ഗാസയില്‍ നിന്ന് ആറു ബന്ദികളെ കൂടി ഹമാസ് വിട്ടയച്ചു. ജനുവരി 19 ന് പ്രാബല്യത്തില്‍ വന്ന ഇസ്രായേലും ഹമാസും തമ്മിലുള്ള മൂന്ന് ഘട്ട വെടിനിര്‍ത്തല്‍ കരാറിന്റെ ആദ്യ ഘട്ടത്തില്‍ മോചിപ്പിക്കപ്പെടേണ്ട 33 പേരുടെ സംഘത്തിലെ അവസാനത്തെ ജീവിച്ചിരിക്കുന്ന ബന്ദികളാണ് ഇവര്‍. 27 കാരനായ ഏലിയാ കുഹന്‍, 22 വയസ്സുള്ള ഒമര്‍ ശേം ടോവ്, 23 വയസുള്ള ഒമര്‍ വെങ്കര്‍ട്ട്, എന്നിവരെ ഉള്‍പ്പെടെയാണ് മോചിപ്പിച്ചിരിക്കുന്നത്. എന്നാല്‍ പകരം പാലസ്തീനിയന്‍ തടവുകാരായ 602 പേരെ മോചിപ്പിക്കാനുള്ള തീരുമാനത്തില്‍ നിന്ന് ഇസ്രയേല്‍ അവസാന നിമിഷം പിന്മാറി.

2023 ഒക്ടോബര്‍ ഏഴിന് തെക്കന്‍ ഇസ്രയേലില്‍ നോവ മ്യൂസിക് ഫെസ്റ്റിവല്‍ വേദിയില്‍ നിന്ന് ഹമാസ് പിടിച്ചുകൊണ്ടുപോയി ബന്ദികളാക്കിയവരെയാണ് ഇപ്പോള്‍ വിട്ടയച്ചത്. സെന്‍ട്രല്‍ ഗാസയിലെ നുസീറത്തില്‍ റെഡ് ക്രോസിനാണ് ഹമാസ് ഇവരെ കൈമാറിയത്. ബന്ദികളാക്കിയവര്‍ക്ക് പകരമായി, ഇസ്രായേല്‍ ജയിലുകളില്‍ കഴിയുന്ന 622 പലസ്തീന്‍ തടവുകാരെ മോചിപ്പിക്കുമെന്നായിരുന്നു പ്രതീക്ഷ. യുദ്ധകാലത്ത് ഇസ്രയേല്‍ സൈന്യം പിടികൂടിയ 445 ഗാസക്കാര്‍ക്കൊപ്പം ജീവപര്യന്തം തടവോ ദീര്‍ഘകാല ശിക്ഷയ്‌ക്കോ വിധിക്കപ്പെട്ട് ഇസ്രയേലിലെ ജയിലുകളില്‍ കഴിയുന്ന നൂറ്റമ്പതോളം പേരെയും സ്വതന്ത്രരാക്കാനാണ് തീരുമാനിച്ചത്. എന്നാല്‍ ഇത് അവസാന നിമിഷം മാറ്റി.