ഈജിപ്തിൽ വൻ മയക്കുമരുന്ന് വേട്ടയുമായി ബന്ധപ്പെട്ട കേസിൽ പ്രമുഖ ടെലിവിഷൻ അവതാരക ഉൾപ്പെടെ 12 പേർക്ക് കോടതി വധശിക്ഷ വിധിച്ചു. രാജ്യത്തേക്ക് മയക്കുമരുന്ന് നിർമാണത്തിനുള്ള അസംസ്‌കൃത വസ്തുക്കൾ വൻതോതിൽ കടത്തിയ സംഘത്തിലെ അംഗങ്ങളാണ് ഇവർ. പ്രശസ്തമായ 'മിഷൻ ഇംപോസിബിൾ' എന്ന ക്രൈം ഷോയുടെ അവതാരകയായ മുപ്പത്തിയൊമ്പതുകാരി സാറാ ഖലീഫയാണ് ശിക്ഷിക്കപ്പെട്ട പ്രമുഖ വ്യക്തി.പ്രതികളിൽ നിന്ന് തോക്കുകൾ ഉൾപ്പെടെയുള്ള നിയമവിരുദ്ധ ആയുധങ്ങളും, മയക്കുമരുന്ന് നിർമാണ സാമഗ്രികൾ ഉൾപ്പെടെ 750 കിലോയോളം വരുന്ന തൊണ്ടിമുതലുകളും പോലീസ് പിടിച്ചെടുത്തിരുന്നു. എന്നാൽ തനിക്കെതിരെയുള്ള കുറ്റങ്ങളെല്ലാം സാറാ ഖലീഫ നിഷേധിച്ചിട്ടുണ്ട്. ജീവിതത്തിൽ ഇന്നുവരെ മയക്കുമരുന്ന് കണ്ടിട്ടുപോലുമില്ലെന്നും, അറസ്റ്റ് ചെയ്ത ശേഷം പോലീസ് നിർബന്ധിച്ച് ഫോട്ടോ എടുത്തപ്പോഴാണ് ഇത് ആദ്യമായി കാണുന്നതെന്നുമാണ് സാറ കോടതിയിൽ വാദിച്ചത്.

ഈജിപ്ഷ്യൻ നിയമപ്രകാരം വധശിക്ഷ സ്ഥിരീകരിക്കുന്നതിന് മുൻപായി രാജ്യത്തെ പരമോന്നത മതനേതാവായ ഗ്രാൻഡ് മുഫ്തിയുടെ ഉപദേശം തേടേണ്ടതുണ്ട്. ഇത്തരത്തിൽ ഗ്രാൻഡ് മുഫ്തിയുടെ മതപരമായ അനുമതി ലഭിച്ച ശേഷമാണ് കോടതി ഇപ്പോൾ വിധി പ്രഖ്യാപിച്ചിരിക്കുന്നത്. കേസിൽ ഡിജിറ്റൽ തെളിവുകളും ഇരുപതോളം സാക്ഷികളുടെ മൊഴികളും പ്രതികൾക്കെതിരായി കോടതി മുൻപാകെ എത്തിയിരുന്നു. അതേസമയം വിഥിക്കെതിരെ മേൽക്കോടതിയിൽ അപ്പീൽ നൽകാനാണ് സാറയുടെ പ്രതിരോധ വിഭാഗത്തിന്റെ തീരുമാനം.