കശ്മീര്‍ പ്രശ്‌നപരിഹാരത്തിന് അമേരിക്ക ഇടപെടണമെന്ന് പാക്കിസ്ഥാന്‍ പ്രധാനമന്ത്രി നവാസ് ഷെരീഫ്. ഇത്തരം ഇടപെടലിന് ഇന്ത്യ താത്പര്യം പ്രകടിപ്പിക്കുന്നില്ലെങ്കില്‍ ലോകശക്തികള്‍ മുന്‍കൈയെടുക്കണം. ബുധനാഴ്ച യു.എസ്. പ്രസിഡന്‍റ് ബരാക് ഒബാമയുമായി വാഷിങ്ടണില്‍ കൂടിക്കാഴ്ച നടത്താനിരിക്കെയാണ് ഷെരീഫ് ഈ ആവശ്യം ഉന്നയിച്ചത്. എന്നാല്‍ ഷെരീഫിന്റെ ആവശ്യം ഇന്ത്യ തള്ളി. ഇന്ത്യ-പാക് പ്രശ്‌നം ഉഭയകക്ഷി ചര്‍ച്ചയിലൂടെ പരിഹരിക്കണമെന്നാണ് സിംല കരാറിലെ ധാരണയെന്നും മറ്റൊരു രാജ്യത്തിന്റെ ഇടപെടല്‍ ആവശ്യമില്ലെന്നും വിദേശകാര്യ മന്ത്രി സല്‍മാന്‍ ഖുര്‍ഷിദ് പ്രതികരിച്ചു. കശ്മീര്‍ ഇന്ത്യയുടെ അവിഭാജ്യഘടകമാണെന്നതില്‍ സംശയം ഉന്നയിക്കാന്‍പോലും ആര്‍ക്കും അര്‍ഹതയില്ലെന്നും ഖുര്‍ഷിദ് പറഞ്ഞു.