അമേരിക്കൻ പ്രസിഡന്റ് ഡോണള്‍ഡ് ട്രംപിനെ വധിക്കുമെന്ന് ഭീഷണിപ്പെടുത്തിയെന്ന പരാതിയില്‍ മുൻ എഫ്.ബി.ഐ ഡയറക്ടർ ജെയിംസ് കോമിക്കെതിരെ കേസെടുത്തു (Donald Trump death threat).

ഇൻസ്റ്റാഗ്രാമില്‍ പങ്കുവെച്ച ഒരു പോസ്റ്റിലൂടെ കോമി വധഭീഷണി മുഴക്കിയെന്നാണ് ട്രംപ് ഭരണകൂടത്തിന്റെ കണ്ടെത്തല്‍.

എന്താണ് ’86 47′ വിവാദം?
കഴിഞ്ഞ വർഷം നോർത്ത് കരോലിനയിലെ കടല്‍ത്തീരത്ത് നിന്നും കോമി പങ്കുവെച്ച ഒരു ചിത്രമാണ് വിവാദങ്ങള്‍ക്ക് ആധാരം. കടല്‍ച്ചിപ്പുകള്‍ ഉപയോഗിച്ച്‌ മണലില്‍ “86 47” എന്ന് എഴുതിയ ചിത്രമായിരുന്നു അത്. അമേരിക്കൻ സംഭാഷണ ശൈലിയില്‍ (Slang) ’86’ എന്നാല്‍ ഒരാളെ പുറത്താക്കുകയോ അല്ലെങ്കില്‍ ‘ഇല്ലാതാക്കുകയോ’ (Eliminate) ചെയ്യുക എന്നാണ് അർത്ഥം. ട്രംപ് അമേരിക്കയുടെ 47-ാമത് പ്രസിഡന്റായതിനാല്‍, ഈ സന്ദേശം ’47-ാമനെ ഇല്ലാതാക്കുക’ എന്ന കൃത്യമായ ഭീഷണിയാണെന്ന് ഭരണകൂടം വാദിക്കുന്നു.

കോമിയുടെ പ്രതികരണം ആരോപണങ്ങള്‍ ജെയിംസ് കോമി നിഷേധിച്ചു. താൻ നിരപരാധിയാണെന്നും ആ നമ്പറുകളുടെ പിന്നിലെ ഇത്തരം അർത്ഥങ്ങളെക്കുറിച്ച്‌ അറിയില്ലായിരുന്നുവെന്നും അദ്ദേഹം പ്രതികരിച്ചു. “ഞാൻ ഇപ്പോഴും നിരപരാധിയാണ്, എനിക്ക് ഭയമില്ല. സ്വതന്ത്രമായ നീതിന്യായ വ്യവസ്ഥയില്‍ ഞാൻ വിശ്വസിക്കുന്നു,” കോമി വ്യക്തമാക്കി. അതൊരു രാഷ്ട്രീയ സന്ദേശമാണെന്ന് കരുതിയാണ് പങ്കുവെച്ചതെന്നും അക്രമത്തെ താൻ പ്രോത്സാഹിപ്പിക്കില്ലെന്നും അദ്ദേഹം കൂട്ടിച്ചേർത്തു. നേരത്തെയും ട്രംപും കോമിയും തമ്മില്‍ കടുത്ത അഭിപ്രായ വ്യത്യാസങ്ങള്‍ നിലനിന്നിരുന്നു.