ഐഎസിന് എന്നും പേടിസ്വപ്‌നമായി ഒരു പുലിക്കുട്ടി. ആഗോള ഭീകര സംഘടനയായ ഇസ്ലാമിക് സ്‌റ്റേറ്റിനെതിരെ പോരാടാന്‍ കുര്‍ദ്ദ് സേനയ്‌ക്കൊപ്പം തോക്കെടുത്ത് ഇറങ്ങിയ ഡെന്മാര്‍ക്ക് സ്വദേശിനിയായ ജെവാന പലാനി(23) യെ വധിക്കുന്നവര്‍ക്ക് ഐഎസ് ആറു കോടി രൂപ പാരിതോഷികം പ്രഖ്യാപിച്ചു. ഓണ്‍ലൈന്‍ വഴിയും സോഷ്യല്‍ മീഡിയ വഴിയും പല ഭാഷകളിലായാണ് ഐഎസ് ഇക്കാര്യം പ്രഖ്യാപിച്ചിരിക്കുന്നത്.
2015 ല്‍ ഒരു വര്‍ഷത്തെ യാത്രാ വിലക്ക് ഏര്‍പ്പെടുത്തിയതിന് പിന്നാലെ രാജ്യം വിടാന്‍ ശ്രമിച്ചതിനെ തുടര്‍ന്ന് കോപ്പന്‍ഹേഗനിലെ ജയിലില്‍ കഴിയുകയാണ് ജെവാന. നാളെയാണ് ജൊവനയുടെ വിചാരണ ആരംഭിക്കുന്നത്. കുറ്റം തെളിഞ്ഞാല്‍ രണ്ടു വര്‍ഷം വരെ തടവ് ശിക്ഷ ലഭിക്കാം. ഡെന്മാര്‍ക്കിലേക്ക് മടങ്ങിയെത്തിയതിന് പിന്നാലെ ജൊവാനയ്ക്ക് ഓണ്‍ലൈന്‍ വഴിയും അല്ലാതെയും നിരവധി വധഭീഷണി സന്ദേശം വന്നിരുന്നു.
അതേസമയം, ഡെന്മാര്‍ക്ക് സര്‍ക്കാരിന്റെ നടപടിയെ ജൊവാന എതിര്‍ക്കുകയാണ്. സൈന്യത്തിനൊപ്പം തീവ്രവാദികള്‍ക്കെതിരെ പോരാടുന്നത് എങ്ങനെയാണ് രാജ്യത്തിന് എതിരാവുമെന്നാണ് ജൊവാന തന്റെ ഫേസ്ബുക്ക് പേജിലൂടെ ചോദിക്കുന്നത്.
ഇറാനിലെ കുര്‍ദ് വംശജരുടെ മകളായി ഗള്‍ഫ് യുദ്ധ സമയത്ത് ഇറാഖിലെ റമാദിയിലെ അഭയാര്‍ത്ഥി ക്യാമ്പിലാണ് പിറന്നത്. കുട്ടിക്കാലത്ത് തന്നെ ജൊവാന മാതാപിതാക്കള്‍ക്കൊപ്പം ഡെന്മാര്‍ക്കിലേക്ക് അഭയം തേടുകയായിരുന്നു. 2014 ലാണ് ജൊവാന കോപ്പന്‍ഹേഗന്‍ യൂണിവേഴ്‌സിറ്റിയിലെ പഠനം പാതിവഴിയില്‍ ഉപേക്ഷിച്ച് ഐസിസിനെതിരെ പോരാടാന്‍ തോക്കെടുത്തത്.
ഐഎസ് തീവ്രവാദികള്‍ കുര്‍ദുകളോടും മറ്റും കാണിച്ചിരുന്ന കൊടുംക്രൂരത കണ്ട് മനസ് മടുത്താണ് മനുഷ്യാവകാശം എല്ലാവര്‍ക്കും ഉള്ളതാണെന്ന് ഉറക്കെ പ്രഖ്യാപിക്കാന്‍ ആഗ്രഹിച്ച ജൊവാന സിറിയയിലേക്കാണ് പോയത്. അവിടെ കുര്‍ദ് സേനയ്‌ക്കൊപ്പം ചേര്‍ന്ന് ഐസിസിനെതിരെ പോരാട്ടം തുടങ്ങുകയായിരുന്നു. പിന്നീടാണ് ഡെന്മാര്‍ക്ക് സര്‍ക്കാര്‍ ജൊവാനയെ രാജ്യത്ത് തിരിച്ചെത്തിച്ചത്. ഐഎസിനെതിരെ പോരാടാന്‍ ഇനി പോകരുതെന്നാണ് ഡെന്മാര്‍ക്കിന്റെ കര്‍ശന നിര്‍ദേശം. അങ്ങനെ സംഭവിച്ചാല്‍ ഐഎസ് തീവ്രവാദികള്‍ ഡെന്മാര്‍ക്കില്‍ ആക്രമണം നടത്തുമോയെന്നും സര്‍ക്കാര്‍ ഭയക്കുന്നു. മാത്രമല്ല, മദ്ധ്യ ഏഷ്യയില്‍ നിന്ന് ഐഎസ് ഡെന്മാര്‍ക്കിലെത്തുമോയെന്ന ആശങ്കയും സര്‍ക്കാരിനുണ്ട്. ഐഎസിനെ ഈ ലോകത്തു നിന്നും തുടച്ചുനീക്കണം അതാണ് എന്റെ സ്വപ്‌നം അവള്‍ പറയുന്നു.