അമേരിക്ക യുദ്ധം ആരംഭിച്ചാല് കൂടുതല് ശക്തമായ തിരിച്ചടി നല്കുമെന്ന് ഇറാന്
അമേരിക്ക വീണ്ടും ആക്രമിച്ചാല് തിരിച്ചടി ഇന്ത്യന് മഹാസമുദ്രത്തിലേക്കും വ്യാപിപ്പിക്കുമെന്ന് ഇറാന്റെ മുന്നറിയിപ്പ്. യുദ്ധം പുനഃരാരംഭിച്ചാല് ഇന്ത്യന് മഹാസമുദ്രത്തിലുള്ള അമേരിക്കന് കപ്പലുകള് ആക്രമിക്കപ്പെടുമെന്നും ഇറാന് വ്യക്തമാക്കി. ഇറാന്റെ പരമോന്നത നേതാവ് മൊജ്തബ ഖമനേയിയുടെ മുതിര്ന്ന ഉപദേഷ്ടാവ് മേജര് ജനറല് യഹ്യ റഹീം സഫാവിയാണ് ഇക്കാര്യം അറിയിച്ചത്.
അമേരിക്ക യുദ്ധം ആരംഭിച്ചാല് കൂടുതല് ശക്തമായ തിരിച്ചടി നല്കാന് ഇറാന് തയ്യാറാണെന്ന് യഹ്യ റഹീം പറഞ്ഞു. ഇന്ത്യന് മഹാസമുദ്രത്തില് തുടരുന്ന അമേരിക്കന് കപ്പലുകള് എവിടെയായിരുന്നാലും ആക്രമിക്കുമെന്നും അതിനുള്ള ശേഷി ഇറാന് വികസിപ്പിച്ചിട്ടുണ്ടെന്നും അദ്ദേഹം വ്യക്തമാക്കി. ഹൈപ്പര്സോണിക് മിസൈലുകളുടെ വേഗം മാക് 6ല് നിന്ന് മാക് 10 ആയി ഉയര്ത്തിയതായി റസായി അവകാശപ്പെട്ടു. ഇലക്ട്രോണിക് യുദ്ധ സംവിധാനങ്ങള് കൂടുതല് ശക്തിപ്പെടുത്തിയെന്നും വ്യോമ പ്രതിരോധ സംവിധാനങ്ങള് മെച്ചപ്പെടുത്തിയെന്നും അദ്ദേഹം പറഞ്ഞു. ആവശ്യമായ സമയത്ത് മറ്റ് നടപടികളും സ്വീകരിക്കുമെന്നും അദ്ദേഹം പറഞ്ഞതായാണ് റിപ്പോര്ട്ട്.
'സംഘര്ഷം പേര്ഷ്യന് ഉള്ക്കടലില് നിന്നും ഹോര്മുസ് കടലിടുക്കില് നിന്നും ചെങ്കടലിലേക്ക് വ്യാപിച്ചിരിക്കുകയാണ്. കൂടുതല് യുദ്ധമുണ്ടായാല് അതിന് മറുപടിയായി യുദ്ധമുഖം ഇനിയും വ്യാപിക്കും. അത് ഇന്ത്യന് മഹാസമുദ്രത്തിലേക്കും അതിനപ്പുറത്തേക്കും എത്തിയേക്കാം.' മേജര് ജനറല് യഹ്യ റഹീം സഫാവി പറഞ്ഞു. പേര്ഷ്യന് ഉള്ക്കടല്, ഒമാന് ഉള്ക്കടല്, പ്രധാന സമുദ്ര വ്യാപാര പാതകള് എന്നിവ കേന്ദ്രീകരിച്ച് ഇറാനും അമേരിക്കയും തമ്മിലുള്ള സംഘര്ഷം തുടരുന്നതിനിടെയാണ് സഫാവിയുടെ പരാമര്ശം.
https://www.facebook.com/Malayalivartha
