അവളുടെ പുഞ്ചിരി ഇന്നും മായാതെ നില്‍ക്കുകയാണ്. കുഞ്ഞുപൂക്കളുടെ ഇടയില്‍ തുടുത്ത് നിന്ന അവളുടെ ആ മാലാഖചിരി അപ്പോഴും തെളിഞ്ഞ് നില്‍ക്കുകയാണ്. രണ്ടാഴ്ച മുമ്പ് തന്റെ 'വിവാഹദിനത്തില്‍' ആത്മസുഹൃത്തിന്റെ കൈപിടിച്ച് ഒരു രാജകുമാരിയെപ്പോലെ പടവുകളിറങ്ങി വന്ന അഞ്ചു വയസ്സുകാരിയെ ദൈവം സ്വര്‍ഗത്തിലേക്ക് വിളിച്ചിരുന്നു എന്നത് അവിടെ കൂടി നിന്നവര്‍ക്കും വിശ്വസിക്കാനാകാത്തതായിരുന്നു. സ്‌കോട്‌ലന്റിലെ ഫോറസ്സിലാണ് ലോകത്തെ മുഴുവന്‍ കരയിച്ച ആ സംഭവം നടന്നത്.

കാന്‍സറിന്റെ രൂപത്തില്‍ ന്യൂറോ ബ്ലാസ്‌റ്റോമ എന്ന മാരകമായ അസുഖം ആ കുഞ്ഞു മാലാഖയെ മരണത്തിലേക്ക് വലിച്ചപ്പോഴും ഏലി പാറ്റേഴ്‌സന്റെ ഏറ്റവും വലിയ ആഗ്രഹം തന്റെ ആത്മസുഹൃത്തായ ഹാരിസന്‍ ഗ്രയറിനെ വിവാഹം കഴിക്കുകയെന്നതായിരുന്നു. ഹാരിസന് ആറു വയസ്സു മാത്രം പ്രായം. ഏലിയുടെ അമ്മ ഗെയ്ല്‍ മുന്‍കൈയെടുത്ത് ആര്‍ഭാടമായി തന്നെ അവരുടെ വിവാഹച്ചടങ്ങുകള്‍ നടത്തി. ജൂണ്‍ 18 നായിരുന്നു അത്. എന്നാല്‍ ജൂലൈ ഒന്നിനു പുലര്‍ച്ചെ അവള്‍ മരണത്തിനു കീഴടങ്ങി.

ഏലിക്ക് രണ്ടു വയസ്സുള്ളപ്പോോഴാണ് കാന്‍സര്‍ സ്ഥിരീകരിച്ചത്. തന്റെ പൊന്നോമനയെ മരണത്തിനു വിട്ടുകൊടുക്കാതിരിക്കാന്‍ ഗെയ്ല്‍ ആവുന്നതിനേക്കാള്‍ കൂടുതല്‍ ശ്രമിച്ചു. സാമൂഹിക മാധ്യമങ്ങളിലൂടൊക്കെ പണം ശേഖരിച്ച് മികച്ച ചികിത്സ തന്നെ നല്‍കി. ഒട്ടേറെ കീമോതെറാപ്പികളും ശസ്ത്രക്രിയകളും കാരണം ഏലിയുടെ തലമുടിയെല്ലാം നഷ്ടപ്പെട്ടു കഴിഞ്ഞിരുന്നു. ഡോക്ടര്‍മാര്‍ അവസാന പ്രതീക്ഷയും കൈവിട്ടതോടെ ഏലിയുടെ ആഗ്രഹങ്ങള്‍ ഏതു വിധേനെയും സാധിച്ചു കൊടുക്കണമെന്നുള്ള ചിന്ത മാത്രമായിരുന്നു അമ്മ ഗെയ്‌ലിന്. മകളോടു ചോദിച്ച് അവളുടെ ആഗ്രഹങ്ങളുടെ ഒരു നീണ്ട പട്ടിക തന്നെ അതിനു വേണ്ടി അവര്‍ തയ്യാറാക്കി. അതില്‍ ഏറ്റവും ആദ്യത്തേത് ശൈശവം മുതല്‍ക്കു തന്നെ തന്റെ കൂടെയുള്ള ഹാരിസനെ വിഹാഹം കഴിക്കുക എന്നതായിരുന്നു. അതും ആ അമ്മ സാധിച്ചുകൊടുത്തു.

പ്രത്യേകം തയ്യാറാക്കിയ വിവാഹപന്തലില്‍ പിങ്ക്, വെള്ള നിറങ്ങളിലുള്ള വിവാഹ വസ്ത്രമണിഞ്ഞ് ഏലി നിറഞ്ഞ പുഞ്ചിരിയോടെ നിന്നു. ഡിസ്‌നി ചിത്രമായ പിനാക്യോയിലെ ഗാനം പാടി സഹോദരന്‍ ഏലിയെയും ഹാരിസനെയും എതിരേറ്റു. കാര്‍ട്ടൂണ്‍ കഥാപാത്രങ്ങളുടെ വേഷമണിഞ്ഞാണ് തേങ്ങലടക്കിയും നൂറു കണക്കിനു പേര്‍ വിവാഹവേദിയിലെത്തിയത്. ഏലിയും ഹാരിസനും കഥാപാത്രങ്ങളാക്കി ഗെയ്ല്‍ തന്നെ എഴുതിയ അത്ഭുത കഥ അവിടെ വച്ചു വായിച്ചു. വിവാഹ മോതിരത്തിനു പകരം നെക്ക്‌ലേസുകളാണ് അവര്‍ കൈമാറിയത്. ചടങ്ങുകള്‍ക്കൊടുവില്‍ ഏലിയും ഹാരിസനും 'ലൈഫ് ലോങ് ബെസ്റ്റ് ഫ്രണ്ട്‌സ്' ആണെന്നു പ്രഖ്യാപിക്കപ്പെട്ടു. സൈയുടെ ഗഗ്‌നം സ്‌റ്റൈല്‍ എന്ന ഗാനത്തിനൊപ്പം ചുവടു വച്ചാണ് വധുവും വരനും വിവാഹപാര്‍ട്ടി ആരംഭിച്ചത്. രക്തം മാറ്റിയതിന്റെ ക്ഷീണം ഉണ്ടായിരുന്നെങ്കിലും തന്റെ പ്രിയപ്പെട്ട ദിനം ആസ്വദിക്കാന്‍ അവള്‍ ഒരു ബുദ്ധിമുട്ടും കാണിച്ചില്ല.

ജൂണ്‍ 29നാണ് ഏലിയുടെ രോഗം മൂര്‍ച്ഛിച്ചത്. മരണ സമയം മുഴുവന്‍ കുടംബാംഗങ്ങളും അവള്‍ക്കു ചുറ്റും നിന്ന് യാത്രാമൊഴിയേകി. വേദനകള്‍ക്കിടയിലും ഭൂമിയില്‍ തനിക്കു ലഭിച്ച കുറച്ചു നാളുകള്‍ കൊണ്ട് സന്തോഷത്തിന്റെ കുഞ്ഞു സമ്മാനപ്പെട്ടി സ്വന്തമാക്കിയാണ് അവള്‍ സ്വര്‍ഗത്തിലേക്ക് മടങ്ങിയത്.