ബ്രസീലിയന്‍ ഫുട്‌ബോള്‍ ക്ലബിന്റെ താരങ്ങള്‍ ഉള്‍പ്പെട്ട വിമാനം കൊളംബിയയില്‍ തകര്‍ന്നു വീണ സംഭവത്തില്‍ 25 പേര്‍ മരിച്ചതായി സൂചന. വിമാനത്തിലെ ആറു പേരെ രക്ഷപ്പെടുത്തിയിട്ടുണ്ടെന്നും ഇവിടെ രക്ഷാപ്രവര്‍ത്തനം പുരോഗമിക്കുന്നതായുമാണ് റിപ്പോര്‍ട്ട്. ഫുട്‌ബോള്‍ താരങ്ങള്‍ ഉള്‍പ്പെടെ 72 യാത്രക്കാരും ഒന്‍പതു ക്രൂവുകളും വിമാനത്തില്‍ ഉണ്ടായിരുന്നു. അപകട സമയത്ത് തന്നെ പരിക്കേറ്റ പത്തു പേരെ ആശുപത്രിയിലേക്ക് മാറ്റിയിരുന്നതായി വിവരം പുറത്തു വന്നിരുന്നു. ബ്രസീലിലെ സാവോപോളോയില്‍ നിന്നും പ്രാദേശിക സമയം ഉച്ചയ്ക്ക് ശേഷം 3.45 ന് പുറപ്പെട്ട വിമാനം കൊളംബിയയിലെ മെഡലിയന്‍ അന്താരാഷ്ട്ര വിമാനത്താവളത്തിന് സമീപം മലനിരയില്‍ തകര്‍ന്നു വീഴുകയായിരുന്നു.

അതേസമയം വിമാനത്തില്‍ ഇന്ധനമില്ലായിരുന്നു എന്ന ആദ്യം പുറത്തു വന്ന റിപ്പോര്‍ട്ടുകള്‍ സ്ഥിരീകരിച്ചിട്ടില്ല. അപകടം സംബന്ധിച്ച കൂടുതല്‍ വിവരങ്ങള്‍ പുറത്തുവരുന്നതേയുള്ളൂ.
സൗത്ത് അമേരിക്കന്‍ ഫുട്‌ബോള്‍ ചാമ്ബ്യന്‍ഷിപ്പിനായി പോയ ബ്രസീലിയന്‍ ക്ലബ് ഷാപ്പേകോണ്‍സ് സോക്കര്‍ടീം വിമാനത്തില്‍ ഉണ്ടായിരുന്നു. രക്ഷപ്പെട്ടവരില്‍ ഷാപ്പേകോണ്‍സിന്റെ പ്രതിരോധക്കാരന്‍ അലന്‍ റുസ്ച്ചലും ഉണ്ട്. ഇദ്ദേഹത്തെ തൊട്ടടുത്ത ആശുപത്രിയിലേക്ക മാറ്റിയിട്ടുണ്ട്.

ഗോളി മാര്‍ക്കോസ് ഡാനിലോ, മറ്റൊരു കളിക്കാരന്‍ ജാക്‌സണ്‍ ഫോള്‍മാന്‍ എന്നിവരും രക്ഷപ്പെട്ടിട്ടുണ്ട്. വെനസ്വേലിയന്‍ വിമാന കമ്പനിയായ ലാമിയയുടെ വിമാനമാണ് അപകടത്തില്‍ പെട്ടത്. ബ്രസീലില്‍ നിന്നും പുറപ്പെട്ട വിമാനം ഇന്ധനം തീര്‍ന്നുപോയതാണ് കാരണമെന്ന സ്ഥിരീകരിക്കാത്ത റിപ്പോര്‍ട്ടുണ്ട്. സൗത്ത് അമേരിക്കന്‍ ഫുട്‌ബോള്‍ ചമ്പ്യാന്‍ഷിപ് ഫൈനല്‍ കളിക്കാന്‍ പോയതാണ് ബ്രസീലിയന്‍ ടീം.

കൊളംബിയയിലെ അത്‌ലറ്റിക്കോ നാഷണല്‍ ക്ലബിനെതിരേ ബുധനാഴ്ചയാണ് മത്സരം. നോക്കൗട്ട് രീതിയില്‍ സംഘടിപ്പിച്ചിരിക്കുന്ന ടൂര്‍ണമെന്റിലെ ജേതാക്കള്‍ തെക്കേ അമേരിക്കയിലെ വലിയ ഫുട്‌ബോള്‍ ചമ്പ്യാന്‍ഷിപ്പായ ലിബര്‍ട്ടിഡോറസില്‍ കളിക്കാന്‍ അര്‍ഹത നേടുമെന്നതാണ് പ്രത്യേകത. അതേസമയം അപകടത്തില്‍ പെട്ട ക്ലബിനൊപ്പം ബ്രസീല്‍ ദേശീയ ടീമിലെ താരങ്ങള്‍ ആരും തന്നെ ഇല്ലെന്നാണ് വിവരം. അതേസമയം ജൂനിയര്‍ ടീമിലെ ഏതാനും താരങ്ങളുണ്ടെന്നും കേള്‍ക്കുന്നു. അടുത്ത മാസം 7 നാണ് ബ്രസീലില്‍ ടീമിന്റെ ഫൈനലിന്റെ ഹോം മാച്ച്. അപകടത്തെ തുടര്‍ന്ന് മത്സരം റദ്ദാക്കിയിട്ടുള്ളതായിട്ടാണ് വിവരം.