ബാലിസ്റ്റിക് മിസൈലില്‍ ഘടിപ്പിക്കാവുന്ന അണ്വായുധ പോര്‍മുന വിജയകരമായി പരീക്ഷിച്ച് ഉത്തരകൊറിയ ലോകത്തെ ഞെട്ടിച്ചു. അമേരിക്കയും ചൈനയും റഷ്യയുമെല്ലാം പരീക്ഷണത്തെ അപലപിച്ചു. ദക്ഷിണകൊറിയയും ജപ്പാനും തങ്ങളുടെ അയല്‍രാജ്യത്തിന്റെ നടപടിയില്‍ ആശങ്ക പ്രകടിപ്പിച്ചു. 

ഭൂഗര്‍ഭ പരീക്ഷണമാണു നടത്തിയത്. ഉത്തരകൊറിയയില്‍ സാധാരണയായി ആണവപരീക്ഷണങ്ങള്‍ നടത്തുന്ന പുങ്ങ്‌യെ-റിക്കു സമീപമായിരുന്നു ഇത്. റിക്ടര്‍ സ്‌കെയിലില്‍ 5.3 രേഖപ്പെടുത്തുന്ന ഭൂകമ്പം തന്മൂലം ഉണ്ടായി. ആദ്യം ഭൂകമ്പം എന്നു കരുതിയത് മണിക്കൂറുകള്‍ക്കകം അണുബോംബ് പരീക്ഷണമാണെന്നു സ്ഥിരീകരിച്ചു. 

വിജയകരമായ പരീക്ഷണത്തില്‍ ശാസ്ത്രജ്ഞരെ ഉത്തരകൊറിയന്‍ സ്വേച്ഛാധിപതി കിം ജോംഗ് ഉന്‍ അഭിനന്ദിച്ചതായി ഔദ്യോഗിക മാധ്യമങ്ങള്‍ അറിയിച്ചു. പത്തു കിലോ ടണ്‍ (പതിനായിരം ടണ്‍) ടിഎന്‍ടി (ട്രൈനൈട്രോ ടൊളുവിന്‍) പൊട്ടിച്ചാലുണ്ടാകാവുന്നത്ര സ്‌ഫോടനമാണ് ഇന്നലെ നടന്നത്. 1945-ല്‍ ഹിരോഷിമയില്‍ ഇട്ട ബോംബിന്റെ മൂന്നില്‍ രണ്ടുഭാഗം ശേഷിയാണിത്, നാഗസാക്കിയില്‍ ഇട്ട ബോംബിന്റെ പ്രഹരശേഷിയുടെ പകുതിയും. 

ജനുവരിയില്‍ ആറായിരം ടണ്‍ ശേഷിയുള്ള ഒരു ബോംബ് പരീക്ഷണം ഉത്തരകൊറിയ നടത്തിയിരുന്നു. 2013-ല്‍ 7,000 ടണ്‍ ശേഷിയുള്ളതു പരീക്ഷിച്ചിരുന്നു. 2006-ല്‍ ഉത്തരകൊറിയ ആദ്യം പരീക്ഷിച്ചത് ആയിരം ടണ്ണില്‍ താഴെ ശേഷിയുള്ള ബോംബാണ്. 

അലൂമിനിയം കവചമുള്ള മൂന്നു സ്‌കഡ് മിസൈലുകള്‍ തിങ്കളാഴ്ച ജപ്പാന്‍ കടലിലേക്ക് ഉത്തരകൊറിയ തൊടുത്തുവിട്ടിരുന്നു. അതിനു പിന്നാലെയാണ് രാജ്യത്തിന്റെ 68-ാം ദേശീയദിനത്തോടനുബന്ധിച്ച് ഈ പരീക്ഷണം. 

ജപ്പാനിലും ദക്ഷിണകൊറിയയിലും ഈ പരീക്ഷണം ആശങ്ക പടര്‍ത്തി. ലാവോസില്‍നിന്ന് അമേരിക്കയിലേക്ക് എയര്‍ഫോഴ്‌സ് വണ്‍ വിമാനത്തില്‍ യാത്രചെയ്യുമ്പോഴാണ് പ്രസിഡന്റ് ബറാക് ഒബാമ വിവരമറിയുന്നത്. ഉടനെതന്നെ ജാപ്പനീസ് പ്രധാനമന്ത്രി ഷിന്‍സോ ആബേയെയും ദക്ഷിണകൊറിയന്‍ പ്രസിഡന്റ് പാര്‍ക്ക് ഗ്യൂന്‍ ഹീയേയും ഫോണില്‍ വിളിച്ചു സംസാരിച്ചു. ദക്ഷിണകൊറിയയുടെയും ജപ്പാന്റെയും സുരക്ഷാകാര്യത്തില്‍ അമേരിക്കയുടെ പ്രതിബദ്ധത ഒബാമ ആവര്‍ത്തിച്ചു പറഞ്ഞു. 

ചൈനീസ് വിദേശമന്ത്രാലയം ആണവപരീക്ഷണത്തെ ശക്തമായി അപലപിച്ചു. ഉത്തരകൊറിയ നല്‍കിയിട്ടുള്ള വാഗ്ദാനങ്ങള്‍ പാലിക്കണമെന്ന് ആവശ്യപ്പെടുകയും ചെയ്തു. റഷ്യയും അപലപിച്ചു. ബ്രിട്ടന്‍, ജര്‍മനി തുടങ്ങിയ രാജ്യങ്ങളും ഉത്തരകൊറിയയെ വിമര്‍ശിച്ചു. കടുത്ത പ്രത്യാഘാതമുണ്ടാകുമെന്ന് അമേരിക്ക മുന്നറിയിപ്പു നല്‍കി.