അലാസ്‌കയില്‍ ചാര്‍ട്ടര്‍ വിമാനം തകര്‍ന്നുവീണ് എട്ടുപേര്‍ മരിച്ചു. അലാസ്‌ക മേഖലയിലെ ദേശീയ ഗതാഗത സുരക്ഷാ ബോര്‍ഡ് അദ്ധ്യക്ഷന്‍ ക്‌ളിന്റ് ജോണ്‍സണ്‍ അറിയിച്ചതനുസരിച്ച് രണ്ട് പൈലറ്റുമാരും ആറ് യാത്രക്കാരുമാണ് വിമാനത്തിലുണ്ടായിരുന്നത്. അപകടം നടന്നയുടന്‍ അവരെക്കുറിച്ച് വിവരമില്ല എന്നറിയിച്ചെങ്കിലും പിന്നീട് പ്രാദേശിക മാദ്ധ്യമങ്ങള്‍ അറിയിച്ചതനുസരിച്ച് അപകടത്തില്‍ പെട്ടവരെല്ലാം മരിച്ചു. കേപ് ന്യുഎന്‍ഹാമിലേക്ക് എത്തുന്നതിനിടെ വ്യാഴാഴ്ച ഉച്ചതിരിഞ്ഞാണ് അപകടം ഉണ്ടായത്. അപകടകാരണം ഇനിയും വ്യക്തമല്ല.

കഴിഞ്ഞ രണ്ട് മാസങ്ങള്‍ക്കിടെയുണ്ടാകുന്ന രണ്ടാമത് അപകടമാണിത്. ജൂണ്‍മാസത്തില്‍ യുഎസ് കോസ്റ്റ് ഗാര്‍ഡിന്റെ എംഎച്ച്60 ജെഹൊക്ക് ഹെലികോപ്റ്റര്‍ അപകടത്തില്‍പെട്ട് നാല് യാത്രക്കാര്‍ക്ക് പരിക്കേറ്റിരുന്നു. സിറ്റ്കയിലെ ഹാര്‍മര്‍ പര്‍വ്വതത്തിന്റെ സമീപത്താണ് അന്ന് അപകടമുണ്ടായത്. ഹെലികോപ്റ്ററില്‍ സൈന്യം പതിവുള്ള പരിശീലന പറക്കല്‍ നടത്തുന്നതിനിടെയാണ് അന്ന് അപകടമുണ്ടായത്.