കൃത്യമായ രേഖകളില്ലാതെ രാജ്യത്ത് കഴിയുന്ന ലക്ഷക്കണക്കിനു കുടിയേറ്റക്കാരെ നാടുകടത്തുമെന്ന് നിയുക്ത യുഎസ് പ്രസിഡന്റ് ഡോണള്‍ഡ് ട്രംപ്. പ്രസിഡന്റായി ചുമതലയെടുത്തതിനുശേഷം ഏതാണ്ട് മൂന്നു മില്യണ്‍ (30 ലക്ഷത്തോളം) ആളുകളെ നാടുകടത്തേണ്ടിവരുമെന്നു ട്രംപ് ടെലിവിഷന്‍ ചാനലിന് നില്‍കിയ അഭിമുഖത്തില്‍ വ്യക്തമാക്കി. അധികാരത്തിലെത്തിയതിനുശേഷം എന്തെല്ലാം കാര്യങ്ങള്‍ ചെയ്യുമെന്നു വിശദീകരിക്കുമ്പോഴായിരുന്നു അദ്ദേഹം ഇക്കാര്യം പറഞ്ഞത്.

'ആദ്യ നടപടിയായി ഞങ്ങള്‍ ക്രിമിനല്‍ പശ്ചാത്തലമുള്ളവര്‍ ഗുണ്ടാ സംഘങ്ങള്‍ മയക്കുമരുന്നു ഇടപാടുകാര്‍ ഇങ്ങനെ നിരവധി പേരെ നാടുകടത്തും. ഏതാണ്ട് ഇത് രണ്ടു മില്യണ്‍ വരും, ചിലപ്പോള്‍ മൂന്നു മില്യണ്‍ വരെയാകും. അല്ലെങ്കില്‍ ഇത്തരം ആളുകളെ തടവിലാക്കും'- ട്രംപ് വ്യക്തമാക്കി.

മെക്‌സികോ അതിര്‍ത്തിയില്‍ ചില ഭാഗങ്ങളില്‍ മതില്‍ നിര്‍മിക്കുമെന്നും ട്രംപ് പറഞ്ഞു. പ്രസിഡന്റായി തിരഞ്ഞെടുത്തതിനുശേഷം ആദ്യമായി നല്‍കിയ അഭിമുഖത്തിലാണ് ഡോണള്‍ഡ് ട്രംപ് നിലപാടുകള്‍ വ്യക്തമാക്കിയത്.