റഷ്യയുടെ അര്‍ബുദ വാക്‌സിന്റെ മനുഷ്യരിലെ ആദ്യ പരീക്ഷണം വിജയം
കാന്‍സര്‍ രോഗത്തിനുള്ള പ്രതിരോധ വാക്സിന് എന്ററോമിക്‌സ് വാക്‌സിന്റെ മനുഷ്യരിലെ ആദ്യപരീക്ഷണം വിജയമെന്ന് റഷ്യ. പ്രാരംഭ ക്ലിനിക്കല്‍ ട്രയലുകളില്‍ നൂറുശതമാനം സുരക്ഷയും ഫലപ്രാപ്തിയും വാക്സിന് ഉറപ്പാക്കാന്‍ കഴിഞ്ഞുവെന്ന് ഗവേഷകര്‍ അവകാശപ്പെട്ടു. വാക്സിന് പരീക്ഷിച്ച രോഗികളില്‍ ട്യൂമര്‍ ചുരുങ്ങിയതായും മറ്റു പാര്‍ശ്വഫലങ്ങള്‍ കണ്ടെത്തിയില്ലെന്നും അധികൃതര്‍ പറഞ്ഞു.
കൊവിഡ് 19 വാക്സിന് സമാനമായ എം.ആര്‍.എന്‍.എ സാങ്കേതിക വിദ്യ ഉപയോഗിച്ചാണ് എന്ററോമിക്‌സ് വാക്സിന് തയ്യാറാക്കിയത്. റഷ്യയുടെ നാഷണല്‍ മെഡിക്കല്‍ റിസര്‍ച്ച് റേഡിയോളജിക്കല്‍ സെന്ററും ഏംഗല്‍ഹാര്‍ട്ട് ഇന്‍സ്റ്റിറ്റിയൂട്ട് ഓഫ് മോളിക്യുലാര്‍ ബയോളജിയും ചേര്‍ന്നാണ് വാക്സിന് വികസിപ്പിച്ചത്.
കാന്‍സര്‍ കോശങ്ങളെ തിരിച്ചറിയാനും ഉന്മൂലനം ചെയ്യാനും പ്രതിരോധ സംവിധാനത്തെ പരിശീലിപ്പിക്കുകയാണ് വാക്‌സിന്റെ ദൗത്യം. കാന്‍സറിനുള്ള പരമ്പരാഗത ചികിത്സാ രീതിയായ കീമോ തെറാപ്പിയെക്കാള്‍ സുരക്ഷിതമാണ് ഈ വാക്‌സിനെന്നും നിര്‍മ്മാതാക്കള്‍ അവകാശപ്പെടുന്നു . ആദ്യഘട്ടത്തില്‍ 48 പേരാണ് ക്ലിനിക്കല്‍ ട്രയലിന്റെ ഭാഗമായത്. തുടര്‍ പരീക്ഷണങ്ങള്‍ വിജയമായാല്‍ കാന്‍സര്‍ ചികിത്സയില്‍ കാര്യക്ഷമവും പാര്‍ശ്വഫലങ്ങള്‍ കുറഞ്ഞതുമായ ചികിത്സയ്ക്ക് എന്ററോമിക്‌സ് വഴിതുറക്കും. ഓരോ വ്യക്തിയുടെയും ട്യൂമറിന്റെ ജനിതക ഘടനയെ അടിസ്ഥാനമാക്കി പേര്‍സണലൈസ് ചെയ്ത വാക്‌സിനാണ് എന്ററോമിക്‌സ്. റഷ്യയുടെ ആരോഗ്യമന്ത്രാലയത്തിന്റെ അംഗീകാരം കൂടി വാക്സിന് നേടാനുണ്ട്.
https://www.facebook.com/Malayalivartha
