റഷ്യയും യുക്രെയ്നും തമ്മില് ഒരു വെടിനിര്ത്തല് കരാര് ഉണ്ടായാല് യുക്രെയ്നില് ഒരു യൂറോപ്യന് യൂണിയന് സമാധാന സേനയെ സ്വാഗതം ചെയ്യുമെന്ന് ട്രംപ്
റഷ്യയും യുക്രെയ്നും തമ്മില് ഒരു വെടിനിര്ത്തല് കരാര് ഉണ്ടായാല് യുക്രെയ്നില് ഒരു യൂറോപ്യന് യൂണിയന് സമാധാന സേനയെ സ്വാഗതം ചെയ്യുമെന്ന് പറഞ്ഞിരിക്കുകയാണ് ട്രംപ്. അമേരിക്ക അതിനെ ഒട്ടും എതിര്ക്കില്ലെന്നും ഒരു തരത്തിലുള്ള സമാധാന പരിപാലന ക്രമീകരണത്തിലും അമേരിക്കന് സൈനികര് ഉള്പ്പെടില്ലെന്നും ട്രംപ് എടുത്ത് പറഞ്ഞു. കൂടാതെ യുക്രെയ്ന് സംഘര്ഷത്തിന് 'ശാശ്വതവും സുസ്ഥിരവുമായ' പരിഹാരം കണ്ടെത്തുന്നതിന് റഷ്യയ്ക്ക് മേല് ഏര്പ്പെടുത്തിയിരിക്കുന്ന ഉപരോധങ്ങള് അമേരിക്കയും സഖ്യകക്ഷികളും പരിഹരിക്കേണ്ടിവരുമെന്ന് അമേരിക്കന് സ്റ്റേറ്റ് സെക്രട്ടറി മാര്ക്കോ റൂബിയോ തുറന്ന് പറഞ്ഞു. ശത്രുത അവസാനിപ്പിച്ചതിനുശേഷം റഷ്യയുമായി സാമ്പത്തിക സഹകരണം വികസിപ്പിക്കുന്നതില് അമേരിക്കയ്ക്ക് താല്പ്പര്യമുണ്ടെന്നും അദ്ദേഹം കൂട്ടിച്ചേര്ത്തു.
റിയാദില് റഷ്യന് പ്രതിനിധി സംഘവുമായി കൂടിക്കാഴ്ച നടത്തിയ ശേഷം ദേശീയ സുരക്ഷാ ഉപദേഷ്ടാവ് മൈക്ക് വാള്ട്ട്സ്, പ്രത്യേക പ്രതിനിധി സ്റ്റീവ് വിറ്റ്കോഫ് എന്നിവരോടൊപ്പം റൂബിയോ നടത്തിയ പത്രസമ്മേളനത്തിലാണ് ഇക്കാര്യങ്ങള് പറയുന്നത്. റഷ്യയെ പ്രതിനിധീകരിച്ച് വിദേശകാര്യ മന്ത്രി സെര്ജി ലാവ്റോവ്, പ്രസിഡന്റിന്റെ വിദേശകാര്യ നയ സഹായി യൂറി ഉഷാക്കോവ്, റഷ്യന് ഡയറക്ട് ഇന്വെസ്റ്റ്മെന്റ് ഫണ്ടിന്റെ (ആര്ഡിഐഎഫ്) സിഇഒ കിറില് ദിമിട്രിവ് എന്നിവരാണ് ചര്ച്ചയില് പങ്കെടുത്തത്. യുക്രെയ്ന് സംഘര്ഷം അവസാനിപ്പിക്കാന് ലക്ഷ്യമിട്ടുള്ള സമാധാന പ്രക്രിയ നടപ്പിലാകാന് റഷ്യക്ക് മേലുള്ള ഉപരോധത്തില് ഏര്പ്പെടുത്തുന്ന ഇളവ് സഹായിക്കുമെന്ന് റൂബിയോ പറഞ്ഞു. സംഘര്ഷം അവസാനിപ്പിക്കണമെങ്കില് എല്ലാ കക്ഷികളും വിട്ടുവീഴ്ചകള് ചെയ്യേണ്ടതുണ്ടെന്ന് സ്റ്റേറ്റ് സെക്രട്ടറി പറഞ്ഞു. സാധ്യമായ ഇളവുകളെക്കുറിച്ച് അദ്ദേഹം വിശദീകരിച്ചില്ല, ഈ വിഷയം റഷ്യന് പക്ഷവുമായി ഇതുവരെ ചര്ച്ച ചെയ്തിട്ടില്ലെന്നും അദ്ദേഹം കൂട്ടിച്ചേര്ത്തു.
ഉപരോധങ്ങള് നീക്കം ചെയ്യുന്ന പ്രക്രിയയില് യൂറോപ്പിലെ അമേരിക്കയുടെ സഖ്യകക്ഷികളെയും ഉള്പ്പെടുത്തേണ്ടിവരുമെന്ന് അമേരിക്കന് ഉന്നത നയതന്ത്രജ്ഞന് അഭിപ്രായപ്പെട്ടു. അതേസമയം, എല്ലാ കക്ഷികള്ക്കും ന്യായവും സുസ്ഥിരവും സ്വീകാര്യവുമായ രീതിയില് സംഘര്ഷം അവസാനിപ്പിക്കുക' എന്നതാണ് ട്രംപ് ഭരണകൂടത്തിന്റെ ലക്ഷ്യമെന്നും യുക്രെയ്ന് സംഘര്ഷം അവസാനിപ്പിക്കുന്നത് റഷ്യയ്ക്കും അമേരിക്കയ്ക്കും ഇടയില് സാമ്പത്തിക സഹകരണത്തിന് അഭൂതപൂര്വമായ ചില അവസരങ്ങള് തുറക്കുമെന്നും റൂബിയോ കൂട്ടിച്ചേര്ത്തു.
യുക്രെയ്ന് സംഘര്ഷത്തിന് എത്രയും പെട്ടെന്ന് അവസാനമായാല് ലോകത്തിന് നല്ലതായിരിക്കുമെന്നും ദീര്ഘകാലാടിസ്ഥാനത്തില് റഷ്യ-അമേരിക്ക ബന്ധം മെച്ചപ്പെടുത്തുമെന്നും പൊതു താല്പ്പര്യമുള്ള വിഷയങ്ങളിലും സാമ്പത്തികപരമായും റഷ്യക്കാരുമായി ഭൗമരാഷ്ട്രീയമായി പങ്കാളികളാകാന് മികച്ച അവസരങ്ങള് ഉണ്ടാകുമെന്നും റൂബിയോ ചൂണ്ടിക്കാട്ടി. കഴിഞ്ഞ മൂന്ന് വര്ഷത്തിനിടെ, അമേരിക്കയും യൂറോപ്യന് യൂണിയനും റഷ്യയ്ക്കെതിരെ നിരവധി ഉപരോധങ്ങള് ഏര്പ്പെടുത്തിയിട്ടുണ്ട്. ഈ നയം മൂലം അമേരിക്കന് കമ്പനികള്ക്ക് റഷ്യന് വിപണി വിടുന്നതുമായി ബന്ധപ്പെട്ട് ഏകദേശം 300 ബില്യണ് ഡോളര് നഷ്ടമുണ്ടായതായി RDIF ഡാറ്റ പറയുന്നുണ്ട്.
https://www.facebook.com/Malayalivartha
