എന്ജിന് തകരാറിനെത്തുടര്ന്ന് ഹൈവേ റോഡില് വിമാനം ലാന്ഡ് ചെയ്ത് പൈലറ്റ്; പൈലറ്റിന്റെ മനസാന്നിദ്ധ്യം കൊണ്ട് ഒഴിവായത് വന് ദുരന്തം
ജോര്ജിയയില് എന്ജിന് തകരാറിനെത്തുടര്ന്ന് ഹൈവേ റോഡില് വിമാനം ലാന്ഡ് ചെയ്ത് പൈലറ്റ്. തിങ്കളാഴ്ച ഉച്ചയ്ക്ക് 12:10ഓടെ ജോര്ജിയയിലെ ഗെയിന്സ് വില്ലിലായിരുന്നു സംഭവം. നിയന്ത്രണം നഷ്ടമായ വിമാനം റോഡിലുണ്ടായിരുന്ന ഒന്നിലധികം വാഹനങ്ങളുമായിട്ടാണ് കൂട്ടിയിടിച്ചത്. ഗെയിന്സ് വില്ലിലെ ലീ ഗില്മര് മെമ്മോറിയല് എയര്പോര്ട്ടില് നിന്ന് പറന്നുയര്ന്ന ഉടനെയാണ് വിമാനത്തിന് എന്ജിന് തകരാര് സംഭവിച്ചത്.
വിമാനത്താവളത്തിലേക്ക് തിരിച്ചു പറക്കാന് ആവശ്യത്തിന് ഇന്ധനം ഇല്ലാത്തതിനാല് പൈലറ്റ് തിരക്കേറിയ റോഡിലേക്ക് ലാന്ഡ് ചെയ്യുകയായിരുന്നു. ഹോക്കര് ബീച്ച്ക്രാഫ്റ്റ് ബിഇ36 എന്ന ചെറുവിമാനമാണ് അപകടത്തില്പ്പെട്ടത്. റോഡില് ലാന്ഡ് ചെയ്ത ഉടനെ വിമാനത്തിന്റെ വലതുചിറക് ഒരു വാഹനത്തില് തട്ടി. ഇടിയുടെ ആഘാതത്തില് വിമാനത്തിന്റെ ഇന്ധന ടാങ്ക് ഇളകി തെറിക്കുകയും തൊട്ടടുത്തുള്ള കാറിന്റെ ഉള്ളിലേക്ക് വീഴുകയും ചെയ്തു.
അപകടത്തില് നിരവധി പേര്ക്ക് പരിക്കേറ്റു. ആരുടെയും പരിക്ക് ഗുരുതരമല്ല. വലിയൊരു ദുരന്തമാണ് പൈലറ്റിന്റെ മനസാന്നിദ്ധ്യം കൊണ്ട് ഒഴിവായത്. അപകടത്തെത്തുടര്ന്ന് മണിക്കൂറുകളോളം ഗതാഗതം തടസപ്പെട്ടു. സംഭവത്തിന്റെ വീഡിയോ സോഷ്യല് മീഡിയയില് വ്യാപകമായി പ്രചരിക്കുന്നുണ്ട്. ഫെഡറല് ഏവിയേഷന് അഡ്മിനിസ്ട്രേഷനും (എഫ്എഎ) നാഷണല് ട്രാന്സ്പോര്ട്ടേഷന് സേഫ്റ്റി ബോര്ഡും (എന്ടിഎസ്ബി) ചേര്ന്ന് അന്വേഷണം ആരംഭിച്ചു.
https://www.facebook.com/Malayalivartha
