനം ലക്ഷ്യമിട്ട് ഇസ്രായേൽ വ്യോമാക്രമണം നടത്തി, ഹമാസിൻ്റെ ഉന്നത സുരക്ഷാ ഉദ്യോഗസ്ഥൻ സമീർ അൽ-ഹജ്ജ് കൊല്ലപ്പെട്ടതായി ഹമാസ് വൃത്തങ്ങളും രണ്ട് അധിക സുരക്ഷാ സ്രോതസ്സുകളും അറിയിച്ചു. അതിർത്തിയിൽ നിന്ന് ഏകദേശം 60 കിലോമീറ്റർ (ഏകദേശം 40 മൈൽ) നടന്ന ആക്രമണത്തിൽ അൽ-ഹജ്ജിൻ്റെ അംഗരക്ഷകനും ഗുരുതരമായി പരിക്കേറ്റതായി റിപ്പോർട്ട് ഉണ്ട്

കഴിഞ്ഞ 10 മാസമായി, ഗസ്സയിൽ നടന്നുകൊണ്ടിരിക്കുന്ന സംഘർഷത്തോട് അനുബന്ധിച്ച് ഹമാസിൻ്റെയും സഖ്യകക്ഷിയായ ലെബനൻ സായുധ ഗ്രൂപ്പായ ഹിസ്ബുള്ളയുടെയും ലെബനനിലെ മറ്റ് വിഭാഗങ്ങളുടെയും അംഗങ്ങൾക്കെതിരെ ഇസ്രായേൽ സൈന്യം ആക്രമണം നടത്തിവരികയാണ്. പ്രതികരണമായി, ഈ സായുധ സംഘങ്ങൾ അതിർത്തി കടന്ന് വടക്കൻ ഇസ്രായേലിലേക്ക് റോക്കറ്റുകൾ, ഡ്രോണുകൾ, പീരങ്കികൾ എന്നിവ ഉൾപ്പെടെയുള്ള ആക്രമണങ്ങൾ ആരംഭിച്ചു.

ഭൂരിഭാഗം ശത്രുതകളും ഇസ്രായേലിനും ലെബനനുമിടയിലുള്ള അതിർത്തി പ്രദേശങ്ങളിൽ ഒതുങ്ങിയിരിക്കുകയാണെങ്കിലും, ഹിസ്ബുള്ളയുടെയും ഹമാസിൻ്റെയും മറ്റ് ഗ്രൂപ്പുകളുടെയും ഉയർന്ന റാങ്കിലുള്ള അംഗങ്ങളെ ലക്ഷ്യമിട്ടുള്ള ഇസ്രായേൽ ആക്രമണങ്ങൾ കൂടുതൽ വടക്കുഭാഗത്താണ് നടന്നത്. ജനുവരിയിൽ, ബെയ്റൂട്ടിൻ്റെ പ്രാന്തപ്രദേശത്ത് ഇസ്രായേൽ നടത്തിയ ആക്രമണത്തിൽ ഹമാസിൻ്റെ ഉപമേധാവി സലേഹ് അരൂരിയുടെ ജീവൻ അപഹരിച്ചു. അടുത്തിടെ, കഴിഞ്ഞ ആഴ്ച, ഇതേ പ്രദേശത്ത് മറ്റൊരു ഇസ്രായേൽ ആക്രമണത്തിൽ ഹിസ്ബുള്ളയുടെ ഉന്നത സൈനിക കമാൻഡർ ഫുവാദ് ഷുക്കർ കൊല്ലപ്പെട്ടു. ഇതോടെ ഇറാനും ഹിസ്ബ്ള്ളയും ഹമാസും ഒറ്റക്കെട്ടായി ഇസ്രയേലിനെതിരെ തിരിഞ്ഞിരിക്കുകയാണ്‌

