കേരളം പ്രാർത്ഥനയോടെ കാത്തിരുന്ന ആ വാർത്ത ഒടുവിൽ ഗുജറാത്തിൽ നിന്നും എത്തിയിരിക്കുകയാണ്. കോടനാട് അഭയാരണ്യത്തിൽ നിന്നും അതീവ ഗുരുതരാവസ്ഥയിൽ വിമാനമാർഗ്ഗം വൻതാരയിലെത്തിച്ച മായ എന്ന ആനക്കുട്ടി ജീവിതത്തിലേക്ക് തിരിച്ചുവരുന്നു. വീഴ്ചയെ തുടർന്ന് അസ്ഥിക്ക് സാരമായി പരിക്കേറ്റ മായക്കുട്ടിയുടെ മൂന്ന് കാലുകളിലും വൻതാരയിലെ മെഡിക്കൽ സംഘം ഇപ്പോൾ പ്ലാസ്റ്റർ ഇട്ടിരിക്കുകയാണ്. എക്സറേ പരിശോധനയിൽ പിൻകാലിലെ എല്ലിന് പൊട്ടലുണ്ടെന്ന് കണ്ടെത്തിയതിനെ തുടർന്നാണ് ഈ അടിയന്തര നടപടി. നിലവിൽ മായയുടെ രക്തസാമ്പിളുകൾ ശേഖരിച്ച് വിശദമായ പരിശോധനയ്ക്കായി അയച്ചിട്ടുണ്ട്. ഇതിന്റെ ഫലം വരുന്നതോടെ വൻതാരയിലെ വിദഗ്ധ ഡോക്ടർമാർ അടുത്ത ഘട്ട തുടർചികിത്സകൾ ആരംഭിക്കും. ജന്മനാ ചില ശാരീരിക ബുദ്ധിമുട്ടുകൾ ഉണ്ടായിരുന്ന മായക്കുട്ടി കോടനാട്ട് വെച്ച് ഓടിക്കളിക്കുന്നതിനിടയിലാണ് വീണ് കിടപ്പിലായത്. തുടർന്ന് ജീവൻ നിലനിർത്താനുള്ള അവസാന ശ്രമമെന്ന നിലയിലാണ് ചാർട്ടേഡ് വിമാനത്തിൽ അവളെ ഗുജറാത്തിലേക്ക് എത്തിച്ചത്.