വിയറ്റ്‌നാമില്‍ നിന്ന് ഹോംഗോങ്ങിലേക്ക് പോകേണ്ടിയിരുന്ന വിമാനത്തിലാണ് നാടകീയ സംഭവം അരങ്ങേറിയത്. ഡിപ്പാര്‍ച്ചല്‍ ലോഞ്ചില്‍ നിന്ന് തുടങ്ങിയ വഴക്ക് വിമാനത്തിനുള്ളിലേക്കും എത്തുകയായിരുന്നു. സംഭവത്തെ തുടര്‍ന്ന് ഒരു മണിക്കൂറോളം വൈകിയാണ് വിമാനയാത്ര ആരംഭിച്ചത്. യാത്രക്കാര്‍ക്കുണ്ടായ ബുദ്ധിമുട്ടില്‍ എയര്‍ലൈന്‍ ജീവനക്കാര്‍ ഖേദം പ്രകടപ്പിക്കുകയും ചെയ്തു.

തന്നെ ശാരീരികമായി ഉപദ്രവിച്ചുവെന്നും വേശ്യാലയങ്ങള്‍ സന്ദര്‍ശിക്കാറുണ്ടെന്നും ആരോപിച്ചാണ് യുവതി കാമുകനുമായി വാക്ക് തര്‍ക്കത്തിലേര്‍പ്പെട്ടത്. ഇക്കാര്യങ്ങള്‍ എല്ലാവരും കേള്‍ക്കെ യുവതി ഉച്ചത്തില്‍ വിളിച്ചു പറയുന്നുണ്ടായിരുന്നു. നാട്ടിലുള്ള എല്ലാവര്‍ക്കും നിങ്ങളുടെ സ്വഭാവത്തെ പറ്റി അറിയാമെന്നും യുവതി ശബ്ദമുയര്‍ത്തി പറഞ്ഞു. യുവതിയില്‍ നിന്ന് പലതവണ കാമുകന്‍ ഒഴിഞ്ഞുമാറാന്‍ ശ്രമിച്ചിട്ടും ഇയാളെ തടഞ്ഞു നിര്‍ത്തി യുവതി വഴക്ക് പറയുകയായിരുന്നു. ഇതിനിടെ തന്റെ കാമുകിക്ക് മാനസിക പ്രശ്‌നങ്ങളുണ്ടെന്നും തന്നെ വഞ്ചിച്ചുവെന്നും യുവാവും ശബ്ദമുയര്‍ത്തി ആരോപിച്ചു.

പിന്നീട് ബോര്‍ഡിംഗ് ആരംഭിച്ചതോടെ വഴക്ക് വിമാനത്തിനുള്ളിലേക്കും വ്യാപിക്കുകയായിരുന്നു. തര്‍ക്കം രൂക്ഷമായതിനെ തുടര്‍ന്ന് ഇരുവരെയും വെവ്വേറെ സീറ്റുകളിലാണ് ഇരുത്തിയത്. എന്നാല്‍ കാമുകനടുത്ത് സീറ്റ് വേണമെന്ന് യുവതി വാശി പിടിച്ചു. ജീവനക്കാര്‍ക്ക് ആവശ്യം അംഗീകരിക്കാന്‍ കഴിയാതെ വന്നതോടെ യുവതി അവരുടെ നേര്‍ക്കും തിരിഞ്ഞു. ഒടുവില്‍ തര്‍ക്കം രൂക്ഷമായപ്പോള്‍ ജീവനക്കാരിലൊരാളെ തള്ളിയിട്ടു. നിലത്ത് വീണ ജീവനക്കാരി ഉടന്‍ എഴുന്നേറ്റ് വീണ്ടും യുവതിയോട് ശാന്തയാകാന്‍ ആവശ്യപ്പെട്ടു. പിന്നീട് എല്ലാവരും തന്നെ ബുദ്ധിമുട്ടിക്കുകയാണെന്ന് പറഞ്ഞ് യുവതി വിതുമ്പി കരഞ്ഞു. അതേസമയം യുവതിക്ക് മാനസിക സ്ഥിരതയില്ലെന്ന് ജീവനക്കാരോട് കാമുകന്‍ പറയുകയും ചെയ്യുന്നുണ്ട്. പ്രശ്‌നം മറ്റു യാത്രക്കാരെയും വലച്ചതോടെ ഗ്രൗണ്ട് സ്റ്റാഫിന്റെ സഹായത്തോടെ ജീവനക്കാര്‍ കമിതാക്കളെ വിമാനത്തില്‍ നിന്ന് ഇറക്കിവിടുകയായിരുന്നു.