പാക്കിസ്ഥാനില്‍ നവാസ് ഷരീഫിന്റെ രാജിക്കായി സമ്മര്‍ദ്ദം പട്ടാളഭരണം വരാന്‍ സാധ്യത
ഷരീഫിന്റെ രാജിക്കായുള്ള സമ്മര്‍ദ്ദം ഏറുന്നതിനിടെ പാക്ക് മന്ത്രിസഭയുടെ അടിയന്തരയോഗം ചേരുന്നു. പാനമ രേഖകളുടെ അടിസ്ഥാനത്തില്‍ ഷരീഫിനും കുടുംബാംഗങ്ങള്‍ക്കുമെതിരെ ഉയര്‍ന്ന അഴിമതി ആരോപണങ്ങളില്‍ സംയുക്ത അന്വേഷണ സംഘം (ജെഐടി) അന്തിമ റിപ്പോര്‍ട്ട് സുപ്രീം കോടതിക്കു കഴിഞ്ഞദിവസം നല്‍കിയിരുന്നു. ഇതേത്തുടര്‍ന്ന് കേസിനെ പ്രതിരോധിക്കാന്‍ അടിയന്തരമായി എന്തുനിലപാടു സ്വീകരിക്കാനാകുമെന്നായിരുന്നു ചര്‍ച്ചയെന്നാണു വിവരം.
നവാസ് ഷരീഫിന്റെ പതനം പാക്ക് സൈന്യത്തെ ശക്തിപ്പെടുത്തുമെന്നാണ് ഇന്ത്യയുടെ വിലയിരുത്തല്‍. ഇന്ത്യ – പാക്ക് ബന്ധത്തില്‍ കാര്യമായ പുരോഗതിയില്ലെങ്കിലും പാക്കിസ്ഥാന്റെ വിദേശകാര്യ നയങ്ങളുടെ ചരട് ഇപ്പോഴും ഇസ്‌ലാമാബാദിലെ രാഷ്ട്രീയ നയതന്ത്രജ്ഞരുടെ കൈവശമാണ്. ഈ സാഹചര്യത്തിനു മാറ്റമുണ്ടാകും. ഷരീഫ് മാറിയാല്‍ ഈ ചരട് റാവല്‍പിണ്ടിയിലെ സൈനിക ആസ്ഥാനത്തിരുന്നായിരിക്കും വലിക്കുക. മാത്രമല്ല, ഷരീഫ് സ്ഥാനമൊഴിയാന്‍ തയാറല്ലെങ്കില്‍ വീണ്ടുമൊരു പട്ടാള അട്ടിമറി നടക്കാനുള്ള സാധ്യതയും നിരീക്ഷകര്‍ ചൂണ്ടിക്കാട്ടുന്നു.
പ്രധാനമന്ത്രിയുടെ വസതിയില്‍ അനൗദ്യോഗികമായാണു ചര്‍ച്ച. മന്ത്രിമാരും ഷരീഫിന്റെ അഭിഭാഷകരും അറ്റോര്‍ണി ജനറല്‍ അഷ്തര്‍ ഔസഫ് അലിയും യോഗത്തിനെത്തി. പാനമ റിപ്പോര്‍ട്ടിന്റെ പശ്ചാത്തലത്തില്‍ സ്ഥാനമൊഴിയണമെന്നു ഷരീഫിനോട് എല്ലാ പ്രതിപക്ഷ കക്ഷികളും ആവശ്യപ്പെട്ടിരുന്നു. എന്നാല്‍ സ്ഥാനമൊഴിയാന്‍ തയാറല്ലെന്നായിരുന്നു ഷരീഫിന്റെ മകള്‍ മറിയം ട്വീറ്റ് ചെയ്തത്. അതിനിടെ, സൈന്യവും ഷരീഫിന്റെ രാജിക്കായി സമ്മര്‍ദ്ദം ചെലുത്തുന്നതായാണു സൂചന.
പാനമ രേഖകളിലെ വെളിപ്പെടുത്തലുകളുടെ അടിസ്ഥാനത്തില്‍ നവാസ് ഷരീഫിനെ സ്ഥാനഭ്രഷ്ടനാക്കണമെന്നാവശ്യപ്പെട്ടു തെഹ്‌രീകെ ഇന്‍സാഫ് അധ്യക്ഷനും മുന്‍ പാക്ക് ക്രിക്കറ്റ് താരവുമായ ഇമ്രാന്‍ ഖാന്‍ ഉള്‍പ്പെടെയുള്ളവര്‍ കഴിഞ്ഞ നവംബര്‍ മൂന്നിനാണു സുപ്രീം കോടതിയെ സമീപിച്ചത്. സ്ഥാനഭ്രഷ്ടനാക്കണമെന്ന ആവശ്യം നിരസിച്ച കോടതി, അന്വേഷണത്തിന് ഉത്തരവിടുകയായിരുന്നു. റിപ്പോര്‍ട്ടിലെ രഹസ്യസ്വഭാവമുള്ള പത്താം വാല്യം ഒഴികെ, ബാക്കി ഒന്‍പതു വാല്യങ്ങളും പരസ്യമാക്കാന്‍ ഇമ്രാന്‍ ഖാന്റെ അഭിഭാഷകന്‍ കോടതിയോട് അഭ്യര്‍ഥിച്ചു. ഒരു വിദേശസര്‍ക്കാരുമായുള്ള ആശയവിനിമയ വിവരങ്ങള്‍ ഉള്‍ക്കൊള്ളുന്നതിനാല്‍ റിപ്പോര്‍ട്ടിന്റെ പത്താം വാല്യം പരസ്യപ്പെടുത്തരുതെന്ന് ജെഐടി കോടതിയോട് ആവശ്യപ്പെട്ടിരുന്നു.
https://www.facebook.com/Malayalivartha
