ഡോണള്‍ഡ് ട്രംപ് പ്രസിഡന്റായി തെരഞ്ഞെടുക്കപ്പെട്ടതിനു പിന്നാലെ അമേരിക്കയില്‍ വ്യാപക പ്രതിഷേധം. പ്രതിഷേധത്തിനിടെ ഉണ്ടായ വെടിവയ്പ്പില്‍ അഞ്ച് പേര്‍ക്ക് പരിക്കേറ്റു. ഒരാളുടെ നില ഗുരുതരമാണെന്നാണ് റിപ്പോര്‍ട്ട്. വാഷിംഗ്ടണ്‍ സ്‌റ്റേറ്റിലെ സീറ്റിലിലാണ് സംഭവം.

ട്രംപ് വിരുദ്ധ പ്രകടനത്തിനിടെയാണ് വെടിവയ്പ്പ് ഉണ്ടായത്. വാക്കു തര്‍ക്കത്തെതുടര്‍ന്നാണ് വെടിവയ്പ്പ് ഉണ്ടായതെന്ന് സീറ്റില്‍ പോലീസ് ഡിപ്പാര്‍ട്ട്‌മെന്റ് അസിസ്റ്റന്റ് ചീഫ് റോബര്‍ട്ട് മെര്‍നര്‍ പറഞ്ഞു. തര്‍ക്കത്തെത്തുടര്‍ന്ന് അക്രമി പ്രകടനം നടത്തിയവരുടെ ഇടയില്‍നിന്ന് നടന്നു നീങ്ങിയെങ്കിലും തിരിഞ്ഞുനിന്ന് വെടിയുതിര്‍ക്കുകയായിരുന്നു. വെടിവയ്പ്പിനുശേഷം ഇയാള്‍ സ്ഥലത്തുനിന്ന് രക്ഷപ്പെട്ടതായാണ് വിവരം.
ട്രംപ് പ്രതിസന്ധിയില്‍ അമേരിക്ക കത്തുന്നു. വെടിവെപ്പില്‍ 5 പേര്‍ക്ക് പരിക്ക്. ഇതല്ല എന്റെ പ്രസിഡന്റ് അമേരിക്കയിലെ തെരുവുകളില്‍ ഇപ്പോള്‍ ഉയരുന്ന മുദ്രാവാക്യങ്ങളിലൊന്നാണ് ഇത്. വൈറ്റ്ഹൗസിനു സമീപമുള്‍പ്പെടെ നിരവധിയിടങ്ങളില്‍ നിയുക്ത പ്രസിഡന്റ് ഡൊണാള്‍ഡ് ജെ ട്രംപിനെതിരെ പ്രതിഷേധ പ്രകടനങ്ങള്‍ ആരംഭിച്ചു. രാജ്യത്തിന്റെ അതിര്‍ത്തിയിലും പൗരന്‍മാര്‍ക്കിടയിലും മതില്‍ കെട്ടുന്ന പ്രസിഡന്റിനെ തങ്ങള്‍ക്ക് വേണ്ട എന്നാണ് പ്രതിഷേധക്കാര്‍ പറയുന്നത്. പ്രാദേശികസമയം ബുധനാഴ്ച രാത്രിയാണ് ട്രംപിനെതിരെ പ്രതിഷേധവുമായി ആയിരങ്ങള്‍ തെരുവിലിറങ്ങിയത്. ന്യൂയോര്‍ക്ക് നഗരത്തില്‍ 5000ത്തിലേറെ പേര്‍ പ്രതിഷേധത്തിനായെത്തിയിട്ടുണ്ടെന്നാണ് ന്യൂയേര്‍ക്ക് പൊലീസ് കണക്കാക്കിയിരിക്കുന്നത്. ന്യൂയോര്‍ക്കില്‍ തന്നെയുള്ള ട്രംപ് ടവറിനു മുന്നിലും പ്രതിഷേധം നടക്കുന്നുണ്ട്. ട്രംപ് ടവറിലേക്കുള്ള വഴി പ്രതിഷേധക്കാര്‍ തടയുന്നുണ്ട്. പലയിടങ്ങളിലും ഡൊണാള്‍ഡ് ട്രംപിന്റെ കോലം കത്തിച്ചു
എന്റെ പ്രസിഡന്റ് അല്ല എന്ന മുദ്രാവാക്യം ഉറക്കെ വിളിച്ചും ഇതുള്‍പ്പെടെയുള്ള മുദ്രാവാക്യങ്ങള്‍ രേഖപ്പെടുത്തിയ പ്ലക്കാര്‍ഡുകള്‍ കയ്യിലേന്തിയുമാണ് പ്രതിഷേധക്കാര്‍ തെരുവിലിറങ്ങിയത്. ഡെമോക്രാറ്റിക് പാര്‍ട്ടിക്ക് വലിയ സ്വാധീനമുള്ള നഗരങ്ങളിലാണ് കൂടുതല്‍ പ്രതിഷേധം. അറ്റ്‌ലാന്റ, ഓസ്റ്റിന്‍, ടെക്‌സാസ്, ബോസ്റ്റണ്‍, ഷിക്കാഗോ, ഡെന്‍വര്‍, ഫിലാഡാല്‍ഫിയ, പോര്‍ട്ട്‌ലാന്‍ഡ്, ഒറിഗണ്‍, സാന്‍ഫ്രാന്‍സിസ്‌കോ, സീറ്റ്ല്‍, വാഷിംഗ്ടണ്‍ എന്നിവിടങ്ങളിലാണ് പ്രതിഷേധം. ഡൊണാള്‍ഡ് ട്രംപ് സത്യപ്രതിജ്ഞ ചെയ്ത് അധികാരമേറ്റാല്‍ തങ്ങളുടെ കുടുംബാംഗങ്ങളും സുഹൃത്തുക്കളും നാടുകടത്തപ്പെട്ടേക്കാം എന്ന ഭയത്തിലാണ് പ്രതിഷേധക്കാരില്‍ മിക്കവരും. അടുത്ത നാല് വര്‍ഷത്തെ കുറിച്ച് ഓര്‍ക്കുമ്പോള്‍ ഭയം തോന്നുന്നു എന്നാണ് പ്രതിഷേധിക്കുന്നവരുടെ കൂട്ടത്തിലുള്ള ഒരു പെണ്‍കുട്ടി മാധ്യമങ്ങളോട് പറഞ്ഞത്. ട്രംപ് സ്ത്രീകളെ ബഹുമാനിക്കുന്ന ആളല്ല, കറുത്ത വര്‍ഗക്കാരുടേയും ലാറ്റിന്‍ വംശജരുടേയും ജീവിതം തുടങ്ങി നിരവധി കാര്യങ്ങളില്‍ ആശങ്കപ്പെടേണ്ടതായുണ്ട് എന്നും പെണ്‍കുട്ടി പറയുന്നു.