ഇറാനുമായുള്ള യുദ്ധം അവസാനിപ്പിച്ചതായി യുഎസ് പ്രസിഡന്റ് ഡൊണാള്‍ഡ് ട്രംപ്. ജോര്‍ജിയയില്‍ ഒരുറാലിയില്‍ സംസാരിക്കുന്നതിനിടെയാണ് ഇറാനുമായുള്ള യുദ്ധം അവസാനിപ്പിച്ചതായി ട്രംപ് പ്രഖ്യാപിച്ചത്. ഈ വാരാന്ത്യത്തോടെ ഇറാനുമായുള്ള കരാര്‍ പ്രാബല്യത്തില്‍ വരുമെന്നും യൂറോപ്പില്‍വെച്ച് കരാറില്‍ ഒപ്പിടുമെന്നും ട്രംപ് പറഞ്ഞിരുന്നു. അതേസമയം, അമേരിക്കയുമായി കരാറിലെത്തിയത് ഇറാന്‍ ഇതുവരെ സ്ഥിരീകരിച്ചിട്ടില്ല.

കരാറിലെത്തിയെന്ന വാര്‍ത്തകള്‍ അഭ്യൂഹങ്ങളാണെന്നും കരാറില്‍ അന്തിമ തീരുമാനമെടുത്തിട്ടില്ലെന്നുമാണ് ഇറാന്റെ വിദേശകാര്യ വക്താവ് പറഞ്ഞത്. യുദ്ധം അവസാനിപ്പിച്ചെന്ന വാര്‍ത്തകള്‍ക്ക് പിന്നാലെ ആഗോളവിപണിയില്‍ ക്രൂഡ് ഓയില്‍ വില കുറഞ്ഞു. വെള്ളിയാഴ്ച രാവിലെ എണ്ണവില ബാരലിന് 90 ഡോളറില്‍ താഴെയെത്തി. ക്രൂഡിന് ബാരലിന് 86.73 ഡോളറാണ് വെള്ളിയാഴ്ച രാവിലത്തെ വില. 1.12 ശതമാനമാണ് വിലയിടിഞ്ഞത്. ബ്രെന്റ് ക്രൂഡിന് 1.03 ശതമാനം കുറഞ്ഞ് 89.45 ഡോളറിലെത്തി.