ചൈനയിലെ ഷാങ്ഹായിയിലുള്ള സിയാവോ യു, സര്‍വകലാശാല വിദ്യാഭ്യാസത്തിനു പോയത് കൊള്ളപ്പലിശക്കാരില്‍ നിന്നും പണം വായ്പയെടുത്തിട്ടായിരുന്നു. അവളുടെയും അവളുടെ ബോയ്ഫ്രണ്ടിന്റേയും വിദ്യാഭ്യാസാവശ്യങ്ങള്‍ക്കായി 59 വിവിധ പലിശക്കാരില്‍ നിന്നുമായി 500000 യുവാന്‍ (ഏകദേശം 73,00000 ഇന്ത്യന്‍ രൂപയ്ക്കു തുല്യമായ തുക) വായ്പ എടുത്തിരുന്നു.

ചില വായ്പകളൊക്കെ ചെറിയ തുകയ്ക്കുള്ളവയായിരുന്നെങ്കിലും അവയ്‌ക്കൊക്കെ 30 ശതമാനത്തോളമായിരുന്നു പലിശ. തന്മൂലം തിരിച്ചടയ്‌ക്കേണ്ട തുക അനുദിനം വര്‍ദ്ധിച്ചു വന്നു കൊണ്ടിരുന്നു.

ഈ തുകയൊക്കെ തിരിച്ചടയ്ക്കുമെന്നതിന് ഒരു ഉറപ്പിനായി ഈട് ആയി ആ പെണ്‍കുട്ടിയുടെ നഗ്ന ചിത്രങ്ങള്‍ എടുത്ത് തരണമെന്നാണ് പലിശക്കാര്‍ ആവശ്യപ്പെട്ടത്. മറ്റു നിവൃത്തിയില്ലാതെ അവള്‍ അവളുടെ നഗ്ന ചിത്രങ്ങള്‍ എടുത്ത് അവര്‍ക്കു സമര്‍പ്പിച്ചു. എന്നാല്‍ അവള്‍ക്ക് പണം തിരിച്ചടയ്ക്കാന്‍ സാധിച്ചില്ല. അതേ തുടര്‍ന്ന് പലിശക്കാര്‍ അവളുടെ ചിത്രങ്ങള്‍ ഇന്റര്‍നെറ്റിലൂടെ പ്രചരിപ്പിക്കയായിരുന്നു. അവ വൈറലാകുകയും പതിനായിരക്കണക്കിന് ആളുകള്‍ കാണുകയും ചെയ്തു. 

അതു കൂടാതെ അവര്‍ അവളുടെ മാതാപിതാക്കളെയും സഹോദരനേയും സുഹൃത്തുക്കളേയുമൊക്കെ തരം കിട്ടുമ്പോഴൊക്കെ അപമാനിക്കുകയും ചെയ്തു കൊണ്ടിരുന്നു. എന്നിട്ടും കലിയടങ്ങാതെ അവര്‍ അവളുടെ സ്വകാര്യ വിവരങ്ങളെല്ലാം അവളുടെ സര്‍വകലാശാലയുടെ ഓണ്‍ലൈന്‍ ബുള്ളറ്റിന്‍ ബോര്‍ഡിലും പോസ്റ്റു ചെയ്തു. തുടര്‍ന്ന് അവളെ കുറിച്ച് വ്യാജ വിവരങ്ങള്‍ അതിലൂടെ പ്രചരിപ്പിക്കുവാന്‍ ആരംഭിച്ചു.

ആ യുവതിയ്ക്കും കുടുംബത്തിനും ഇത്രയധികം മാനസിക പീഡ നല്‍കിയതിനുശേഷവും അവരുടെ കാശിനായി ആവശ്യപ്പെട്ടുകൊണ്ട് മുപ്പതോളം പേര്‍ ദിവസവും അവളുടെ മാതാപിതാക്കളെ ഫോണില്‍ വിളിച്ച് ഭീഷണിപ്പെടുത്തുകയും ചെയ്യുന്നത് പതിവാക്കി.

ഒരു ഡ്രൈവറായി ജോലി നോക്കുന്ന അവളുടെ അച്ഛന്റെ പ്രതിമാസ വരുമാനം 580 ഡോളര്‍ മാത്രമാണെന്നതിനാല്‍ അതുപയോഗിച്ച് അവളുടെ വിദ്യാഭ്യാസ വായ്പ തിരിച്ചടയ്ക്കാനാവില്ലെന്നു തിരിച്ചറിഞ്ഞ മാതാപിതാക്കള്‍ അവരുടെ വീടുവിറ്റ് കടം വീട്ടാന്‍ തീരുമാനിക്കുകയായിരുന്നു. അല്ലെങ്കില്‍ ഈ തുക തിരിച്ചടയ്ക്കാനായി മകള്‍ക്ക് വേശ്യാവൃത്തിയിലേയ്ക്ക് തിരിയേണ്ടി വരുമെന്നോര്‍ത്താണ് വീടു വിറ്റ് കടം തിരിച്ചടയ്ക്കാന്‍ തീരുമാനിച്ചതെന്ന് അവളുടെ അച്ഛന്‍ പറഞ്ഞു.

പലിശക്കാര്‍ക്ക് അവരുടെ തുക നഷ്ടപ്പെടാതെ തിരിച്ചു കിട്ടി. എന്നാല്‍ അവര്‍ നഷ്ടപ്പെടുത്തിയ ആ യുവതിയുടെ മാനം ഇനി തിരിച്ചെടുത്തു നല്‍കാന്‍ അവര്‍ക്കാവുമോ, എന്നവരോടു ചോദിക്കാന്‍ ആ സാധുക്കള്‍ക്കാവില്ലല്ലോ! അതു തന്നെയാണല്ലോ ഇത്തരക്കാരുടെ ധൈര്യവും!