വടക്കന്‍ എത്യോപ്യയില്‍ മണ്ണിടിച്ചിലില്‍ 10 മരണം... കാണാതായവര്‍ക്കായുള്ള തെരച്ചില്‍ പുരോഗമിക്കുന്നു... നാല് മൃതദേഹം മാത്രമേ വീണ്ടെടുക്കാനായുള്ളു.

വീടുകള്‍ നഷ്ടമായ 2400 പേര്‍ ക്യാമ്പുകളിലാണ് കഴിയുന്നു. കനത്ത മഴയെ തുടര്‍ന്നായിരുന്നു മണ്ണിടിച്ചില്‍. എത്യോപ്യയിലെ അംഹാര മേഖലയില്‍ ശനിയാഴ്ചയാണ് വലിയ രീതിയിലുള്ള മണ്ണിടിച്ചിലുണ്ടായത്. കാണാതായവര്‍ക്കായുള്ള തെരച്ചില്‍ പുരോഗമിക്കുന്നു. മണ്ണിടിച്ചിലില്‍ 8 പേര്‍ക്ക് ഗുരുതര പരിക്കേറ്റു. രാജ്യത്തുണ്ടായ അസാധാരണമായ മഴയെ തുടര്‍ന്നാണ് വലിയ രീതിയിലുള്ള മണ്ണിടിച്ചിലുണ്ടായത്.

നിരവധി മണ്ണിടിച്ചിലുകളാണ് കഴിഞ്ഞ ഏതാനും മാസങ്ങളായി ഇവിടെ സംഭവിച്ചിട്ടുള്ളത്. നേരത്തെ എത്യോപ്യന്‍ കാലാവസ്ഥ വകുപ്പ് മണ്ണിടിച്ചില്‍ മുന്നറിയിപ്പ് നല്‍കിയിട്ടുണ്ടായിരുന്നു. രാജ്യത്തിലെ പല മേഖലയിലും മണ്ണിടിച്ചില്‍ ഉണ്ടാവുമെന്ന മുന്നറിയിപ്പാണ് കാലാവസ്ഥാ വകുപ്പ് നല്‍കിയത്. ഈ മാസത്തില്‍ മാത്രമുണ്ടായ മണ്ണിടിച്ചില്‍ സംഭവങ്ങളില്‍ 11ല്‍ അധികം പേര്‍ക്ക് രാജ്യത്ത് ജീവന്‍ നഷ്ടമായിരുന്നു.

ജൂലൈ മാസത്തില്‍ എത്യോപ്യയുടെ തെക്കന്‍ മേഖലയിലുണ്ടായ മണ്ണിടിച്ചിലില്‍ 229 പേരാണ് കൊല്ലപ്പെട്ടത്. ജൂലൈ മൂന്നാം വാരത്തില്‍ തെക്കന്‍ എത്യോപ്യയിലെ പര്‍വ്വത പ്രദേശമായ ഗാഫയിലെ കെന്‍ഷോ-ഷാച്ച പ്രദേശത്താണ് മണ്ണിടിച്ചിലുണ്ടായത്. ശക്തമായ മഴയേ തുടര്‍ന്നായിരുന്നു ഇത്. തെരച്ചില്‍ നടക്കുന്നതിനിടെ വീണ്ടും മണ്ണിടിഞ്ഞതോടെ രക്ഷാപ്രവര്‍ത്തനത്തനത്തിന് എത്തിയവരും മണ്ണിനടിയില്‍ പെട്ടുപോയതോടെയാണ് മരണ സംഖ്യ വര്‍ദ്ധിച്ചത്.