ഏതു നിമിഷവും ഒരു പൊട്ടിത്തെറി ഉണ്ടാക്കാമെന്ന സംശയത്തിൽ ഇറാൻ്റെയും ലെബനീസിൻ്റെയും വ്യോമാതിർത്തി ഒഴിവാക്കാൻ തങ്ങളുടെ വിമാനക്കമ്പനികൾക്ക് ഉപദേശങ്ങൾ നൽകിയിരിക്കുകയാണ് യുകെയും ഈജിപ്തും . യുഎസും യുകെയും ഉൾപ്പെടെ നിരവധി രാജ്യങ്ങൾ തങ്ങളുടെ പൗരന്മാരോട് ലെബനൻ വിടാൻ ആവശ്യപ്പെട്ടിട്ടുണ്ട്.

നിലവിലുള്ള സംഘർഷത്തിനിടയിൽ, പശ്ചിമേഷ്യയിലെ സ്ഥിതിഗതികൾ അങ്ങേയറ്റം ആശങ്കാജനകമാണെന്ന് വിശേഷിപ്പിച്ചുകൊണ്ട് സംഘർഷം കുറയ്ക്കാനും സംയമനം പാലിക്കാനും ഇന്ത്യ ഉൾപ്പെട്ട എല്ലാ കക്ഷികളോടും അഭ്യർത്ഥിച്ചു.ഏകദേശം 3000 ഇന്ത്യൻ പൗരന്മാർ ലെബനനിലും 10,000 പേർ ഇറാനിലുമുണ്ടെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ പറഞ്ഞു .

അതേസമയം, ഇസ്രായേലിനെ സംരക്ഷിക്കുമെന്ന നിലപാട് കഴിഞ്ഞ ദിവസവും യു.എസ് ആവർത്തിച്ചു. വൈറ്റ് വക്താവ് ജോൺ കിർബി ഇസ്രായേലിനെ സംരക്ഷിക്കാൻ മേഖലയിൽ തങ്ങൾക്ക് നിരവധി സന്നാഹങ്ങളുണ്ടെന്ന് പറഞ്ഞു. നേരത്തെ പടക്കപ്പലുകൾ അടക്കം കൂടുതൽ സന്നാഹങ്ങൾ യു.എസ് മേഖലയിലേക്ക് അയച്ചിരുന്നു.

ഹമാസിന്റെ ഉന്നത നേതാവ് ഇസ്മാഈൽ ഹനിയ്യ ഇറാനിൽവെച്ച് കൊല്ലപ്പെട്ടതോടെയാണ് ഇസ്രായേലുമായുള്ള പോരാട്ടത്തിന് ഇറാൻ നിർബന്ധിതമായത്. കൊലപാതകത്തിന് പിന്നിൽ ഇസ്രായേലാണെന്നാണ് ഇറാനും ഹമാസും ആരോപിച്ചിരുന്നു. എന്നാൽ, ആരോപണങ്ങൾ നിഷേധിക്കുകയോ ശരിവെക്കുകയോ ഇസ്രായേൽ ചെയ്തിട്ടില്ല.

അതേസമയം തെക്കൻ ഗാസയിലെ ഖാൻ യൂനിസിന് ചുറ്റുമുള്ള വലിയ പ്രദേശങ്ങളിൽ വീണ്ടും കൂട്ട ഒഴിപ്പിക്കലിന് ഇസ്രായേൽ സൈന്യം ഉത്തരവിട്ടിട്ടുണ്ട്, ഫലസ്തീൻ റോക്കറ്റ് ആക്രമണത്തിന് മറുപടിയായി തങ്ങളുടെ സൈന്യം ഉടൻ തന്നെ അവിടെ പ്രവർത്തിക്കുമെന്ന് പറഞ്ഞു.
ഗാസയിൽ ഇപ്പോൾ മരണസംഖ്യ 40,000 അടുത്തതായി ആരോഗ്യ മന്ത്രാലയം അറിയിച്ചു.