യുഎസിനെ പരിധിയിലാക്കുന്ന ബാലിസ്റ്റിക് മിസൈല്‍ പരീക്ഷിച്ച് ഉത്തര കൊറിയ
കൊറിയന്‍ മുനമ്പിലെ സംഘര്‍ഷസാധ്യതകള്‍ക്ക് വീര്യം പകര്‍ന്ന് യുഎസിനെ ഏതാണ്ട് സമ്പൂര്‍ണമായി പരിധിയിലാക്കാന്‍ ശേഷിയുള്ള ഭൂഖണ്ഡാന്തര ബാലിസ്റ്റിക് മിസൈല്‍ ഉത്തര കൊറിയ പരീക്ഷിച്ചു. ജഗാംഗ് പ്രവിശ്യയില്‍നിന്ന് അര്‍ധരാത്രിയിലായിരുന്നു പരീക്ഷണം. ആണവായുധ വാഹകശേഷിയുള്ള മിസൈലാണ് ഉത്തര കൊറിയ പരീക്ഷിച്ചത്.
ഈ മാസം ഉത്തര കൊറിയ നടത്തുന്ന ഇത്തരത്തിലുള്ള മൂന്നാമത്തെ പരീക്ഷണമാണിത്. മൂവായിരം കിലോമീറ്റര്‍ ഉയരത്തില്‍ പറന്ന മിസൈല്‍ ജപ്പാന്‍ കടലില്‍ പതിച്ചു. ആരെയും എപ്പോള്‍ വേണമെങ്കിലും നേരിടാനുള്ള ഉത്തരകൊറിയയുടെ ശക്തി തെളിയിക്കുന്നതാണ് മിസൈല്‍ പരീക്ഷണമെന്ന് ഏകാധിപതി കിം ജോങ് ഉന്‍ പറഞ്ഞതായി കൊറിയന്‍ സെന്‍ട്രല്‍ ന്യൂസ് ഏജന്‍സി (കെസിഎന്‍എ) റിപ്പോര്‍ട്ടു ചെയ്തു.
പരീക്ഷണം വിജയിച്ചതില്‍ കിം സന്തോഷമറിയിച്ചതായും, മിസൈല്‍ നിര്‍മാതാക്കളെ അനുമോദിച്ചതായും കെസിഎന്‍എ അറിയിച്ചു. ലോകരാജ്യങ്ങളുടെ തുടര്‍ച്ചയായുള്ള മുന്നറിയിപ്പ് അവഗണിച്ചാണ് മിസൈല്‍ പരീക്ഷണങ്ങളുമായി ഉത്തര കൊറിയ വീണ്ടും രംഗത്തെത്തിയിരിക്കുന്നത്.
അതേസമയം, പരീക്ഷണത്തിന്റെ പശ്ചാത്തലത്തില്‍ ജപ്പാനും ദക്ഷിണ കൊറിയയും സുരക്ഷാ ഉദ്യോഗസ്ഥരുടെ യോഗം ചേര്‍ന്നു. തുടരെയുള്ള മിസൈല്‍ പരീക്ഷണം ഭീഷണിയാണെന്ന് ജാപ്പനീസ് പ്രധാനമന്ത്രി ഷിന്‍സോ ആബെ പറഞ്ഞു. ഉത്തര കൊറിയയ്ക്ക് വിലക്കേര്‍പ്പെടുത്തുന്ന കാര്യം പരിഗണിക്കണമെന്ന് ദക്ഷിണ കൊറിന്‍ പ്രസിഡന്റ് മൂണ്‍ ജി ഇന്‍ യുഎന്നിനോട് ആവശ്യപ്പെടുകയും ചെയ്തു.
https://www.facebook.com/Malayalivartha
