ഇറാന്റെ ഡ്രോണ് കാരിയര് കപ്പല് തകര്ത്ത് യുഎസ്
ഇറാന് നാവിക സേനയുടെ ഡ്രോണ് കാരിയര് കപ്പല് തകര്ത്ത് അമേരിക്കന് സൈന്യം. വിമാന വാഹിനി കപ്പലുകളോളം വലിപ്പമുള്ള ഇറാന്റെ ഡ്രോണ് കാരിയര് കപ്പലാണ് യുഎസ് സൈന്യം തകര്ത്തത്. കപ്പലില് നിന്ന് പുക ഉയരുന്നതിന്റെയും സ്ഫോടനത്തിന്റെയും ദൃശ്യങ്ങളാണ് പുറത്തുവന്നിട്ടുള്ളത്. ഡ്രോണ് കാരിയര് കപ്പല് നശിപ്പിച്ചതോടെ ഇറാന്റെ നാവിക ശക്തിയെ പൂര്ണ്ണമായും ഇല്ലാതാക്കിയെന്നാണ് അമേരിക്കയുടെ വാദം. 'എപ്പിക് ഫ്യൂറി' എന്ന് പേരില് ഇറാനിയന് നാവികസേനയെ ലക്ഷ്യം വച്ചുള്ള ആക്രമണം തുടരുന്നതിനിടെയാണ് വ്യാഴാഴ്ച യുഎസ് സൈന്യം ഡ്രോണ് കാരിയര് കപ്പല് ആക്രമിച്ച് തീയിട്ടത്. രണ്ടാം ലോക മഹായുദ്ധത്തിലെ ഒരു വിമാനവാഹിനിക്കപ്പലിന്റെ വലുപ്പമുള്ള ഡ്രോണ് കാരിയര് ഞങ്ങള് തകര്ത്തുവെന്നാണ് യുഎസ് സെന്ട്രല് കമാന്ഡ് എക്സില് പോസ്റ്റ് ചെയ്തത്.
ഭരണകൂട മാറ്റം ലക്ഷ്യമിട്ട് ഇസ്രയേലും അമേരിക്കയും നടത്തുന്ന സംയുക്ത സൈനിക നീക്കങ്ങള് ഇറാന്റെ പ്രതിരോധ മേഖലയെ ആകെ തകര്ത്തിരിക്കുകയാണ്. സംഘര്ഷം ആറാം ദിവസത്തിലേക്ക് കടക്കുമ്പോള്, ഇസ്ലാമിക് റെവല്യൂഷണറി ഗാര്ഡ് കോര്പ്സിനും ഇറാനിയന് സൈന്യത്തിനുമെതിരെ അമേരിക്കന് പ്രസിഡന്റ് ഡോണള്ഡ് ട്രംപ് രൂക്ഷമായ മുന്നറിയിപ്പ് നല്കിയിരുന്നു. ആയുധങ്ങള് ഉപേക്ഷിച്ച് കീഴടങ്ങാന് തയാറാകണമെന്നും അല്ലാത്തപക്ഷം 'മരണം ഉറപ്പായിരിക്കും' എന്നാണ് ട്രംപിന്റെ മുന്നറിയിപ്പ്. 'ഇറാന് റെവല്യൂഷണറി ഗാര്ഡിലെയും പൊലീസിലെയും സൈന്യത്തിലെയും എല്ലാ അംഗങ്ങളോടും ഞാന് ഒരിക്കല് കൂടി ആഹ്വാനം ചെയ്യുന്നു, നിങ്ങളുടെ ആയുധങ്ങള് താഴെ വയ്ക്കുക. ഇപ്പോള് കീഴടങ്ങുന്നവര്ക്ക് ഞങ്ങള് പൂര്ണ്ണമായ സുരക്ഷയും നിയമപരിരക്ഷയും ഉറപ്പുനല്കുന്നു. എന്നാല് ഈ മുന്നറിയിപ്പ് അവഗണിക്കുന്നവര്ക്ക് നേരിടേണ്ടി വരുന്നത് സമ്പൂര്ണ്ണ വിനാശമായിരിക്കും' ഡൊണാള്ഡ് ട്രംപ് ഓര്മിപ്പിച്ചു.
ഇറാനിയന് ജനതയ്ക്ക് വേണ്ടി നിലകൊള്ളാനും രാജ്യം തിരിച്ചുപിടിക്കാനും സൈനികര്ക്ക് ലഭിക്കുന്ന അവസാന അവസരമാണിതെന്ന് ട്രംപ് പറഞ്ഞു. ലോകമെമ്പാടുമുള്ള ഇറാനിയന് നയതന്ത്രജ്ഞരോട് പദവികള് ഉപേക്ഷിച്ച് ശരിയായ പക്ഷത്ത് ചേരാനും ട്രംപ് ആവശ്യപ്പെട്ടു. സൈനികര്ക്ക് നല്കിയ മുന്നറിയിപ്പിന് പിന്നാലെയാണ് ഇറാനിയന് നാവികസേനയ്ക്കുണ്ടായ വന് തകര്ച്ചയുടെ ദൃശ്യങ്ങള് യുഎസ് സെന്ട്രല് കമാന്ഡ് പുറത്തുവിട്ടത്. ഇറാനിയന് നാവികസേനയ്ക്കെതിരായ സൈനിക ആക്രമണങ്ങള് യുഎസ് ശക്തമാക്കിയിട്ടുണ്ട്. ഇതുവരെ ഏകദേശം 30ലധികം ഇറാനിയന് യുദ്ധക്കപ്പലുകള് യുഎസ് സൈന്യം മുക്കുകയോ നശിപ്പിക്കുകയോ ചെയ്തിട്ടുണ്ടെന്നാണ് റിപ്പോര്ട്ടുകള്.
https://www.facebook.com/Malayalivartha
