ലോസ് ആഞ്ചലസില്‍ വാര്‍ത്താ റിപ്പോര്‍ട്ടിംഗിനിടെ ഹെലികോപ്റ്റര്‍ തകര്‍ന്നുവീണ് മൂന്നുപേര്‍ മരിച്ചു. രണ്ട് പേരെ പരിക്കുകളോടെ ആശുപത്രിയില്‍ പ്രവേശിപ്പിച്ചു. അമേരിക്കയിലെ ലോസ് ആഞ്ചലസ് നഗരത്തിലെ ചാറ്റ്‌സ്‌വര്‍ത്ത് മേഖലയിലാണ് അപകടം.

എന്‍ബിസി ലോസ് ആഞ്ചലസിന്റെ ന്യൂസ്‌ചോപ്പര്‍ 4 ഹെലികോപ്റ്ററാണ് അപകടത്തില്‍പ്പെട്ടത്. പ്രദേശത്തുണ്ടായ ബസ് അപകടം റിപ്പോര്‍ട്ട് ചെയ്യുന്നതിനിടെയായിരുന്നു ദുരന്തം. ഹെലികോപ്റ്ററിലുണ്ടായിരുന്ന രണ്ട് പേരും മരിച്ചതായി എന്‍ബിസി ലോസ് ആഞ്ചലസ് സ്ഥിരീകരിച്ചു. എലിയാന മൊറേനോ, ജോര്‍ജ് മാര്‍സിനിയു എന്നിവരാണ് മരിച്ചത്. ഇരുവരും തങ്ങളുടെ പ്രിയപ്പെട്ട സുഹൃത്തും സഹപ്രവര്‍ത്തകരുമായിരുന്നെന്ന് ചാനല്‍ അവതാരകര്‍ പറഞ്ഞു.

പ്രദേശത്തെ രണ്ട് വാണിജ്യ കെട്ടിടങ്ങള്‍ക്കിടയിലേക്കാണ് ഹെലികോപ്റ്റര്‍ തകര്‍ന്നുവീണത്. അപകടത്തിന് പിന്നാലെ പ്രദേശത്തുണ്ടായിരുന്ന നാല് വാഹനങ്ങള്‍ക്കും രണ്ട് സ്‌റ്റോറേജ് കണ്ടെയ്‌നറുകള്‍ക്കും തീപിടിച്ചു. എഴുപതിലേറെ അഗ്‌നിരക്ഷാസേനാംഗങ്ങളെത്തിയാണ് തീയണച്ചത്. പ്രദേശത്തുണ്ടായ വാഹനാപകടം റിപ്പോര്‍ട്ട് ചെയ്യുന്നതിനായി നിരവധി ഹെലികോപ്റ്ററുകള്‍ പറക്കുന്നുണ്ടായിരുന്നു. ഇതിനിടെയാണ് അപകടം ഉണ്ടായത്.