ഓസ്ട്രിയയില്‍ ഒരു യുവതിയെ പ്രസവിച്ച ഉടനെ കുഞ്ഞിനെ കൊലപ്പെടുത്തിയതിന് പോലീസ് അറസ്റ്റു ചെയ്തു. ബെലാറസിലെ മിന്‍സ്‌കിലുള്ള 27-കാരിയെയാണ് ഓസ്ട്രിയയില്‍ വിമാനത്താവളത്തില്‍ വച്ച് അറസ്റ്റു ചെയ്തത്. വിയന്നയിലെ ഇന്റര്‍നാഷണല്‍ എയര്‍ പോര്‍ട്ടായ ഷ്വേചറ്റ് അന്താരാഷ്ട്ര വിമാനത്താവളത്തിലെ ഒരു ജീവനക്കാരി, അവിടെയുള്ള ചവറു വീപ്പയില്‍ ഒരു നവജാത ശിശുവിന്റെ മൃതദേഹം കണ്ടെത്തിയതിനെ തുടര്‍ന്നുള്ള അന്വേഷണണമാണ് യുവതിയിലെത്തിയത്.

വെളുപ്പിനെ ഒന്നര മണിയോടെയാണ് കുഞ്ഞിന്റെ ജഡം കണ്ടെത്തിയത്. ഉടന്‍ തന്നെ വിമാനത്താവള അധികൃതര്‍ പോലീസിനെ വിളിച്ചു വരുത്തുകയായിരുന്നു. പോലീസെത്തി നടത്തിയ തെരച്ചിലിനൊടുവിലാണ് 2 മണിയോടു കൂടി വിമാനത്താവളത്തിലെ വെയിറ്റിംഗ് ഏരിയയില്‍ രക്തത്തില്‍ കുളിച്ച് യുവതി ഉറങ്ങി കിടക്കുന്നതു കണ്ടെത്തിയത്.

ബെലാറസിലെ മിന്‍സ്‌കില്‍ നിന്നും അമേരിക്കയിലെ വാഷിംഗ്ടണ്‍ ഡിസിയിലേയ്ക്ക് പറക്കുകയായിരുന്നുവെന്നും അപ്പോഴാണ് ഓസ്ട്രിയന്‍ വിമാനത്താവളത്തില്‍ അടുത്ത വിമാനത്തിനായി കാത്തിരിക്കവേ പ്രസവവേദന ആരംഭിച്ചതെന്നും ചോദ്യം ചെയ്യലിനിടെ യുവതി പോലീസുകാരെ അറിയിച്ചു.

അവിടെ വച്ചു പ്രസവിച്ച വിവരം പുറത്തറിഞ്ഞാല്‍ പിന്നെ ആശുപത്രിയിലൊക്കെ പോകേണ്ടി വരുമല്ലോ അപ്പോഴേക്കും താന്‍ കാത്തിരുന്ന വിമാനം വന്നിട്ട് തിരിച്ചു പോകുമല്ലോ എന്നു വിചാരിച്ചപ്പോള്‍ കുഞ്ഞിനെ കൂടെ കൊണ്ടു പോകാതിരുന്നാല്‍ പ്രസ്തുത വിമാനത്തില്‍ തന്നെ കയറിപ്പോകാമല്ലോ എന്നോര്‍ത്ത് കുഞ്ഞിനെ ചവറു വീപ്പയിലേയ്ക്ക് ശക്തിയോടെ വലിച്ചെറിയുകയായിരുന്നുവെന്ന് യുവതി പോലീസിനോടു പറഞ്ഞു.

കുഞ്ഞ് ജീവനില്ലാതെയാണ് ജനിച്ചതെന്നും അതിനാലാണ് അതിനെ വലിച്ചെറിഞ്ഞു കളഞ്ഞതെന്നും അവള്‍ പോലീസിനോടു പറഞ്ഞു. എന്നാല്‍ കുഞ്ഞ് മരിച്ചിട്ടുണ്ടായിരുന്നില്ലെന്നും ആശുപത്രിയില്‍ എത്തിക്കുമ്പോഴും അതിന് ജീവനുണ്ടായിരുന്നുവെന്നും അവിടെ വച്ചാണ് കുഞ്ഞ് മരിച്ചതെന്നും ഡോക്ടര്‍മാര്‍ അറിയിച്ചു.

തുടര്‍ന്ന് പ്രസവിച്ചയുടനെ കുഞ്ഞിനെ കൊല്ലാന്‍ ശ്രമിച്ചു എന്ന വകുപ്പില്‍പ്പെടുത്തി കേസ് രജിസ്റ്റര്‍ ചെയ്തിട്ടുണ്ട്. ജാമ്യം അനുവദിച്ചിട്ടില്ലാത്തതിനാല്‍ ഇപ്പോഴും അറസ്റ്റില്‍ കഴിയുകയാണ്. കുറ്റം തെളിയിക്കപ്പെട്ടാല്‍ 5 വര്‍ഷത്തോളം ജയിലില്‍ കിടക്കേണ്ടി വരും.