ബാങ്കോക്കില്‍ എട്ടാം ക്ലാസുകാരന്‍ തോക്കുമായി എത്തി സ്‌കൂളിനുള്ളില്‍ നടത്തിയ വെടിവയ്പ്പില്‍ അദ്ധ്യാപകന്‍ കൊല്ലപ്പെട്ടു. കുട്ടികള്‍ ഉള്‍പ്പെടെ പതിനഞ്ചുപേര്‍ക്ക് പരിക്കേറ്റു എന്നാണ് സ്ഥിരീകരിക്കാത്ത റിപ്പോര്‍ട്ട്. ആക്രമണം നടത്തിയശേഷം എട്ടാംക്ലാസുകാരന്‍ സ്വയം വെടിവച്ച് മരിക്കുകയും ചെയ്തു. വിരമരിഞ്ഞ് സ്ഥലത്തെത്തിയ പൊലീസ് വിദ്യാര്‍ത്ഥികളെയും അദ്ധ്യാപകരെയും സുരക്ഷിതമായി ഒഴിപ്പിച്ചു. പരിക്കേറ്റവരുടെ നില ഗുരുതരമാണോ എന്ന് വ്യക്തമല്ല. സംഭവത്തെക്കുറിച്ച് പൊലീസ് അന്വേഷണം ആരംഭിച്ചു. വിദ്യാര്‍ത്ഥിക്ക് തോക്ക് എവിടെനിന്ന് കിട്ടി എന്നതടക്കമുള്ള കാര്യങ്ങളില്‍ കൂടുതല്‍ വ്യക്തത വരേണ്ടതുണ്ട്.

നോന്തബുരി പ്രവിശ്യയിലെ പ്രശസ്തമായ ഡെബ്‌സിരിന്‍ നോന്തബുരി സ്‌കൂളിലാണ് വെടിവയ്പ്പുണ്ടായത്. തോക്ക് ശരീരത്തില്‍ ഒളിപ്പിച്ചെത്തിയ വിദ്യാര്‍ത്ഥി മുന്നറിപ്പില്ലാതെ തുരുതുരെ വെടിവയ്ക്കുകയായിരുന്നു എന്നാണ് സ്ഥലത്തുണ്ടായിരുന്ന ചിലര്‍ പറയുന്നത്. 'ആദ്യം വെടിയുടെ ശബ്ദമാണെന്ന് തോന്നിയില്ല. സ്‌കൂള്‍ വളപ്പിനുള്ളില്‍ ആരെങ്കിലും പടക്കം പൊട്ടിച്ചതാണെന്നാണ് കരുതിയത്. തുടര്‍ച്ചയായി ശബ്ദം കേട്ടതോടെയാണ് അപകടം മണത്തത്' അക്രമം നടക്കുമ്പോള്‍ സ്‌കൂള്‍ വളപ്പിലുണ്ടായിരുന്ന ഒരാള്‍ പറഞ്ഞു.

സ്‌കൂള്‍ കെട്ടിടത്തിലെ മൂന്നാം നിലയിലാണ് അക്രമം നടത്തിയ എട്ടാംക്ലാസുകാരനെ സ്വയം വെടിവച്ച് മരിച്ചനിലയില്‍ കണ്ടെത്തിയത്. അക്രമം നടത്തിയശേഷം ഇയാള്‍ ഇവിടെ ഒളിച്ചിരിക്കുകയായിരുന്നു എന്നാണ് കരുതുന്നത്. വെടിവയ്പ്പിന് പിന്നിലെ കാരണം വ്യക്തമല്ല.