യുഎസില്‍ ലാന്‍ഡ് ചെയ്യുന്നതിനിടെ ഒരു യാത്രാ വിമാനം അപകടത്തില്‍പ്പെട്ടു. ഒരു ലൈറ്റ് പോസ്റ്റ് ഇടിച്ച് തെറിപ്പിച്ച വിമാനം വിമാനത്താവളത്തിലെ ഒരു ട്രക്കിനും കാര്യമായ തകരാറുണ്ടാക്കി. 231 യാത്രക്കാരുമായി വിമാനം അപകടത്തില്‍പ്പെട്ടെങ്കിലും യാത്രക്കാര്‍ക്കാര്‍ക്കും പരിക്കില്ലെന്ന് റിപ്പോര്‍ട്ടുകള്‍ പറയുന്നു. അതേസമയം വിമാനം അപകടത്തില്‍പ്പെടുന്നതിന്റെ വീഡിയോകള്‍ സമൂഹ മാധ്യമ ഉപയോക്താക്കളെ അമ്പരപ്പിച്ചു.

മെയ് 3 ാം തിയതി വെനീസില്‍ നിന്ന് ന്യൂവാര്‍ക്കിലേക്ക് വന്ന യുണൈറ്റഡ് എയര്‍ലൈന്‍സ് വിമാനമാണ് അപകടത്തില്‍പ്പെട്ടത്. ബോയിംഗ് 767 വിമാനം ലാന്റ് ചെയ്യുന്നതിനായി റണ്‍വേയില്‍ വീലുകള്‍ മുട്ടിയ അവസാന ഘട്ടത്തിലേക്ക് അടുക്കുമ്പോളായിരുന്നു അപകടം. ന്യൂജേഴ്‌സി ടേണ്‍പൈക്കിന് മുകളിലൂടെ അസാധാരണമാംവിധം താഴ്ന്ന് പറന്ന് റോഡരികിലെ ഒരു ലൈറ്റ് പോസ്റ്റ് ഇടിച്ചിട്ടതിന് ശേഷം താഴെയുള്ള ഒരു ഡെലിവറി ട്രക്കിലും വിമാനച്ചിറക് ഇടിച്ചു. ട്രക്കിന്റെ മുന്നിലെ ഗ്ലാസ് ഇടിയുടെ ആഘാതത്തില്‍ തകര്‍ന്നു.

സിസിടിവിയുടെയും വിമാനത്തിലെ ക്യാമറയില്‍ നിന്നും, അങ്ങനെ പല ആംഗ്ലിളുകളില്‍ നിന്നുള്ള അപകടത്തിന്റെ ദൃശ്യങ്ങളാണ് ഇപ്പോള്‍ സമൂഹ മാധ്യമങ്ങളില്‍ വൈറലായത്. അപകടത്തില്‍ വാറന്‍ ബോര്‍ഡ്‌ലി എന്ന ട്രക്ക് െ്രെഡവര്‍ക്ക് നിസാര പരിക്കേറ്റു. അതേസമയം വിമാനത്തിലുണ്ടായിരുന്ന 221 യാത്രക്കാരും 10 ജീവനക്കാരും സുരക്ഷിതരായി ഇരിക്കുന്നെന്ന് റിപ്പോര്‍ട്ടുകള്‍ പറയുന്നു.

ഫെഡറല്‍ ഏവിയേഷന്‍ അഡ്മിനിസ്‌ട്രേഷനും നാഷണല്‍ ട്രാന്‍സ്‌പോര്‍ട്ടേഷന്‍ സേഫ്റ്റി ബോര്‍ഡും ഉള്‍പ്പെടെയുള്ള അധികാരികള്‍ ഔപചാരിക അന്വേഷണം ആരംഭിച്ചെന്ന് റിപ്പോര്‍ട്ടുകള്‍ പറയുന്നു. കാലാവസ്ഥ മുതല്‍ പൈലറ്റിന്റെ പ്രവര്‍ത്തനങ്ങള്‍, എയര്‍ ട്രാഫിക് കണ്‍ട്രോള്‍ നിര്‍ദ്ദേശങ്ങള്‍ വരെ എല്ലാം പരിശോധിക്കുമെന്നും റിപ്പോര്‍ട്ടുകള്‍ പറയുന്നു. സ്റ്റാന്‍ഡേര്‍ഡ് നടപടിക്രമത്തിന്റെ ഭാഗമായി എയര്‍ലൈന്‍ ജീവനക്കാരെ ഡ്യൂട്ടിയില്‍ നിന്ന് നീക്കം ചെയ്ത് കോക്ക്പിറ്റ് റെക്കോര്‍ഡിംഗുകള്‍ പോലീസ് ശേഖരിച്ചു. വീഡിയോ വൈറലായതിന് പിന്നാലെ പല കാഴ്ചക്കാരും അവിശ്വാസം പ്രകടിപ്പിച്ച് രംഗത്തെത്തി.