പശ്ചിമ ലണ്ടനിലെ തിരക്കേറിയ പാര്‍സന്‍സ് ഗ്രീന്‍ സ്‌റ്റേഷനില്‍ ഭൂഗര്‍ഭ ട്രെയിനിലുണ്ടായ സ്‌ഫോടനത്തിന്റെ ഉത്തരവാദിത്തം ഏറ്റെടുത്ത് ഇസ്‌ലാമിക് സ്‌റ്റേറ്റ് (ഐഎസ്). 'ബക്കറ്റ് ബോംബ്'ആണു പൊട്ടിത്തെറിച്ചതെന്നും ഭീകരാക്രമണമാണെന്നും സ്‌കോട്‌ലന്‍ഡ് യാര്‍ഡും അറിയിച്ചു. ലണ്ടന്‍ സമയം രാവിലെ 8.20 നായിരുന്നു സ്‌ഫോടനം. ഈ വര്‍ഷം ബ്രിട്ടനിലുണ്ടായ അഞ്ചാമത്തെ ഭീകരാക്രമണമാണിത്.

സ്‌ഫോടനത്തില്‍ 29 പേര്‍ക്കു പരുക്കേറ്റു. സ്‌ഫോടനത്തെത്തുടര്‍ന്നുള്ള അഗ്‌നിബാധയില്‍ ഏറെപ്പേര്‍ക്കും മുഖത്താണു പൊള്ളലേറ്റത്. തിക്കിലും തിരക്കിലും പെട്ടും ചിലര്‍ക്കു പരുക്കേറ്റു. ട്രെയിനിന്റെ വാതിലിനോടു ചേര്‍ന്നു സൂപ്പര്‍മാര്‍ക്കറ്റ് ബാഗില്‍വച്ച ബക്കറ്റില്‍നിന്ന് തീജ്വാലകള്‍ പുറത്തേക്കു വരുന്നതു കണ്ടതായി ദൃക്‌സാക്ഷികള്‍ പറഞ്ഞു. നഗരത്തില്‍ അതീവജാഗ്രത പ്രഖ്യാപിച്ചിട്ടുണ്ട്.

2005ല്‍ ബ്രിട്ടനില്‍ മൂന്നു ഭൂഗര്‍ഭ ട്രെയിനുകളിലും ബസിലുമുണ്ടായ സ്‌ഫോടന പരമ്പരയില്‍ 52 പേരാണു കൊല്ലപ്പെട്ടത്. പ്രധാനമന്ത്രി തെരേസ മേ യുടെ അധ്യക്ഷതയില്‍ അടിയന്തര സുരക്ഷായോഗം ചേര്‍ന്നു.