ആറുമാസം പ്രായമുള്ള പെണ്‍കുഞ്ഞിനെ ബീച്ചില്‍ തനിച്ചാക്കി പോയ ദമ്പതികള്‍ക്കെതിരെ കേസ്
മിറാമര്‍ ബീച്ചില്‍ ആറുമാസം പ്രായമുള്ള പെണ്‍കുഞ്ഞിനെ തനിച്ചാക്കി നടക്കാന്‍ പോയ ദമ്പതികളെ യുഎസ് പൊലീസ് അറസ്റ്റ് ചെയ്തു. ഹെല്‍ത്ത് കെയര്‍ മേധാവിയായ സാറാസോമേഴ്‌സ് (37), ഭര്‍ത്താവ് ബ്രയാന്‍ വില്‍കിസ് (40) എന്നിവര്‍ക്കെതിരെ കുട്ടിയെ അവഗണിച്ചതിന് പൊലീസ് കേസെടുത്തു.
കുട്ടികള്‍ക്കൊപ്പം നടക്കുന്നതിനിടയില്‍ സമയം പോയതറിഞ്ഞില്ലെന്ന് ദമ്പതികള്‍ പൊലീസിനോട് പറഞ്ഞു. വാള്‍ട്ടര്‍ കൗണ്ടി ഷെരീഫിന്റെ പൊലീസ് തങ്ങളുടെ ഫേസ്ബുക്ക് പോസ്റ്റില്‍ ഇക്കാര്യം വെളിപ്പെടുത്തി. തങ്ങള്‍ എത്തുന്നതുവരെ കുട്ടിയെ സംരക്ഷിച്ച പ്രദേശവാസികള്‍ക്ക് പൊലീസ് നന്ദി അറിയിച്ചു. അറസ്റ്റ് ചെയ്ത് അടുത്ത ദിവസം തന്നെ 1000 യുഎസ് ഡോളര്‍ പിഴ ചുമത്തി ദമ്പതികളെ വിട്ടയച്ചു.
ഒക്ടോബര്‍ 10 ന് ദമ്പതികള്‍ മറ്റ് മൂന്ന് കുട്ടികളുമായി ബീച്ചില്‍ അവധിക്കാലം ആഘോഷിക്കുന്നതിനിടെയാണ് സംഭവം. ആറു മാസമുള്ള കുഞ്ഞിനെ ബീച്ചിലെ കൂടാരത്തില്‍ തനിച്ചാക്കി മറ്റ് കുട്ടികള്‍ക്കൊപ്പം നടക്കാന്‍ പോയ ഇവര്‍ ഏകദേശം ഒരു മണിക്കൂര്‍ കഴിഞ്ഞാണ് തിരികെയെത്തിയത്. കുഞ്ഞ് തനിച്ച് കിടക്കുന്നതായി പ്രദേശവാസികളാണ് പൊലീസില്‍ പരാതിപ്പെട്ടു.
പൊലീസ് ഉടന്‍ സ്ഥലത്തെത്തിയെങ്കിലും മാതാപിതാക്കളുടെ മൊബൈല്‍ കൂടാരത്തിനുള്ളിലായതിനാല്‍ ബന്ധപ്പെടാന്‍ കഴിഞ്ഞില്ല. തിരിച്ചെത്തിയ ദമ്പതികളെ പൊലീസ് അറസ്റ്റ് ചെയുകയായിരുന്നു. ടെക്‌സാസില്‍ നിന്ന് ബന്ധുക്കള്‍ എത്തുന്നതുവരെ ഫ്‌ലോറിഡ ഡിപ്പാര്‍ട്ട്‌മെന്റ് ഓഫ് ചില്‍ഡ്രന്‍ ആന്‍ഡ് ഫാമിലീസ് എല്ലാ കുട്ടികളുടെയും താല്‍ക്കാലിക സംരക്ഷണം ഏറ്റെടുത്തിരുന്നു.
https://www.facebook.com/Malayalivartha
