വീട് കാറ്റില്‍ അടയാതിരിക്കാന്‍ തടയായി വൃദ്ധ പതിറ്റാണ്ടുകളോളം ഉപയോഗിച്ചിരുന്ന വസ്തുവിന് ഇപ്പോള്‍ വില 10 കോടിയോളം. റൊമേനിയന്‍ തലസ്ഥാനമായ ബുക്കാറസ്റ്റില്‍ നിന്ന് 90 മൈല്‍ വടക്ക് കോള്‍ട്ടി എന്ന ഗ്രാമത്തിലാണ് അമ്പരപ്പിക്കുന്ന ഈ സംഭവം നടന്നത്. 1991ല്‍ മരിച്ചുപോയ ഒരു വൃദ്ധയാണ് വീട്ടില്‍ തടയായി പതിറ്റാണ്ടുകളോളം അമൂല്യമായ വസ്തു അറിയാതെ ഉപയോഗിച്ചത്. വൃദ്ധയുടെ മരണശേഷം പതിറ്റാണ്ടുകള്‍ കഴിഞ്ഞ് ഒരു ബന്ധു വീട് പരിശോധിക്കവെയാണ് ഈ വസ്തു ലഭിച്ചത്.

കോള്‍ട്ടിയിലെ അരുവിയില്‍ നിന്നും മണല്‍ നിറഞ്ഞ അതിന്റെ സമീപപ്രദേശത്ത് നിന്നും സ്ഥലവാസികള്‍ അംബര്‍ എന്ന പ്രത്യേക തരം കല്ല് ശേഖരിക്കാറുണ്ട്. ഇത്തരത്തില്‍ അരുവിയില്‍ നിന്ന് വൃദ്ധ എപ്പോഴോ ശേഖരിച്ച കല്ലിനാണ് ഇപ്പോള്‍ കോടികള്‍ വിലമതിക്കുമെന്ന് കണ്ടെത്തിയത്. ഇതിന്റെ വലിപ്പവും കാലപ്പഴക്കവുമാണ് ഇത്ര വില ഉയരാന്‍ കാരണം. ചെമ്പന്‍ നിറവും അല്‍പം കറുപ്പ് നിറവും കൂടിച്ചേര്‍ന്ന ഈ കല്ലിന് ഏകദേശം മൂന്നര കിലോ ഭാരമുണ്ടായിരുന്നു.

വീട് ലഭിച്ച വൃദ്ധയുടെ ബന്ധുവിന് അംബര്‍ കല്ലില്‍ എന്തോ പ്രത്യേകത തോന്നി. അവര്‍ ഇത് സര്‍ക്കാരിന് നല്‍കാനൊരുങ്ങി. കല്ല് വാങ്ങുംമുന്‍പ് ഭരണാധികാരികള്‍ അതെന്താണെന്ന് വിശദമായി പരിശോധിച്ചു. പോളണ്ടിലെ ക്രകോവിലെ ചരിത്ര മ്യൂസിയത്തിലേക്ക് കല്ല് അയച്ചു. മരത്തിന്റെ കറ ഫോസിലായി മാറി പിന്നീട് കട്ടിയാകുന്ന റുമനൈറ്റ് എന്ന പ്രത്യേക അംബര്‍ കല്ലാണ് ഇതെന്ന് അവിടെ തെളിഞ്ഞു. ഇതിന്റെ കാലപ്പഴക്കമാണ് വീണ്ടും ഞെട്ടിച്ചത് 38 മുതല്‍ 70 മില്യണ്‍ വര്‍ഷങ്ങള്‍ക്ക് മുന്‍പുള്ളതായിരുന്നു അത്.

റൊമേനിയ ഇതോടെ ഈ റുമനൈറ്റിനെ ദേശീയ നിധിയായി പ്രഖ്യാപിച്ചു. ബുസാവു കണ്‍ട്രി മ്യുൂസിയത്തിലേക്ക് പ്രദര്‍ശനത്തിനായി 2022ല്‍ ഇത് മാറ്റി. ഇതിന്റെ കൃത്യമായ വില നിശ്ചയിക്കപ്പെട്ടില്ലെങ്കിലും ഒരു മില്യണ്‍ ഡോളറെങ്കിലും (9.59 കോടി രൂപ) വിലയുണ്ടെന്ന് കരുതപ്പെടുന്നു. വൃദ്ധയുടെ വീട്ടില്‍ അവരുടെ മരണശേഷം കള്ളന്മാര്‍ കയറിയെങ്കിലും ഈ കോടികളുടെ വിലയുള്ള കല്ല് എടുത്തില്ല. പകരം മറ്റ് പല വസ്തുക്കളും നഷ്ടപ്പെടുകയും ചെയ്തു എന്ന കൗതുകമുണര്‍ത്തുന്ന സംഭവവും ഇവിടെയുണ്ടായി.