രാജ്യത്തു നിന്ന് മുങ്ങിയ മദ്യ വ്യവസായി വിജയ് മല്യയെ ഇന്ത്യയ്ക്ക് കൈമാറണമെന്ന് ബ്രിട്ടനോട് ഇന്ത്യന്‍ പ്രധാനമന്ത്രി നരേന്ദ്രമോഡി. ജി20 ഉച്ചകോടിക്കിടെ ബ്രിട്ടീഷ് പ്രധാനമന്ത്രി തെരേസ മേയോടെയാണ് മോഡി സഹായം അഭ്യര്‍ത്ഥിച്ചത്.

ബ്രിട്ടനിലെ വെസ്റ്റ് മിനിസ്റ്റര്‍ മജിസ്‌ട്രേട്ട് കോടതി ഡിസംബര്‍ നാലിന് വിചാരണ തുടങ്ങാനിരിക്കെയാണ് വിഷയം മോഡി ഉന്നയിച്ചത്. കേസിലെ മുഴുവന്‍ തെളിവുകളും ഇന്ത്യ കൈമാറി കഴിഞ്ഞുവെന്ന് ബ്രിട്ടനിലെ കോടതി കഴിഞ്ഞ ദിവസം വ്യക്തമാക്കിയിരുന്നു. ഡിസംബര്‍ നാലുവരെ ഉപാധികളോടെ ജാമ്യത്തിലാണ് മല്യ. എന്നാല്‍ മോഡിയുടെ ആവശ്യത്തോട് ഉറപ്പൊന്നും നല്‍കിയില്ലെന്നാണ് സൂചന. കുറ്റവരാളികളെ കൈമാറുന്നതിന് ഇരുരാജ്യങ്ങളും തമ്മിലുള്ള കരാര്‍ പ്രകാരം മല്യയെ ഇന്ത്യയ്ക്ക് കൈമാറണമെന്ന് ആവശ്യപ്പെട്ട നേരത്തെ ഇന്ത്യ ബ്രിട്ടനു കത്തു നല്‍കിയിരുന്നു.

രാജ്യത്തെ 17 ബാങ്കുകളില്‍ നിന്ന് വായ്പയെടുത്ത 9000 കോടിരൂപ തിരിച്ചടയ്ക്കാതെയാണ് മല്യ ഇന്ത്യയില്‍ നിന്ന് മുങ്ങിയത്. യു.കെ യില്‍വെച്ചാണ് വിജയ് മല്യ അറസ്റ്റിലായത്. ജര്‍മ്മനിയിലെ ഹാംബര്‍ഗില്‍ നടക്കുന്ന ജി20 ഉച്ചകോടിയുടെ രണ്ടാം ദിവസം ഭീകരവാദം, കാലാവസ്ഥ വ്യതിയാനം, വ്യാപാരം തുടങ്ങിയ വിഷയങ്ങളിലാണ് നേതാക്കള്‍ ചര്‍ച്ച നടത്തിയത്.