ചൈനയിലെ ഷെങ്‌സൂ പ്രദേശത്തെ ബാങ്കുകളെല്ലാം അതിനിശിത വിമര്‍ശനത്തെ നേരിടുകയാണ്. 25-കാരനായ ഒരു യുവാവിന് വായ്പ നിഷേധിച്ചതാണ് കാരണം.

ഷെങ്‌സൂവിലുള്ള വൂജിയാന്‍ പിങ് എന്ന യുവാവാണ് വാര്‍ത്താ പ്രാധാന്യം നേടിയത്. 25-കാരനായ വൂ വിന് 5 വയസ്സുണ്ടായിരുന്നപ്പോള്‍ ഒരു അപകടത്തില്‍പെട്ട് തന്റെ രണ്ടു കൈകളും നഷ്ടമായതാണ്. വൈദ്യുതാഘാതമേറ്റ് ആശുപത്രിയിലെത്തിച്ച ആ അഞ്ചു വയസ്സുകാരന്റെ ജീവന്‍ രക്ഷിക്കണമെങ്കില്‍ അവന്റെ ഇരു കൈകളും മുറിച്ചു മാറ്റണമെന്നായിരുന്നു അന്ന് ഡോക്ടര്‍മാര്‍ നിര്‍ദ്ദേശിച്ചത്. അതിനനുസൃതമായാണ് വ്യൂയുടെ ഇരുകൈകളും അന്ന് അഞ്ചാം വയസ്സില്‍ നീക്കം ചെയ്തത്.

എന്നാല്‍ ആ പരിമിതി ജീവിത വിജയം നേടുന്നതില്‍ നിന്നും അയാളെ തടഞ്ഞില്ല. കഠിനാധ്വാനവും സ്ഥിരോത്സാഹവും അയാളെ സ്വയം പര്യാപ്തനാക്കി. അടുത്തിടെ ഒരു വീട് സ്വന്തമാക്കാനായി അഡ്വാന്‍സ് തുക സംഭരിക്കാന്‍ ഇത്രനാളത്തെ അധ്വാനം കൊണ്ട് അയാള്‍ക്കു കഴിഞ്ഞു. എന്നാല്‍ വീട് സ്വന്തമാക്കണമെങ്കില്‍ അല്പം കൂടി ധനം ആവശ്യമായിരുന്നു. അതിനായി ബാങ്കില്‍ നിന്നും വായ്പ എടുക്കാം എന്നാണ് വൂ കരുതിയത്.

എന്നാല്‍ വായ്പയ്ക്കുള്ള അപേക്ഷയുമായി വൂ സന്ദര്‍ശിച്ച ഓരോ ബാങ്കും അയാള്‍ക്ക് വായ്പ അനുവദിക്കാന്‍ നിവൃത്തിയില്ല എന്നറിയിക്കുകയായിരുന്നു. അതിന് അവര്‍ പറഞ്ഞ കാരണമാണ് നാട്ടുകാരുടെ മുഴുവന്‍ എതിര്‍പ്പിന് ഇടയാക്കിയിരിക്കുന്നത്. ബാങ്ക് നടപടികളുടെ ഭാഗമായി വായ്പ അനുവദിക്കുന്ന ആളിന്റെ വിരലടയാളം പതിപ്പിച്ചു വാങ്ങി സൂക്ഷിക്കണമമെന്ന് നിബന്ധനയുണ്ടത്രേ. എന്നാല്‍ വൂവിന് കൈകള്‍ ഇല്ലാത്തതിനാല്‍ വിരലുകളുമില്ലല്ലോ? അപ്പോള്‍ വിരലടയാളം എടുക്കാനാവില്ല എന്ന കാരണത്താലാണ് വായ്പ നിഷേധിച്ചത്.

വൂ ജിയാന്‍പിങ് വായ കൊണ്ട് പേന കടിച്ചു പിടിച്ചാണ് ഒപ്പിടുന്നത്. കൈയ്യൊപ്പുകള്‍ ആര്‍ക്കു വേണമെങ്കിലും പെട്ടെന്ന് അനുകരിക്കാനാവുമെന്നും തന്മൂലം തട്ടിപ്പുകള്‍ നടക്കാന്‍ സാധ്യതയുണ്ടെന്നുമുള്ള കാരണം കൊണ്ടാണ് വിരലടയാളം വേണമെന്ന് നിഷ്‌കര്‍ഷിക്കുന്നതെന്നാണ് ബാങ്ക് അധികൃതര്‍ പറയുന്നത്.

ഇത് നാട്ടുകാരെ മുഴുവന്‍ അരിശം കൊള്ളിച്ചിരിക്കുകയാണ്. വിരലടയാളമില്ലാതെ തന്നെ അയാള്‍ക്ക് വായ്പ അനുവദിക്കണമായിരുന്നുവെന്നും അല്ലെങ്കില്‍ വിരലടയാളത്തിനു പകരമായി അയാളുടെ കാല്‍പാദങ്ങളെ രേഖയായി ഉപയോഗിക്കാമായിരുന്നു എന്നുമൊക്കെയുള്ള വിവിധ ആശയങ്ങള്‍ ഉയര്‍ന്നു വരുന്നുണ്ട്.

ജിയാന്‍ പിംഗിനെ പോലെയുള്ളവര്‍ക്കായി നിയമങ്ങളില്‍ ഇളവ് അനുവദിക്കുന്നതില്‍ യാതൊരു അപാകതയുമില്ലെന്നാണ് തങ്ങള്‍ കരുതുന്നതെന്ന് ഷെങ്‌സൂവിലെ ഹൗസിംഗ് മാനേജ്‌മെന്റ് ബ്യൂറോ അഭിപ്രായപ്പെട്ടു