പശ്ചിമ നേപ്പാളിലെ മനാങ് ജില്ലയില്‍ ഉണ്ടായ ഹിമപാതത്തില്‍ 10 പേരെ കാണാതായതായി റിപ്പോര്‍ട്ട്. നാലുദിവസമായി തുടരുന്ന കനത്ത മഴയും മഞ്ഞുവീഴ്ചയും രാജ്യത്തുടനീളം പ്രളയത്തിനും ഉരുള്‍പൊട്ടലിനും കാരണമായിട്ടുണ്ട്. ഞായറാഴ്ച പുലര്‍ച്ചെയാണ് 7,126 മീറ്റര്‍ ഉയരമുള്ള ഹിംലങ് ഹിമാല്‍ പര്‍വതത്തിന്റെ ബേസ് ക്യാമ്പിലുണ്ടായിരുന്ന ആളുകളെ കാണാതായത്. ദുരന്ത നിവാരണ സേനയുടെ നേതൃത്വത്തില്‍ പ്രദേശത്ത് തെരച്ചില്‍ തുടരുകയാണ്.

പ്രദേശത്ത് കനത്ത മഞ്ഞുവീഴ്ച ഉണ്ടായതിനാല്‍ ഭൂരിഭാഗം പര്‍വതാരോഹകരും പിന്മാറിയെങ്കിലും ചിലര്‍ ബേസ് ക്യാമ്പില്‍ തന്നെ തങ്ങുകയായിരുന്നു. മോശം കാലാവസ്ഥ തെരച്ചിലിനെ ബാധിക്കുന്നുണ്ട്. രണ്ട് ഹെലികോപ്ടറുകളും രക്ഷാപ്രവര്‍ത്തനത്തിനായി ഒരുക്കിയെങ്കിലും മോശം കാലാവസ്ഥയെ തുടര്‍ന്ന് പ്രവര്‍ത്തനം തടസപ്പെട്ടു. പ്രതികൂല കാലാവസ്ഥയെ തുടര്‍ന്ന് വിനോദസഞ്ചാര, പര്‍വതാരോഹണ പ്രവര്‍ത്തനങ്ങള്‍ അടിയന്തരമായി നിര്‍ത്തിവയ്ക്കാന്‍ ടൂറിസം വകുപ്പ് നിര്‍ദേശം നല്‍കിയിട്ടുണ്ട്.

അധികൃതര്‍ സ്ഥിതിഗതികള്‍ നിരീക്ഷിച്ചുവരികയാണെന്ന് നേപ്പാള്‍ ടൂറിസം ഡയറക്ടര്‍ ജനറല്‍ റാം കൃഷ്ണ ലാമിച്ചാനെ അറിയിച്ചു. കനത്ത മഴയെ തുടര്‍ന്ന് രൂപന്ദേഹി ജില്ലയിലെ തിനൗ നദി കവിഞ്ഞൊഴുകി. ബുട്‌വാളില്‍ ആറ് വീടുകള്‍ ഒലിച്ചുപോകുകയും ഒട്ടേറെ വീടുകള്‍ക്ക് നാശനഷ്ടം സംഭവിക്കുകയും ചെയ്തു.