റാഞ്ചികളുടെ ആവശ്യപ്രകാരം മാള്‍ട്ടയിലിറക്കിയ ലിബിയന്‍ വിമാനത്തില്‍നിന്ന് സ്ത്രീകളും കുട്ടികളും ഉള്‍പ്പെടെ മുഴുവന്‍ യാത്രക്കാരെയും ജീവനക്കാരെയും മോചിപ്പിച്ചു. വിമാനം റാഞ്ചിയ രണ്ടു അക്രമികളും കീഴടങ്ങി. ഇവരെ പൊലീസ് കസ്റ്റഡിയില്‍ എടുത്തു. സുരക്ഷാ ഉദ്യോഗസ്ഥര്‍ പരിശോധന തുടരുകയാണെന്നും അദ്ദേഹം പറഞ്ഞു. ഏഴ് ജീവനക്കാര്‍ ഉള്‍പ്പെടെ 118 പേരാണ് വിമാനത്തിലുണ്ടായിരുന്നത്.

ലിബിയയില്‍ ആഭ്യന്തര സര്‍വീസ് നടത്തുകയായിരുന്ന അഫ്രിഖിയ എയര്‍വേയ്‌സിന്റെ എയര്‍ ബസ് എ320 ആണ് റാഞ്ചിയത്. സാഭയില്‍നിന്ന് ലിബിയന്‍ തലസ്ഥാനമായ ട്രിപ്പോളിയിലേക്ക് പോയ വിമാനമാണിത്. റാഞ്ചികളുമായി നടത്തിയ ചര്‍ച്ചയ്ക്കു പിന്നാലെയാണ് യാത്രക്കാരെ വിട്ടയച്ചത് എന്നാണ് റിപ്പോര്‍ട്ടുകള്‍. വിമാനം മാള്‍ട്ടയിലെ വിമാനത്താവളത്തില്‍ ഇറക്കിയ കാര്യം മാള്‍ട്ട പ്രധാനമന്ത്രി ജോസഫ് മസ്‌കറ്റ് സ്ഥിരീകരിച്ചിരുന്നു. 82 പുരുഷന്‍മാരും 28 സ്ത്രീകളും ഒരു നവജാത ശിശുവും ഉള്‍പ്പെടെ 111 യാത്രക്കാരാണ് വിമാനത്തില്‍ ഉണ്ടായിരുന്നത്.

ലിബിയന്‍ സര്‍ക്കാരിന്റെ ഉടമസ്ഥതയിലുള്ളതാണ് അഫ്രിഖിയ എയര്‍വേയ്‌സ്. റാഞ്ചല്‍ സംഘത്തില്‍ രണ്ടുപേരാണ് ഉണ്ടായിരുന്നത്. തങ്ങളുടെ പക്കല്‍ ഗ്രനേഡുണ്ടെന്നും ഇത് ഉപയോഗിച്ച് വിമാനം തകര്‍ക്കുമെന്നുമായിരുന്നു അക്രമികളുടെ ഭീഷണി. ഇവര്‍ ഗദ്ദാഫി അനുകൂലികള്‍ ആണെന്നാണ് സംശയം.

വിമാനം റാഞ്ചിയവരുടെ ആവശ്യങ്ങള്‍ എന്താണെന്ന് വ്യക്തമല്ല. പ്രാദേശിക സമയം പകല്‍ 11.32നാണ് റാഞ്ചിയ വിമാനം മാള്‍ട്ടയില്‍ ഇറക്കിയത് എന്നാണ് റിപ്പോര്‍ട്ട്. മെഡിറ്ററേനിയന്‍ കടലില്‍ സ്ഥിതി ചെയ്യുന്ന മൂന്ന് ദ്വീപുകളുള്‍പ്പെട്ട ഒരു ദ്വീപസമൂഹമാണ് മാള്‍ട്ട. യൂറോപ്യന്‍ യൂണിയനില്‍പ്പെട്ട രാജ്യമാണ്.