യുദ്ധം അവസാനിച്ചെന്ന് ഇറാന്‍. പന്ത്രണ്ട് ദിവസം നീണ്ടുനിന്ന ഇസ്രയേലുമായുള്ള യുദ്ധം അവസാനിച്ചെന്നാണ് ഇറാന്‍ പ്രസിഡന്റ് അറിയിച്ചത്. ശത്രുവിന് തക്കതായ ശിക്ഷ നല്‍കി. ഇറാനെ എതിര്‍ത്താല്‍ കനത്ത പിഴ നല്‍കേണ്ടി വരുമെന്ന് ലോകം തിരിച്ചറിഞ്ഞുവെന്നും ഇറാന്റെ കരുത്ത് സഹോദര രാജ്യങ്ങള്‍ക്കായി തുടരുമെന്നും അദ്ദേഹം പറഞ്ഞു. യുദ്ധത്തില്‍ ഇറാന്‍ ചരിത്രവിജയം നേടിയെന്നും പ്രസിഡന്റ് അവകാശപ്പെട്ടു

അതേസമയം, ഇസ്രയേലുമായുള്ള വെടിനിര്‍ത്തല്‍ കരാര്‍ ലംഘിച്ചെന്ന ആരോപണം ഇറാന്‍ നിഷേധിക്കുകയായിരുന്നു. വെടിനിര്‍ത്തല്‍ ധാരണയ്ക്ക് പിറകെ ഇറാനില്‍ നിന്ന് മിസൈല്‍ ആക്രമണമുണ്ടായതായി ഇസ്രയേല്‍ അറിയിച്ചിരുന്നു. തുടര്‍ന്ന് ഇസ്രയേലില്‍ മുന്നറിയിപ്പ് സൈറണ്‍ മുഴക്കകയും ആക്രമണത്തിനെതിരെ തിരിച്ചടിക്കാന്‍ പ്രതിരോധമന്ത്രി നിര്‍ദേശം നല്‍കുകയും ചെയ്തു. അതേസമയം, മിസൈല്‍ അയച്ചതിനു തെളിവില്ലെന്ന് ഇറാന്‍ മാധ്യമങ്ങള്‍ വ്യക്തമാക്കി. ആക്രമിച്ചാല്‍ തിരിച്ചടി ഉണ്ടാകുമെന്നും ഇസ്രയേല്‍ ഇന്നലെ ആക്രമിച്ച ഇവിന്‍ തടവറയില്‍ നിന്നുള്ള തടവുകാരെ ജയില്‍ മാറ്റിയെന്നും ഇറാന്‍ മാധ്യമങ്ങള്‍ പറയുന്നു.

ഇരു രാജ്യങ്ങളും തമ്മിലുള്ള സംഘര്‍ഷത്തിന് അയവ് വന്ന സാഹചര്യത്തില്‍ ഗള്‍ഫ് രാജ്യങ്ങളിലുണ്ടായ ഭീതി ഒഴിയുന്നു.. പൂര്‍വസ്ഥിതിയില്‍ സര്‍വീസ് തുടങ്ങി എന്ന് ഒമാന്‍ എയര്‍ . ചെറിയ വൈകലുകള്‍ മാത്രമാണ് നേരിടുന്നത്. യാത്രക്കാര്‍ക്ക് എല്ലാ പിന്തുണയും നല്‍കുന്നുവെന്നും ഒമാന്‍ എയര്‍ അറിയിച്ചു.

12 ദിവസം നീണ്ട ഇസ്രയേല്‍- ഇറാന്‍ സംഘര്‍ഷത്തിന് ശേഷം വെടിനിര്‍ത്തല്‍ നിലവില്‍ വന്നതിന് പിന്നാലെയാണ് ഇസ്രയേല്‍ വ്യോമ പാത തുറന്നത്. ഇസ്രയേല്‍ എയര്‍പോര്‍ട്ട് അതോറിറ്റിയാണ് വ്യോമപാത വീണ്ടും തുറന്നതായി വ്യക്തമാക്കിയത്.