ബ്രസീലിയന്‍ ക്ലബ് ഫുട്‌ബോള്‍ ടീമുമായി തകര്‍ന്നു വീണ വിമാനം തകരാന്‍ കാരണമായത് ഇന്ധനം തീര്‍ന്നതു തന്നെയാണെന്ന സംശയം ബലപ്പെടുന്നു. വിമാനം നിയന്ത്രിച്ചിരുന്ന പൈലറ്റിന്റെ അവസാനത്തെ സംഭാഷണം പുറത്തുവന്നു. വിമാനത്തില്‍ നിന്നുള്ള അവസാനത്തെ സന്ദേശവും ഇതുതന്നെയായിരുന്നു. വിമാനത്തില്‍ ഇന്ധനം ഇല്ലെന്ന സന്ദേശമാണ് സംഭാഷണത്തില്‍ അടങ്ങിയിരിക്കുന്നത്. വിമാനം തകരാന്‍ പോകുകയാണെന്ന സൂചനയും ഇതിലുണ്ട്.
ഇന്ധനമില്ല, റഡാറില്ല, ഞങ്ങള്‍ താഴേയ്ക്ക് പോകുന്നു, ഇതായിരുന്നു വിമാനത്തില്‍ നിന്നുള്ള പൈലറ്റിന്റെ അവസാന വാക്കുകള്‍. മിഗ്വേല്‍ അലക്‌സാണ്ട്രോ മുറകാമി എന്ന പൈലറ്റായിരുന്നു വിമാനം നിയന്ത്രിച്ചിരുന്നത്. കൂടെയുണ്ടായിരുന്ന സഹപൈലറ്റ് യുവാന്‍ സെബാസ്റ്റ്യന്‍ ഉപുഗേയിയുമായുള്ള പ്രധാന പൈലറ്റിന്റെ സംഭാഷണമാണ് പുറത്തുവന്നിട്ടുള്ളത്. ഇന്ധനം തീരുകയാണെന്ന് സഹപൈലറ്റിനോടാണ് മിഗ്വേല്‍ പറയുന്നത്. പൂര്‍ണമായും നമ്മള്‍ ഇലക്ട്രോണിക് ഫെല്യൂറിലാണെന്നും പൈലറ്റ് പറയുന്നു. ജിപിഎസ് വര്‍ക്ക് ചെയ്യുന്നില്ല. എന്താണ് സംഭവിക്കുന്നതെന്ന് അറിയില്ലെന്നും പറയുന്നതായി സംഭാഷണത്തില്‍ നിന്നു വ്യക്തമാണ്.
നമ്മള്‍ താഴേക്ക് പോകുകയാണ.് രക്ഷിക്കണേ എന്ന് അലറി വിളിക്കുന്നുണ്ട്. 1000 അടി ഉയരത്തില്‍ ആണെന്നും റഡാര്‍ കോണ്ടാക്ട് ഇല്ലെന്നും പറയുന്നുണ്ട്. വിമാനം താഴേയ്ക്ക് പതിക്കുന്നതിന് മുമ്പുള്ള ശബ്ദ സന്ദേശമാണ് ഇതെന്നാണ് കരുതുന്നത്. ഇന്ധനം തീര്‍ന്നു പോയതാണ് അപകട കാരണമെന്ന വാദത്തിന് ബലം പകരുന്നതാണ് ഈ റിപ്പോര്‍ട്ടുകള്‍. എന്നാല്‍, ഇക്കാര്യത്തില്‍ തിടുക്കത്തില്‍ ഒരു അഭിപ്രായപ്രകടനം നടത്തേണ്ടതില്ലെന്ന നിലപാടിലാണ് കൊളംബിയ. രക്ഷപ്പെട്ടവര്‍ എന്തെങ്കിലും തരത്തിലുള്ള മൊഴി നല്‍കി ഒരു സ്ഥിരീകരണം വരും വരെ മൗനം പാലിക്കാനാണ് കൊളംബിയന്‍ വ്യോമമന്ത്രാലയത്തിന്റെ തീരുമാനം.
ഒരുപക്ഷേ ഇന്ധനടാങ്കില്‍ തീ പിടിച്ചതിനെ തുടര്‍ന്ന് വിമാനം ദ്രുതഗതിയില്‍ ലാന്‍ഡിംഗിനു ശ്രമിച്ചതാണോ എന്ന സംശയവും ബാക്കി നില്‍ക്കുകയാണ്. ബൊളീവിയയിലെ സാന്റാ ക്രൂസില്‍ നിന്നും കൊളംബിയയിലെ മെഡെലിനിലേക്ക് പോയ വിമാനമായിരുന്നു. സാധാരണഗതിയില്‍ 1,900 മൈല്‍ സഞ്ചരിക്കാനുള്ള ഇന്ധനം വിമാനത്തില്‍ കുറവായിരുന്നെന്നു വേണം കരുതാന്‍. കൊളംബിയന്‍ തലസ്ഥാനമായ ബഗോട്ടയില്‍ ഇറങ്ങേണ്ട വിമാനത്തിന് അത്രയും ദൂരം സഞ്ചരിക്കാന്‍ കപ്പാസിറ്റി ഇല്ലാതിരുന്നതിനാലാണ് മെഡെലിനില്‍ ഇറക്കാന്‍ ശ്രമിച്ചതെന്നും ഇതിനു തൊട്ടടുത്ത് വെച്ച് ഇന്ധനം തീര്‍ന്നതായിരിക്കാമെന്നും വാദം ഉയരുന്നുണ്ട്