മുസ്‌ളിം രാഷ്ട്രങ്ങളില്‍നിന്നുള്ള കുടിയേറ്റക്കാരെ അമേരിക്കയിലേക്ക് പ്രവേശിപ്പിക്കില്ലെന്ന ട്രംപിന്റെ തീരുമാനത്തിനെതിരെ ലോകമാകെ വന്‍ പ്രതിഷേധം
മുസ്‌ളിം രാഷ്ട്രങ്ങളില്‍ നിന്നുള്ള കുടിയേറ്റക്കാരെ അമേരിക്കയിലേക്ക് പ്രവേശിപ്പിക്കില്ലെന്ന അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ തീരുമാനത്തിനെതിരെ ലോകവ്യാപക പ്രതിഷേധം. ന്യൂയോര്‍ക്കിലെ ജോണ്‍ എഫ് കെന്നഡി വിമാനത്താവളത്തിനുമുന്നില്‍ നൂറുകണക്കിനാളുകളാണ് പ്രതിഷേധവുമായി ഒത്തുചേര്‍ന്നത്. വിവിധ രാഷ്ട്രത്തലവന്മാരും പ്രതിഷേധം അറിയിച്ചു. അതിനിടെ, വിസ കൈവശമുള്ള ഇറാഖി പൗരന്മാരെ അമേരിക്കയില്‍ തങ്ങാന്‍ അനുവദിക്കണമെന്ന ഫെഡറല്‍ കോടതി ജഡ്ജിയുടെ ഉത്തരവ് ട്രംപിന് തിരിച്ചടിയായി.
ജെഎഫ്‌കെ വിമാനത്താവളത്തില്‍ 11 ഇറാഖി പൌരന്മാരെ കസ്റ്റഡിയിലെടുത്ത് തടഞ്ഞുവച്ചതോടെയാണ് പ്രതിഷേധം ആരംഭിച്ചത്. ഇറാഖില്‍നിന്ന് എത്തിയവരെ പ്രസിഡന്റിന്റെ ഉത്തരവനുസരിച്ച് അമേരിക്കയില്‍ ഇറങ്ങാന്‍ അനുവദിക്കില്ലെന്ന് വിമാനത്താവള അധികൃതര്‍ നിലപാടെടുത്തു. തുടര്‍ന്ന് പ്രതിഷേധം കനക്കുന്നതിനിടെ, അമേരിക്കന്‍ സിവില്‍ ലിബര്‍ട്ടീസ് യൂണിയന്‍ ഫെഡറല്‍ കോടതിയില്‍ ഹര്‍ജിയുമായെത്തി. ഹര്‍ജി പരിഗണിച്ച കോടതി വിഷയത്തില്‍ ഇടപെടുകയായിരുന്നു.
നിയമാനുസൃത വിസയുള്ള ഇറാഖി പൌരന്മാര്‍ക്ക് അമേരിക്കയില്‍ തങ്ങാന്‍ സാഹചര്യമൊരുക്കണമെന്ന് കോടതി ഉത്തരവിട്ടു. അമേരിക്കയില്‍ ഇറങ്ങുന്നത് സംബന്ധിച്ച് ആശങ്കയിലായ നൂറുകണക്കിന് വിദേശികള്‍ക്ക് ഇതോടെ വിവിധ വിമാനത്താവളങ്ങളില്‍നിന്ന് പുറത്തുകടക്കാനായി. സിറിയ, ഇറാഖ്, ഇറാന്‍, സിറിയ, ലിബിയ, സൊമാലിയ, സുഡാന്‍, യമന്‍ എന്നീ രാജ്യങ്ങളില്‍നിന്നുള്ള കുടിയേറ്റക്കാരെ വിലക്കിക്കൊണ്ടുള്ള ഉത്തരവില്‍ കഴിഞ്ഞദിവസം ട്രംപ് ഒപ്പിട്ടതോടെ അമേരിക്കയുടെ എല്ലാ വിമാനത്താവളങ്ങളിലും വ്യാപക പ്രതിഷേധം ഉയര്‍ന്നിരുന്നു.
കുടിയേറ്റ വിലക്കിനെതിരെ മനുഷ്യാവകാശപ്രവര്‍ത്തകരും രംഗത്തെത്തി. അമേരിക്കന്‍ സിവില്‍ ലിബര്‍ട്ടീസ് ഉള്‍പ്പെടെയുള്ള സംഘടനകളാണ് ഉത്തരവിനെതിരെ രംഗത്തെത്തിയത്. ഭരണഘടനാപരമായി നിലനില്‍ക്കാത്ത ഉത്തരവെന്ന് ചൂണ്ടിക്കാട്ടി സംഘടനകള്‍ ഹര്‍ജി ഫയല്‍ ചെയ്തു. വ്യാപാരനേട്ടങ്ങള്‍ കാര്യമായി ഉണ്ടാകില്ലെന്ന് ട്രംപ് ഉറച്ചുവിശ്വസിക്കുന്ന രാജ്യങ്ങളെയാണ് വിലക്കിയത്. സമ്പന്ന മുസ്‌ളിം രാജ്യങ്ങള്‍ക്ക് വിലക്ക് ഏര്‍പ്പെടുത്താത്തത് ഇതിന് തെളിവാണെന്നും ആക്ഷേപമുണ്ട്.
ട്രംപിന്റെ കുടിയേറ്റനയത്തെ വിമര്‍ശിച്ച് യൂറോപ്പില്‍നിന്നടക്കമുള്ള രാഷ്ട്രത്തലവന്മാരുള്‍പ്പെടെ അന്താരാഷ്ട്ര നേതാക്കളും രംഗത്തെത്തി. കുടിയേറ്റ വിലക്കിനെ അംഗീകരിക്കാനാകില്ലെന്ന് ബ്രിട്ടീഷ് പ്രധാനമന്ത്രി തെരേസ മെയ് പറഞ്ഞു. നയം ബ്രിട്ടീഷ് പൌരന്മാരെ ബാധിക്കുന്നതരത്തിലേക്ക് മാറിയാല്‍ ഇടപെടുമെന്നും അവര്‍ പറഞ്ഞു. ട്രംപിന്റെ നയം അതീവദുഃഖകരമാണെന്ന് ഇന്തോനേഷ്യന്‍ വിദേശമന്ത്രി റെറ്റിനോ മര്‍സൌദി പറഞ്ഞു.
ന്യായീകരിക്കാനാകുന്ന നടപടിയല്ല ട്രംപിന്റെ ഭാഗത്തുനിന്നുണ്ടായതെന്നും കുടിയേറ്റ വിലക്ക് ജര്‍മന്‍ പൌരന്മാരെ എങ്ങനെ ബാധിക്കുമെന്ന കാര്യം വിശദമായി പരിശോധിക്കുമെന്നും ജര്‍മന്‍ ചാന്‍സലര്‍ ആംഗല മെര്‍ക്കല്‍ പറഞ്ഞു. അതേസമയം, അമേരിക്കയിലേക്ക് തങ്ങളുടെ പൌരന്മാരെ കയറ്റാത്ത സാഹചര്യമുണ്ടായാല്‍ അമേരിക്കന്‍ പൌരന്മാരെയും തടയുമെന്ന് ഇറാന്‍ വ്യക്തമാക്കി.
https://www.facebook.com/Malayalivartha
