ഷാന്‍ഹായില്‍ തെളിഞ്ഞത് സൗഹാര്‍ദ്ദത്തിന്റെയും സാഹോദര്യത്തിന്റെയും ദീപങ്ങള്‍, അതിര്‍ത്തികളില്‍ സംഘര്‍ഷം നിലനില്‍ക്കുമ്പോള്‍ വിദ്യാര്‍ഥികള്‍ കൊളുത്തിയത് സാഹോദര്യത്തിന്റെ തിരിനാളങ്ങള്‍
ഇന്തോ-ടിബറ്റന്‍ ബോര്‍ഡര്‍ പോലീസ് വിഭാഗത്തിനൊപ്പം ചൈനീസ് അതിര്‍ത്തിയോട് ചേര്‍ന്നുള്ള മാന ഗ്രാമത്തില്‍ വച്ച് പ്രധാനമന്ത്രി നരേന്ദ്ര മോദി ദീപാവലി ആഘോഷിച്ചതും, യുഎന്‍ ദീപാവലിക്ക് അവധി നല്‍കിയതും, വൈറ്റ് ഹൗസില്‍ ഒബാമ ദീപാവലി ആഘോഷത്തിന്റെ ഭാഗമായി തിരിതെളിയിച്ചത് വരെ വര്‍ത്തയായപ്പോള്‍ അറിയാതെ പോയത് ഒരു കൂട്ടം വിദ്യാര്‍ത്ഥികള്‍ ചൈനയില്‍ നടത്തിയ ദീപാവലി ആഘോഷം. വിവിധ രാജ്യങ്ങളിലെ യൂണിവേര്‍സിറ്റിയില്‍ നിന്നും ചൈനീസ് ഭാഷ പഠിക്കുന്നതിനായി ഷാങ്ഹായിലെത്തിയ വിദ്യാര്‍ത്ഥികളാണ് സാഹോദര്യത്തിന്റെയും സമത്വത്തിന്റെയും സന്ദേശമറിയിച്ചു കൊണ്ട് ദീപാവലി വിളക്കുകള്‍ കൊളുത്തിയത്.
ഇന്ത്യാ പാക് അതിര്‍ത്തികളില്‍ നിരന്തം വെടിനിര്‍ത്തല്‍ ലംഘനവും, ഇരു രാജ്യങ്ങള്‍ തമ്മില്‍ നിരന്തരം ആക്രമണ പ്രത്യാക്രമണങ്ങളും നടന്നു വരുമ്പോള്‍, സംഘര്‍ഷം നിലനില്‍ക്കുന്ന ഇതേ രാജ്യങ്ങളില്‍ നിന്നുമുള്ള വിദ്യാര്‍ഥികളടക്കം ചൈനയിലെ ഷാന്‍ഹായില്‍ നടത്തിയ ദീപാവലി ആഘോഷത്തിലൂടെ നല്‍കുന്ന സന്ദേശം പ്രതീക്ഷ നല്‍കുന്നത് ഭാവിയിലെ ഇന്ത്യ പാക് സൗഹാര്‍ദ്ദത്തിനാണ്. അതിര്‍ത്തിയില്‍ ഇരു രാജ്യങ്ങള്‍ തമ്മില്‍ പോരടിക്കുമ്പോള്‍ സാഹോദര്യത്തിന്റെ ദീപാവലി വിളക്കുകള്‍ തെളിയിച്ചത് ഇന്ത്യയിലെയും പാക്കിസ്ഥാനിലെയും വിദ്യാര്‍ത്ഥികള്‍ ചേര്‍ന്നായിരുന്നു.
ഷാങ്ഹായി ഇന്റര്‍ നാഷ്ണല്‍ യൂണിവേര്‍സിറ്റിയിലെ വിദ്യാര്‍ത്ഥികളാണ് കോട്ടയം കാഞ്ഞിരപ്പള്ളി സ്വദേശി ജസ്റ്റിന്‍ ജോസഫിന്റെ നേതൃത്വത്തില്‍ തിന്മയുടെ മേല്‍ നന്മയുടെ വിജയത്തിന്റെ സന്ദേശം വിളിച്ചറിയിച്ചു കൊണ്ട് ദീപാവലി ആഘോഷം നടത്തിയത്. മദ്രാസ് ഐ.ഐ.റ്റിയിലെ വിദ്യാര്‍ത്ഥികളായ ജെസ്റ്റിന്‍ ജോസഫ്, ജയശ്രീ, ജെ.എന്‍.യു വിദ്യാര്‍ത്ഥി രോഹിത് കുമാര്‍, മുംബൈ യൂണിവേര്‍സിറ്റിയിലെ സുമിത് എന്നിവരായിരുന്നു ഇന്ത്യയില്‍ നിന്നുള്ള വിദ്യാര്‍ത്ഥികള്‍. ചൈന, ബംഗ്ലാദേശ്, ഇറ്റലി, റുമേനിയ, നേപ്പാള്‍ തുടങ്ങിയ രാജ്യങ്ങളില്‍ നിന്നുമുള്ള വിദ്യാര്‍ത്ഥികളും ഇവര്‍ക്കൊപ്പം ആഘോഷത്തില്‍ പങ്കെടുത്തു. ഇന്ത്യയിലും പാകിസ്ഥാനിലും പ്രശ്ങ്ങള്‍ നിലനില്‍ക്കുമ്പോള്‍ ഈ വിദ്യാര്‍ത്ഥി കൂട്ടായ്മയില്‍ നിന്നും സമാധാനപരമായ ഭാവി ഇരു രാജ്യങ്ങളിലും വിദൂരമല്ലന്നു പ്രതീക്ഷിക്കാം.
ഇന്ത്യയിലോ പാകിസ്ഥാനിലോ അടുത്ത കാലത്തെങ്ങും ജനങ്ങള്‍ക്ക് സാധിക്കാത്ത ആഘോഷമാണ് ചൈനയിലെ ഷാന്‍ഹായില്‍ നടന്നത്. ഇരു രാജ്യങ്ങള്‍ തമ്മില്‍ സ്വരച്ചേര്‍ച്ച നിലനില്‍ക്കുന്നുണ്ടെങ്കിലും വിദ്യാര്‍ത്ഥികള്‍ ഒരുമിച്ചു നടത്തിയ ഈ ദീപാവലി ആഘോഷം ഇരു രാജ്യങ്ങള്‍ക്കും സമാധാനത്തിന്റെ സന്ദേശം നല്‍കുന്നു. മദ്രാസ് ഐഐടിയിലെ പിഎച്ഡി വിദ്യാര്‍ത്ഥിയായ ജസ്റ്റിന്‍ ജോസഫാണ് ദീപാവലി ആഘോഷങ്ങള്‍ക്ക് നേതൃത്വം നല്‍കിയത്. രാജ്യാതിര്‍ത്തികളിലെ സംഘര്‍ഷം തങ്ങളുടെ സൗഹാര്‍ദ്ദത്തിന് യാതൊരു വിധ തടസ്സവും ആയിട്ടില്ലെന്നും, ദീപാവലി ആഘോഷങ്ങള്‍ നടത്തിയതിലൂടെ സൗഹാര്‍ദ്ദത്തിന്റെ സന്ദേശമാണ് നല്കാന്‍ കഴിഞ്ഞതെന്നും ജസ്റ്റിന്‍.
https://www.facebook.com/Malayalivartha
