ഭീകരന്മാരെ റിക്രൂട്ട് ചെയ്യുന്ന ഉപകരണമാണ് ഇന്റര്‍നെറ്റ്...ഭീകരാക്രമണങ്ങള്‍ തടയാന്‍ ഇന്റര്‍നെറ്റ് വിച്ഛേദിക്കണമെന്ന് ഡോണള്‍ഡ് ട്രംപ്
ഭീകരന്മാരെ റിക്രൂട്ട് ചെയ്യുന്ന ഉപകരണം എന്നാണ് ഇന്റര്‍നെറ്റിനെ കുറിച്ച് അമേരിക്കന്‍ പ്രസിഡന്റ് ഡോണള്‍ഡ് ട്രംപ് പറയുന്നത്. ഭീകരാക്രമണങ്ങള്‍ തടയാന്‍ ഇന്റര്‍നെറ്റ് വിച്ഛേദിക്കുകയാണു വേണ്ടതെന്ന് ട്രംപ് കൂട്ടിച്ചേര്‍ത്തു. ലണ്ടനിലെ പാര്‍സന്‍സ് ഗ്രീന്‍ സബ്‌വേയിലുണ്ടായ സ്‌ഫോടനത്തെ അപലപിച്ചുള്ള ട്വീറ്റുകളിലാണ് ട്രംപിന്റെ പരാമര്‍ശം. അമേരിക്കയിലേക്കുള്ള യാത്രാനിരോധനപരിധിയില്‍ ഉള്‍പ്പെട്ട രാജ്യങ്ങളുടെ എണ്ണം കൂട്ടുന്നതിനെപ്പറ്റിയും ട്വീറ്റുകളില്‍ സൂചനയുണ്ട്. ഇസ്‌ലാമിക് സ്‌റ്റേറ്റിന്റെ ഭീകരപ്രവര്‍ത്തനങ്ങളെ തടയുന്ന കാര്യത്തില്‍ ഒബാമ ഭരണകൂടത്തേക്കാളും മികച്ച പ്രകടനം ഇതിനോടകം താന്‍ നടത്തിയെന്നും ട്രംപ് അവകാശപ്പെടുന്നു.
ചൈനയ്ക്കു സമാനമായി ഇന്റര്‍നെറ്റിന് സെന്‍സര്‍ഷിപ് ഏര്‍പ്പെടുത്താനാണോ ട്രംപിന്റെ ശ്രമം എന്ന രീതിയില്‍ ചര്‍ച്ചകള്‍ക്കും ട്വീറ്റുകള്‍ വഴിവച്ചിട്ടുണ്ട്. ഗൂഗിളിന് ഉള്‍പ്പെടെ ചൈനയില്‍ വിലക്കുണ്ട്. ഭീകരന്മാരെ റിക്രൂട്ട് ചെയ്യുന്ന ഉപകരണം എന്നാണ് ഇന്റര്‍നെറ്റിനെ ട്വീറ്റില്‍ ട്രംപ് വിശേഷിപ്പിച്ചത്. 'പരാജിതരായ' ഭീകരര്‍ക്കു നേരെ കൂടുതല്‍ കര്‍ശനമായ സമീപനങ്ങളാണു വേണ്ടത്. അവരുടെ റിക്രൂട്ടിങ് 'ടൂള്‍' ആയിരിക്കെ ഇന്റര്‍നെറ്റിനെ വിച്ഛേദിക്കുകയും കൃത്യമായി വിനിയോഗിക്കുകയുമാണ് വേണ്ടത്. ഇനിയും ഭീകരാക്രമണങ്ങള്‍ ഉണ്ടാകാതിരിക്കണമെങ്കില്‍ ഇത് അത്യാവശ്യമാണ്' ട്രംപ് കുറിച്ചു.
സ്‌കോട്‌ലന്‍ഡ് യാര്‍ഡിന്റെ നിരീക്ഷണത്തിനു കീഴിലുള്ളവരാണ് ലണ്ടനിലെ സ്‌ഫോടനത്തിനു പിന്നിലെന്നും ട്രംപ് പറയുന്നു. എന്നാല്‍ സ്‌കോട്‌ലന്‍ഡ് യാര്‍ഡ് ഇതു സംബന്ധിച്ച വിശദീകരണം നല്‍കിയിട്ടില്ല. യുഎസിലേക്കുള്ള യാത്രാവിലക്കിന്റെ പരിധി കൂട്ടുമെന്നും ട്രംപ് ട്വീറ്റിലൂടെ സൂചന നല്‍കി. യാത്രാനിരോധനം കൂടുതല്‍ വ്യാപിപ്പിക്കും, കര്‍ശനമാക്കും. പക്ഷേ ഇത്തരം നീക്കങ്ങള്‍ രാഷ്ട്രീയപരമായി ശരിയല്ലെന്ന വിഡ്ഢിത്തമാണ് പലരും പ്രചരിപ്പിക്കുന്നത്.
ഇറാന്‍, ലിബിയ, സൊമാലിയ, സുഡാന്‍, സിറിയ, യെമന്‍ എന്നീ രാജ്യങ്ങളിലെ പൗരന്മാര്‍ക്കു യുഎസിലേക്ക് യാത്രാവിലക്ക് ഏര്‍പ്പെടുത്തി ഇക്കഴിഞ്ഞ ജനുവരി 27നു പുറത്തിറക്കിയ ഉത്തരവ് വ്യാപക പ്രതിഷേധത്തിനും കോടതി നടപടികള്‍ക്കും ഇടയാക്കിയിരുന്നു. തുടര്‍ന്ന് ജൂണില്‍ ആറു മുസ്‌ലിം ഭൂരിപക്ഷ രാജ്യങ്ങളിലെ പൗരന്മാര്‍ക്കു യുഎസില്‍ പ്രവേശിക്കുന്നതിനു പുതിയ നിബന്ധനകള്‍ ട്രംപ് ഭരണകൂടം ഏര്‍പ്പെടുത്തുകയായിരുന്നു.
ഐഎസ് ഭീകരര്‍ ഇന്റര്‍നെറ്റ് ഉപയോഗിക്കുന്നതു തടയാന്‍ അതിനു വിലക്കേര്‍പ്പെടുത്തണമെന്ന നിര്‍ദേശം ഇക്കഴിഞ്ഞ ഡിസംബറില്‍ ട്രംപ് മുന്നോട്ടു വച്ചിരുന്നു. ഇതു സംബന്ധിച്ച് മൈക്രോസോഫ്റ്റ് തലവന്‍ ബില്‍ഗേറ്റ്‌സിനെപ്പോലുള്ളവരെ കാണണമെന്നും അന്നു പറഞ്ഞു. ചൈനയെ മാതൃകയാക്കി ചില പ്രത്യേക മേഖലകളില്‍ ഇന്റര്‍നെറ്റിന് വിലക്കേര്‍പ്പെടുത്തണമെന്നായിരുന്നു നിര്‍ദേശം. ആവശ്യമെങ്കില്‍ അതിന് വിദഗ്ധരെ നിയോഗിക്കും. വ്യക്തിസ്വാതന്ത്ര്യത്തിനു നേരെയുള്ള കടന്നുകയറ്റമായി ഇതിനെ വ്യാഖ്യാനിക്കുന്നവര്‍ വിഡ്ഢികളാണെന്നും അന്ന് ട്രംപ് പറഞ്ഞു.
https://www.facebook.com/Malayalivartha
