ബംഗ്ലാദേശില്‍ സൈനിക കലാപത്തില്‍ കുറ്റം ചെയ്‌തെന്ന് കണ്ടെത്തിയ സൈനികര്‍ക്ക് വധശിക്ഷ. ധാക്കയിലെ സെഷന്‍സ് കോടതി 152 പേരെയാണ് വധശിക്ഷക്ക് വിധിച്ചത്. 61 പേര്‍ക്ക് ജീവപര്യന്തവും 262 പേര്‍ക്ക് മൂന്ന് വര്‍ഷം മുതല്‍ പത്ത് വര്‍ഷം വരെയും തടവ് ശിക്ഷ ലഭിച്ചു. 271 പേര്‍ കുറ്റം ചെയ്തവരെന്ന് കോടതി കണ്ടെത്തി.

2009 ല്‍ നടന്ന കലാപത്തില്‍ 57 മിലിട്ടറി കമാന്‍ഡന്റുകള്‍ ഉള്‍പ്പടെ 74 പേര്‍ കൊല്ലപ്പെട്ടിരുന്നു. ബംഗ്ലാദേശിലെ സൈനികര്‍ക്കൊപ്പം വേതനവ്യവസ്ഥകള്‍ ആവശ്യപ്പെട്ടാണ് അതിര്‍ത്തി രക്ഷാസേന കലാപം ആരംഭിച്ചത്. രണ്ടു ദിവസമാണ് കലാപം നീണ്ടു നിന്നത്. സൈനിക കലാപം ബംഗ്ലാദേശില്‍ യുദ്ധസമാനമായ സാഹചര്യം സൃഷ്ടിച്ചിരുന്നു. എന്നാല്‍ നീതിയുക്തമല്ലാത്ത വിചാരണയാണ്‌ നടന്നതെന്ന്‌ ആരോപിച്ച്‌ മനുഷ്യാവകാശ പ്രവര്‍ത്തകര്‍ രംഗത്തെത്തി.