പാരീസ് ഉടമ്പടിയില്‍ മാറ്റം വരുത്തുമെന്ന സൂചന നല്‍കി ട്രംപ്
കാലാവസ്ഥാ വ്യതിയാനം നിയന്ത്രിക്കുന്നതിനായി 195 രാജ്യങ്ങള്‍ ഒപ്പിട്ട പാരീസ് ഉടമ്പടിയില്‍ നിന്നും പിന്മാറിയ മുന്‍ നിലപാടില്‍ മാറ്റം വരുത്തുമെന്ന സൂചന നല്‍കി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് രംഗത്ത്. ഫ്രഞ്ച് പ്രസിഡന്റ് ഇമ്മാനുവേല്‍ മാക്രോണുമായി നടത്തിയ ചര്‍ച്ചകള്‍ക്ക് ശേഷമാണ് ട്രംപിന്റെ പുതിയ നീക്കം. പാരീസ് ഉടമ്പടിയെ മാനിക്കുന്ന ചില തീരുമാനങ്ങള്‍ ഉടനുണ്ടാകുമെന്ന് മാക്രോണുമായി നടത്തിയ സംയുക്ത പത്രസമ്മേളനത്തില്‍ ട്രംപ് വ്യക്തമാക്കി. എന്നാല്‍ ട്രംപിന്റെ അഭിപ്രായത്തെ തങ്ങള്‍ ബഹുമാനിക്കുന്നുവെന്നും അതേസമയം പാരീസ് ഉടമ്പടിയില്‍ നിന്നും ഫ്രാന്‍സ് പിന്മാറില്ലെന്നും പ്രസിഡന്റ് മാക്രോണ്‍ പറഞ്ഞു.
പാരീസ് ഉടമ്പടി ലോകത്തിലെ ഏറ്റവും മലിനീകരണം ഉണ്ടാക്കുന്ന ഇന്ത്യയും ചൈനയും പോലുള്ള രാജ്യങ്ങളുടെ താത്പര്യങ്ങള്‍ സംരക്ഷിക്കാനാണെന്നും കാലാവസ്ഥാ സംരക്ഷണം വെറും തട്ടിപ്പാണെന്നും ആരോപിച്ചാണ് അമേരിക്ക ഉടമ്പടിയില്‍ നിന്നും പിന്മാറിയത്. കോടിക്കണക്കിന് ഡോളര്‍ വിദേശ സഹായം കൈപ്പറ്റുന്നതിന് വേണ്ടി മാത്രമാണ് ഇന്ത്യ പാരീസ് ഉടമ്പടിയില്‍ ഒപ്പിട്ടതെന്നും ട്രംപ് ആരോപിച്ചിരുന്നു. ചൈനയ്ക്കും ഇന്ത്യയ്ക്കും അവരുടെ കല്‍ക്കരി പാടങ്ങള്‍ വികസിപ്പിക്കാന്‍ ലോകരാജ്യങ്ങള്‍ അനുമതി നല്‍കിയിട്ടുണ്ട്. എന്നാല്‍ അമേരിക്കയുടെ കാര്യം വരുമ്പോള്‍ മാത്രം പരിസ്ഥിതി പ്രശ്‌നങ്ങള്‍ ഉയര്‍ത്തി ചിലര്‍ അതിനെ തടുക്കുകയാണെന്നും ട്രംപ് വ്യക്തമാക്കിയിരുന്നു.
ആഗോളതാപനം തട്ടിപ്പാണെന്നും പാരീസ് ഉടമ്പടി അനുസരിക്കില്ലെന്നുമാണ് തിരഞ്ഞെടുപ്പ് പ്രചാരണവേളയില്‍ ട്രംപ് പറഞ്ഞിരുന്നത്. താന്‍ പ്രസിഡന്റായാല്‍ ആദ്യ 100 ദിവസത്തിനുള്ളില്‍ കരാര്‍ റദ്ദ് ചെയ്യുമെന്നും തിരഞ്ഞെടുപ്പ് പ്രചാരണ വേളയില്‍ ട്രംപ് പറഞ്ഞിരുന്നു. കല്‍ക്കരി ഇന്ധനത്തിലേക്ക് തിരിച്ചുപോകാന്‍ അടുത്തിടെ യു.എസ്. ഭരണകൂടം തീരുമാനിച്ചിരുന്നു. കൂടുതല്‍ തൊഴില്‍ സൃഷ്ടിക്കാനാണ് ഇതെന്നാണ് ട്രംപിന്റെ വാദം. മുന്‍ പ്രസിഡന്റ് ബരാക് ഒബാമയുടെ നയങ്ങള്‍ക്ക് വിരുദ്ധമായാണ് ട്രംപ് ഈ തീരുമാനമെടുത്തത്. ആഗോളതാപനം നിയന്ത്രിക്കേണ്ടതിന്റെ ആവശ്യകതയെക്കുറിച്ച് പറയുകയും പാരീസ് ഉടമ്പടിക്കുവേണ്ടി പരിശ്രമിക്കുകയും ചെയ്തയാളാണ് ഒബാമ.
എന്നാല്‍ ട്രംപിന്റെ പ്രഖ്യാപനത്തിന് പിന്നാലെ പ്രതിഷേധവുമായി നിരവധി രാജ്യങ്ങളും പരിസ്ഥിതി സംഘടനകളും രംഗത്ത് വന്നിരുന്നു. കാര്‍ബണ്‍വാതക പുറന്തള്ളലില്‍ ലോകത്ത് ചൈനയ്ക്ക് പിന്നില്‍ രണ്ടാം സ്ഥാനത്തുള്ള അമേരിക്ക കരാറില്‍ നിന്നും പിന്മാറിയാല്‍ ഉടമ്പടി ലക്ഷ്യം കൈവരിക്കുക പ്രയാസമാകുമെന്നാണ് ഇക്കൂട്ടരുടെ വാദം.
https://www.facebook.com/Malayalivartha
