നേപ്പാള് ഉന്നം വച്ച് ചൈന; ചരക്ക് നീക്കം തകൃതിയാക്കി
നേപ്പാള് വിപണികളില് വര്ഷങ്ങളായി തുടരുന്ന ഇന്ത്യന് ആധിപത്യത്തിന് തിരിച്ചടിയാകുന്ന തരത്തില് ചൈനയില് നിന്ന് വന്തോതില് ചരക്കുകള് കാഠ്മണ്ഡുവിലേക്ക് തിരിച്ചു. ഏകദേശം 18000 കോടിയോളം മൂല്യം വരുന്ന ചരക്കുകളാണ് നേപ്പാളിലേക്ക് തിരിച്ചത്. നിത്യോപയോഗ സാധനങ്ങള്, ഇലക്ട്രോണിക് സാധനങ്ങള് എന്നിവയാണ് പ്രധാനമായും ചരക്ക് വാഹനങ്ങളില് ഉള്ളത്.
ടിബറ്റിലെ ഷിഗ്സെയില് നിന്ന് കാഠ്മണ്ഡുവിലേക്ക് ചൈന നിര്മിച്ച ഹൈവേ വഴിയാണ് ചരക്കുകളുമായി വാഹനങ്ങള് എത്തുക. 860 കിലോമീറ്റര് നീളമാണ് ഈ പാതയ്ക്കുള്ളത്. ചൈനീസ് പ്രവിശ്യയായ ഗ്വാങ്ടോങ്ങില് നിന്ന് 5200 കിലോമിറ്റര് ദൂരം ട്രയിന് മാര്ഗമാണ് ടിബറ്റിലെ ഷിഗ്സെ നഗരത്തിലേക്ക് ചരക്കുകള് എത്തിച്ചത്.
ഇവിടെ നിന്ന് ട്രക്കുകള് മുഖേന നേപ്പാളിലേക്ക് ഇവ എത്തിക്കും. ഇത്രയും ദൂരം ചരക്ക് കൊണ്ടുപോകുന്നതിനാല് നേപ്പാള് മാര്ക്കറ്റില് ചൈനീസ് ഉത്പന്നങ്ങള്ക്ക് വിലകൂടാതിരിക്കാന് ഇവയ്ക്ക് ചൈനീസ് സര്ക്കാര് സബ്സിഡി നല്കുമെന്നാണ് വിവരം. ഇന്ത്യന് ഉത്പന്നങ്ങളോട് മത്സരിക്കാന് ചൈനീസ് ഉത്പന്നങ്ങളെ പ്രാപ്തമാക്കുകയാണ് ലക്ഷ്യം.
2005 മുതല് ഇരുരാജ്യങ്ങളും വാണിജ്യബന്ധം ശക്തമാക്കിയതിന് ശേഷം ചൈനയില് നിന്ന് നേപ്പാളിലേക്ക് നടക്കുന്ന ഏറ്റവും വലിയ കയറ്റുമതിയാണ് ഇത്. വാര്ത്താ വിനിമയം, ചരക്കു കൈമാറ്റം, ഇന്ധനം തുടങ്ങിയവയ്ക്ക് നേപ്പാള് അമിതമായി ഇന്ത്യയെ ആയിരുന്നു ആശ്രയിച്ചിരുന്നത്. ഇതിന് അറുതി വരുത്താനുള്ള നീക്കങ്ങള് ചൈന കഴിഞ്ഞ കുറേക്കാലമായി നടത്തിവരികയായിരുന്നു. ചൈനയില് നിന്ന് ചരക്ക് നീക്കം ആഴ്ചയില് രണ്ട് തവണയാണ് ഇപ്പോള് ലക്ഷ്യമിടുന്നത്. എന്നാല് ഭാവിയില് ഇത് ആഴിചയില് അഞ്ചായി ഉയര്ന്നേക്കാം.
കഴിഞ്ഞ ആഴ്ച നേപ്പാള് ചൈനയുമായി ചരക്ക് കൈമാറ്റത്തിനുള്ള കരാര് ഒപ്പുവെച്ചിരുന്നു. മാത്രമല്ല നേപ്പാള് ടെലികോം ചൈനീസ് ടെലികോമിന്റെ സംവിധാനങ്ങള് ഉപയോഗിക്കാനുള്ള കരാറും കഴിഞ്ഞ മാസം ഒപ്പുവെച്ചിരുന്നു. മേഖലയിലേക്ക് റെയില് പാത കൊണ്ടുവരാനുള്ള പരിശ്രമത്തിലാണ് ചൈന. ഇതുകൂടി വന്നാല് നേപ്പാളില് ഇന്ത്യയുടെ സ്വാധീനത്തിന് വലിയ തിരിച്ചടിയാണ് ഉണ്ടാവുക.
https://www.facebook.com/Malayalivartha
