അമേരിക്കയിലെ കാലിഫോർണിയയിൽ ട്രെക്കിങ്ങിനിടെ കാണാതായ ഇന്ത്യൻ വംശജനായ ഗവേഷക വിദ്യാർഥിയെ മരിച്ച നിലയിൽ കണ്ടെത്തി. കാലിഫോർണിയ സർവകലാശാലയുടെ സാന്റാ ബാർബറ ക്യാമ്പസിലെ (UCSB) കെമിക്കൽ എൻജിനിയറിങ് വിഭാഗത്തിലെ ഗവേഷക വിദ്യാർഥിയായ വിക്രം മുബായിയാണ് മരിച്ചത്. ട്രെക്കിങ്ങിന് പോയത് വിക്രം ഒറ്റയ്ക്കായിരുന്നു .

ഈ മാസം ഒന്നിന് രാത്രി കുടുംബവുമായി അവസാനമായി ബന്ധപ്പെട്ട വിക്രം, ട്രെക്കിങ് പാതയിലെ തന്റെ ജിപിഎസ് സ്ഥാനം (GPS coordinates) പങ്കുവെച്ചിട്ടുണ്ടായിരുന്നു. നിശ്ചയിച്ച സമയത്ത് മടങ്ങിയെത്താതിരിക്കുകയും പിന്നീട് ബന്ധപ്പെടാതിരിക്കുകയും ചെയ്തതിനെ തുടർന്ന് കുടുംബം പോലീസിൽ പരാതി നൽകുകയും ചെയ്തു. ശേഷം ഇൻയോ കൗണ്ടി സെർച്ച് ആൻഡ് റെസ്ക്യൂ സംഘവും കാലിഫോർണിയ ഹൈവേ പട്രോളും ചേർന്ന് നടത്തിയ തെരച്ചിലിലാണ് ആ​ഗസ്ത് മൂന്നിന് ഇൻയോ നാഷണൽ ഫോറസ്റ്റിൽ നിന്ന് മൃതദേഹം കണ്ടെത്തുന്നത്. സംഭവത്തിൽ അന്വേഷണം തുടരുന്നു.