അമേരിക്കയിലെ ഒഹായോയിലുണ്ടായ വാഹനാപകടത്തിൽ ആന്ധ്രാപ്രദേശ് സ്വദേശിയായ യുവാവിന് ദാരുണാന്ത്യം. കടപ്പ ജില്ലയിലെ ജെട്ടിവരിപല്ലിയിൽനിന്നുള്ള ദിലീപ് കുമാർ (26) ആണ് മരിച്ചത്. മസഡോണിയയിലായിരുന്നു അപകടം നടന്നത്.

ദിലീപ് കുമാർ സഞ്ചരിച്ചിരുന്ന കാറിലേക്ക് എതിർദിശയിൽ വന്ന പിക്കപ്പ് ട്രക്ക് ഇടിച്ചുകയറുകയായിരുന്നു. വാഹനം ഓടിച്ചിരുന്നത് ദിലീപ് കുമാർ ആയിരുന്നെന്നാണ് പൊലീസ് നൽകുന്ന സൂചനകൾ. സംഭവസ്ഥലത്തുവെച്ചുതന്നെ ദിലീപ് മരിച്ചു. അപകടത്തിൽ പരിക്കേറ്റ മറ്റു മൂന്നുപേരെ ആശുപത്രിയിൽ പ്രവേശിപ്പിച്ചു. അപകടത്തെക്കുറിച്ച് പൊലീസ് അന്വേഷണം തുടങ്ങി.

അതേസമയം കെന്റ് സ്റ്റേറ്റ് യൂണിവേഴ്സിറ്റിയിൽ ഉപരിപഠനത്തിനായാണ് ദിലീപ് അമേരിക്കയിൽ എത്തിയത്. കഴിഞ്ഞവർഷം ​ബിരുദപഠനം പൂർത്തിയാക്കി. നിലവിൽ സോഫ്റ്റ്‌വെയർ കമ്പനിയിൽ ജോലി ചെയ്തുവരികയായിരുന്നു യുവാവ്.