ലോട്ടറി അടിച്ചാല്‍ എല്ലാവരും ചിന്തിക്കുന്നത് കഷ്ടപ്പാടുകള്‍ക്ക് അവസാനം കണ്ട് കിട്ടിയതുകൊണ്ട് സന്തോഷത്തോടെ ജിവിക്കാനാണ്. എന്നാല്‍ ഇവിടെ 180 കോടിയുടെ ലോട്ടറി അടിച്ച മനുഷ്യന്‍ കാട്ടിക്കൂട്ടിയത് കൂറെ കടന്നു പോയി. മുക്താര്‍ മൊഹിദിന്‍ എന്നയാളുടെ അനുഭവമാണ് ഇവിടെ പറയുന്നത്. ലോട്ടറി അടിച്ചയാള്‍ അവസാനം ആരോരുമില്ലാതെയാണ് മരിച്ചത്. ബ്രിട്ടനിലെ ആദ്യ നാഷണല്‍ ലോട്ടറി ജേതാവായിരുന്നു മൊഹ്ദിന്‍.

1994 നവംബറില്‍ നടന്ന നറുക്കെടുപ്പില്‍ 17.9 ദശലക്ഷം പൗണ്ടിന്റെ സമ്മാനമാണ് മൊഹ്ദിന്‍ നേടിയത്. ഒരു രാസവള ഫാക്ടറിയിലെ സാധാരണ തൊഴിലാളിയായിരുന്ന മൊഹ്ദിന്‍ കോടീശ്വരനായി. ടെസ്‌കോയില്‍ നിന്നെടുത്ത ടിക്കറ്റിന് ഒന്നാം സമ്മാനം അടിച്ചതോടെ, ജീവിതം കീഴ്മേല്‍ മറിഞ്ഞു. അന്നുവരെ കിട്ടുന്ന തുച്ഛമായ വരുമാനംകൊണ്ട് ഭാര്യ സയീദയ്ക്കും മൂന്ന് മക്കള്‍ക്കുമൊപ്പം സുഖമായി ജീവിച്ചിരുന്നു മൊഹ്ദിന്‍. ബ്ലാക്ക്‌ബേണിലെ വീട്ടില്‍ മതവിശ്വാസിയും അച്ചടക്കവുമുള്ള ഗൃഹനാഥനായിരുന്നു. എന്നാല്‍ ലോട്ടറിയടിച്ചതോടെ മൊഹ്ദീന് വലിയ മാറ്റവും സംഭവിച്ചു. മദ്യപാനിയും അക്രമിയും സ്ത്രീലമ്പടനുമായി അയാള്‍ മാറി.

1998ല്‍ അയാളെ ഭാര്യ ഉപേക്ഷിച്ചു. തോക്കെടുത്ത് തന്നെ ഭീഷണിപ്പെടുത്തിയ ഭര്‍ത്താവില്‍ നിന്ന് അവര്‍ വിവാഹമോചനം തേടുകയായിരുന്നു. ലോട്ടറിയടിച്ച പണത്തിന്റെ പങ്ക് ഭാര്യ അവകാശപ്പെട്ടുവെങ്കിലും ഇതിനെതിരെ മൊഹ്ദീന്‍ കോടതിയെ സമീപിച്ചു. എന്നാല്‍ അഞ്ച് ദശലക്ഷം പൗണ്ട് നഷ്ടപരിഹാരവും വീടിന്റെ അവകാശവും സയീദക്ക് കോടതി അനുവദിച്ചു.

വലിയ വേശ്യാലയങ്ങളില്‍ അയാള്‍ പോകാന്‍ തുടങ്ങി. മാറിമാറി പെണ്‍കുട്ടികള്‍ക്കൊപ്പം കഴിയുക ശീലമായി. തുടര്‍ന്ന് ഷാര്‍ലറ്റ് ഡോയ്ല്‍ എന്ന യുവതിയെ കൂടെ കൂട്ടി. ഈ ബന്ധത്തില്‍ മൊഹ്ദീന് ഒരു പെണ്‍കുട്ടി ജനിച്ചു. മരിക്കുമ്പോള്‍ മൊഹ്ദീന്റെയൊപ്പം ആരുമുണ്ടായിരുന്നില്ല. എന്നാല്‍ കിട്ടിയ പണം ഉപയോഗിച്ച് മക്കളെ നല്ല രീതിയില്‍ സയീദ വളര്‍ത്തി. അവരുടെ മൂത്തമകനിപ്പോള്‍ 30 വയസ്സായി. ഇപ്പോള്‍ അയാള്‍ മികച്ചൊരു ബിസിനസ്സുകാരനാണ്.