ഉത്തരകൊറിയക്കെതിരേ അമേരിക്ക ചുമത്തുന്ന ഉപരോധത്തിന് പിന്തുണയുമായി യുഎന്‍
ഉത്തരകൊറിയക്കെതിരെ ഉപരോധം ശക്തമാകുന്നു. ജൂലൈയില്‍ രണ്ട് ഭൂഖണ്ഡാന്തര ബാലിസ്റ്റിക് മിസൈല്‍ പരീക്ഷിച്ച ഉത്തരകൊറിയക്കെതിരേ അമേരിക്ക ചുമത്തുന്ന ഉപരോധത്തിന് യുഎന്‍ രക്ഷാസമിതിയും പിന്തുണച്ചു. ഉത്തരകൊറിയയില്‍ നിന്നുള്ള കയറ്റുമതിക്ക് നിരോധനമേര്‍പ്പെടുത്താനുള്ള നീക്കത്തിന് രക്ഷാസമിതിയില്‍ എല്ലാ രാജ്യങ്ങളും പിന്തുണ നല്‍കി. യുഎന്നിലേക്കുള്ള അമേരിക്കന്‍ അംബാസിഡര്‍ നിക്കി ഹാലിയാണ് പ്രമേയം അവതരിപ്പിച്ചത്.
ദക്ഷിണ കൊറിയയുമായുള്ള അഭ്യാസപ്രകടനം തുടരുമെന്നും അവര്‍ പറഞ്ഞു. കല്‍ക്കരി, ഇരുമ്പ്, ഇരുമ്പ് ധാതുക്കള്‍, ലെഡ്, ലെഡ് ധാതുക്കള്‍, മത്സ്യംമറ്റ് സമുദ്രോത്പന്നങ്ങള്‍ തുടങ്ങിയവയുടെ കയറ്റുമതി പൂര്‍ണമായും നിരോധിക്കാനാണ് അമേരിക്കയുടെ നീക്കം.
ഉത്തരകൊറിയയെ സാമ്പത്തികമായി പ്രതിസന്ധിയിലാക്കാനാണ് അമേരിക്കയുടെ ലക്ഷ്യം. കയറ്റുമതിയിലൂടെ പ്രതിവര്‍ഷം മൂന്നൂറു കോടിയോളം രൂപയാണ് ഉത്തരകൊറിയക്ക് ലഭിക്കുന്നത്. ഉപരോധത്തെ പിന്തുണച്ച് പ്രമേയം പാസാക്കാന്‍ അനുകൂലവോട്ട് രേഖപ്പെടുത്തണമെന്ന് യുഎന്‍ സെക്യൂരിറ്റി കൗണ്‍സിലിലെ 15 അംഗങ്ങള്‍ക്കും കഴിഞ്ഞ ദിവസം നിര്‍ദേശം നല്കിയിരുന്നു.
പ്രമേയം പാസാക്കാന്‍ ഒന്പത് അനുകൂല വോട്ട് ആവശ്യമാണ്. അതോടൊപ്പം അമേരിക്ക, ചൈന, റഷ്യ, ഫ്രാന്‍സ്, ബ്രിട്ടന്‍ എന്നിവയില്‍ ആരും വീറ്റോ ചെയ്യാനും പാടില്ല.
https://www.facebook.com/Malayalivartha
