ദക്ഷിണാഫ്രിക്കയിലെ ജൊഹന്നാസ്ബര്‍ഗിന് സമീപമുള്ള ബാറിന് പുറത്ത് എട്ടംഗ സംഘം നടത്തിയ കൂട്ടവെടിവയ്പില്‍ 17 പേര്‍ കൊല്ലപ്പെട്ടു. വെടിവയ്പില്‍ പരിക്കേറ്റ 15 പേരെ വിവിധ ആശുപത്രികളിലായി പ്രവേശിപ്പിച്ചു. വെസ്റ്റ് റാന്‍ഡ് ജില്ലയിലെ വെഡേലയില്‍ ശനിയാഴ്ച വൈകുന്നേരമാണ് വെടിവയ്പുണ്ടായത്. ജൊഹന്നാസ്ബര്‍ഗിന് സമീപമുള്ള ബാറിന് പുറത്ത് മദ്യപിച്ചുകൊണ്ടിരുന്നവര്‍ക്കുനേരെ അജ്ഞാതരായ എട്ടംഗ സംഘമെത്തി വെടിയുതിര്‍ക്കുകയായിരുന്നു.

തുടര്‍ന്ന് അക്രമികള്‍ ബാറിനുള്ളിലേക്ക് കടന്ന് അവിടെയുണ്ടായിരുന്നവര്‍ക്ക് നേരെയും വെടിയുതിര്‍ത്തതായി പൊലീസ് അറിയിച്ചു. പിസ്റ്റളുകളും എകെ47 തോക്കുകളും ഉപയോഗിച്ചാണ് അക്രമികള്‍ വെടിവയ്പ് നടത്തിയതെന്ന് പൊലീസ് പറയുന്നു. ബാറിലുണ്ടായിരുന്നവരെ പരിശോധിച്ച അക്രമികള്‍ പലരുടെയും മൊബൈല്‍ ഫോണുകള്‍ കൈവശപ്പെടുത്തി. തുടര്‍ന്ന് നമ്പര്‍ പ്ലേറ്റില്ലാത്ത രണ്ട് വാഹനങ്ങളിലായി ഇവര്‍ കടന്നുകളഞ്ഞെന്നാണ് വിവരം.

'ടേവേണിന് അകത്തും പുറത്തുമായി ആളുകള്‍ മദ്യപിച്ചുകൊണ്ടിരിക്കുകയായിരുന്നു. ഇതിനിടെയാണ് പ്രതികളെത്തി പുറത്തുണ്ടായിരുന്നവര്‍ക്ക് നേരെ വെടിയുതിര്‍ത്തത്. തുടര്‍ന്ന് ടേവേണിനുള്ളില്‍ കടന്ന അക്രമികള്‍ അവിടെയുണ്ടായിരുന്നവര്‍ക്ക് നേരെയും വെടിയുതിര്‍ക്കുകയായിരുന്നു' ദക്ഷിണാഫ്രിക്കന്‍ പൊലീസ് എക്‌സിലൂടെ അറിയിച്ചു.

കൊല്ലപ്പെട്ടവരില്‍ 13 പുരുഷന്മാരും നാല് സ്ത്രീകളും ഉള്‍പ്പെട്ടിട്ടുണ്ടെന്ന് പൊലീസ് വ്യക്തമാക്കി. വെടിവയ്പിന് പിന്നിലെ കാരണം വ്യക്തമല്ല. പ്രദേശത്തുണ്ടായിരുന്ന രണ്ട് വാഹനങ്ങള്‍ക്ക് തീയിട്ട ശേഷമാണ് അക്രമികള്‍ കടന്നുകളഞ്ഞതെന്നും പൊലീസ് അറിയിച്ചു. സംഭവത്തില്‍ ഇതുവരെ ആരും അറസ്റ്റിലായിട്ടില്ല. പ്രതികളെ കണ്ടെത്തുന്നതിനായി പ്രത്യേക സംഘത്തെ നിയോഗിച്ച് അന്വേഷണം ഊര്‍ജിതമാക്കിയതായും പൊലീസ് വ്യക്തമാക്കി.